دامەزراندنا بنگەهێ لالش بوویە دەرفەتەكا باش ئافرەتا ئێزدی رۆلێ خۆ دناڤ جڤاكی دا ببینت
تۆرا لالش:
ل رۆژا(12/5/1993)ێ و لژێر دروشمێ (لالش كانیەكا زەلالە دهۆرتە د رووبارێ رەوشەنبیریا كوردی دا)بنگەهێ لالش یێ رەوشەنبیری و جڤاكی ل دهۆكێ هاتە دامەزراندن،بنگەهێ لالش ل دەستپێكا دامەزراندنا خۆ و هەتا ئیرۆ رۆژ رۆلەكێ مەزن هەبوو كو ئێزدیان بتر ب جڤاكێ كوردستانێ بدەتە ناسین و ئایینێ راستەقینەیێ ئێزدیان بدەتە دیاركرن بۆ ئاینێن دی ل هەرێمێ،هەروەسا دامەزراندنا ڤی بنگەهی دەرفەتەكا باش بوو بۆ ئافرەتا ئێزدی و ئەگەرێ شكاندنا دیوارێ شەرم و ترسێ وەكو هەموو ئافرەتەكا دی رۆلێ خۆ دناڤ جڤاكی دا ببینت و ژ بوارێ پێشكەفتنا سەردەمی بێ بەهرنەبت و خۆ ئازاد ببینت.
تۆرا لالش:
لەیلا تەعلۆ،كچەكا رزگاربوویا ئێزدی بۆ رۆژناما دەنگێ لالش دبێژت خویاكر،ژ دەما دامەزراندنێ بنگەهێ لالش لدوڤ ستراتیژییەكا باش كاركر ژبۆ دیاركرنا دیمەنێ راستێ ئاینێ ئێزدیان و كۆمكرن و دكیۆمێنتكرنا هەر تشتەكێ گرێدایی ب بیروباوەرێن ڤی ئاینی ڤە،ڤی بنگەهی خزمەتەكا مەزن پێشكێشی چاند و رەوشەنبیری و جڤاكێ ئێزدی كریە،ئیرۆ لسەر گشت كەسێن بەرپرسیار ل ڤی بنگەهی و هەموو تایی و نڤیسینگەهێن بسەرڤە پشكێن كۆمكوژیا بكۆم ئەوا ئێزدی تووشبووینێ ل(3/8/2014)ێ و ب شێوەكی ئەكادیمی و زانستیانە دكیۆمێنت بكن،ل ڤێدەرێ داخواز دكەم پشكەكا تایبەت بۆ دكیۆمێنتكرنا چیرۆكێن ئازارێن كچێن رزگاربووی ل بنگەهی بێتە ڤەكرن و ئەولەویەت بۆ ڤی كاری بت ب رێیا ئەنجام دانا ڤەكۆلین و لێكۆلینان تایبەت دڤی بواری دا،هەروەسا هیڤیخوازین ژ دەستەیا بلندا بنگەهێ لالش بتر دووڤچۆنا كەیسا ئێزدیان بێتە كرن و ب شێوەكی تایبەت گرنگیێ بدەنە زارۆكێن سێوی و رزگاربوویان ژ زیندانێن داعشێ یا تیرۆری و پشتەڤانیا دەروونی و چارەسەریێ پێشكێشی وانا بكن و سمینار و چالاكیێن تایبەت ب كەیسا جینۆسایدێ بێنە كرن.
سوزان خێری،كچەكا پارێزەرا ئێزدی ئاماژە ب وێ چەندێ دا بنگەهێ لالش ب مفایە بۆ جڤاكێ ئێزدیان و كوردستانێ و رۆلەكێ مەزن هەبوو كو ئێزدیان بتر ب جڤاكێ كوردستانێ بدەتە ناسین و ئایینێ راستەقینەیێ ئێزدیان بدەتە دیاركرن بۆ ئاینێن دی ل هەرێمێ،ژلایەكێ دی ڤی لسەر بدەستڤەئینانا مافێن ئێزدیان كار دكت وەكو ئایین و رۆلەكێ باش دڤی بواری دا دیتیە،رۆلێ ئافرەتا ئێزدی دبنگەهێ لالش دا هنەكێ یێ كێمە و پێتڤی بوو دەرفەت بتر هاتبا داین كو ئەو ژی رۆلێ خۆ ببینت و هندەك جی و رۆلێن مەزن وەرگرتبان،دخوازم ل داهاتی كار لسەر مافێن ئافرەتێ بێتەكرن و بڤێ چەندێ هێزا ئافرەتا ئێزدی بتر ئێتە بەرچاڤ.
ژبال خۆڤە بنەفش عەلۆ رۆژنامەڤانەكا ئێزدی بۆ رۆژناما دەنگێ لالش دبێژت دبێژت:پشتی ئاڤاكرنا بنگەهێ لالش و سەرهلدانێ رۆلەكێ مەزن ژ چەندین ئالیان بۆ خزمەتا جڤاكا مە گێرایە،كو هەر ژ دەستپێكێ كاریە هزرا پاقژ یا ئێزدیاتیێ و رەوشەنبیریا وێ دناڤا كۆمەلگەها ئێزدی و جڤاكا كوردی ژی دا بەلاڤ بكت كو پەیاما وی (لالش كانیەكا زەلالە دهۆرتە د رووبارێ رەوشەنبیریا كوردی دا)،هەروەسا پرەك بوویە ژبۆ لێكنزیكبوونا ئێزدیێن جیهانێ و بۆ جڤاكا كوردی ژی سەلماندیە كو ئێزدی كوردێن رەسەنن و هزرا توندرەو كێمكریە،بنگەهێ لالش دەرگەهەك بوویە ژبۆ ل خۆ خرڤەكرنا گەنج و رەوشەنبیرێن ئێزدی هەر بگرە ژ ئاڤاكرنا كەسایەتی،دیتنا دەلیڤەیێن كاری هەروەسا ب رێیا گۆڤار و رۆژنامەیێن خۆ كارینە هزرێن خۆ دناڤا جڤاكی دا بەلاڤ بكن و ببن كەساتیێن بەرچاڤ و گەلەك ژ وان ئیرۆ رۆژ نموونەیێن هەرە دیارن،گەر بەحسێ رۆلێ بنگەهێ لالش و پشكداریا ژنێ بكەین ل دەه سالێن دەستپێكی یێن ئاڤاكرنا بنگەهی ل وی سەردەمی كچ و ژنێن ئێزدی ئەو ئازادیە نەبوو كو كار ژ دەرڤەی مالێ بكت و دەنگێ خۆ بگەهینت،بنگەهێ لالش كاری ژنا ئێزدی ژ مال دەربێخت و بەرەف خۆڤە بكێشت و دەنگێ خۆ بگەهینت جڤاكا ناڤخۆ و ژ دەرڤەی وەلاتی ژی كو نموونە دزۆرن و ئیرۆ رۆژ گەلەك ژ وان سەركردەنە و ب وێ رێ كارینە مافێن خۆ وەربگرن،واتە هەموو گاڤا پشكداریا ژنێ د بنگەهێ لالش دا هەبوویە و رێ دایێ یە،وەكو كچەك داخوازدكەم هێژ بتر دەرگەهێن وان لبەر كیژا ئێزدی دڤەكری بن،ژبەركو ئارمانجێن وێ دزۆرن و ژبۆ بجهئینانا وان پێتڤی ب پشتەڤانیێ یە و هەروەسا نموونەیێن جڤاكا مە و دەستپێشخەرێن ژیر یێن كاران ل بەرچاڤ وەربگرت و نەئێنە ژبیركرن.
دلڤین خە‌لە‌ف،وەك چالاكڤانەك دبوارێ ئافرەتێ دا بۆ رۆژناما دەنگێ لالش دبێژت دیاركر،رۆلێ بنگەهێ لالش بۆ خزمەتكرنا جڤاكی ئێزدی پێنگاڤەكا سەركەفتی بوو ل دەما بنگەه هاتیە دامەزراندن و هەموو رەوشەنبیرێن ئێزدی ل هەڤ جڤاندن و بیروبۆچۆنێن خۆ ب رەنگەكێ ئازاد ئینانە زمان،هەر ب رێیا بنگەهێ لالش چاند و كلتۆرێ خۆ دانە خویاكرن،هەروەسا دامەزراندنا بنگەهێ لالش دەرفەتەكا باش بوو بۆ ئافرەتا ئێزدی و بوو ئەگەرێ شكاندنا دیوارێ شەرم و ترسێ كو ئافرەتا ئێزدی ژی وەكو هەموو ئافرەتەكا دی رۆلێ خۆ دناڤ جڤاكی دا ببینت و ژ بوارێ پێشكەفتنا سەردەمی بێ بەهرنەبت و خۆ ئازاد ببینت،ب هەلكەفتا دامەزراندنا بنگەهێ لالش ب راستی یە فەرە لسەر بنگەهی و هەر دام و دەزگایەكێ رەوشەنبیری ل كوردستانێ هزر د چارەنڤیسێ ئەوان كچ و خوشكین مە یێن ماینە دناڤ دەستێن تیرۆرستێن داعشێ دا بكن و هەموو بزاڤێن خۆ ژبۆ رزگاركرنا وان بێخنە كار و خەمێ لێ بخۆن ب رەنگەكێ شایستە.
تُتاح هذه الصورة أيضا في: کوردی
