ئاوارێن ئێزدی ل كەمپان تووشی نەخۆشیێن دەروونی دبن
تۆرا لالش یا راگەهاندنێ
ئاوارێن شنگالێ یێن ل كەمپا ئێسیا ئاكنجی ئاماژێ ب وێ چەندێ ددەن كو چەندین حالەتێن نەخۆشیێن دەروونی و پیستی و خۆكوشتنێ دناڤ ئاواران دا پەیدابووینە و ئاوارە دژیانەكا سەخت و دژوار دانە، رەنگە ئەڤ جۆرە نەخۆشی هێش بەربەلاڤ ببن ئەگەر هێش بۆ ماوەیەكێ درێژ ل ژیانا كەمپان دا بمینن.
(سامان رەشید)ئێك ژ تووشبوویێن نەخۆشیا دەروونی یە ل كەمپا ئێسیان بۆ رۆژناما دەنگێ لالش ئاشكەراكر، رۆژ بۆ رۆژێ نەخۆشی ل ناڤ كەمپان دا زێدە دبن ئەوژی ژ ئەگەرێ ژیانا سەخت و دژوار وب زەحمەت یا ئاوارە تێدا دژین،نەخۆشیا من نەخۆشیەكا دەروونی یە و هەتا ئەم لبن خیڤەتێن ئاوارەبوونێ دا بین هەر دێ نەخۆش بین چنكو مانا مە ل ناڤ كەمپان دا دۆمدرێژ بوویە،ئەم هیڤی دكن ژ جڤاكا نێڤ دەولەتی و حكومەتا عێراقێ و حكومەتا هەرێما كوردستانێ چارەیەكێ ل دەڤەرێن مە بكن یان هاریكاریا مە بكن دا ئەم خانیا بۆ خۆ چێكەین ل شوونا خیڤەتان دا ژڤان ئێش و نەخۆشیێن خیڤەتان دوور كەڤین.
ژلایەكێ دی ڤە(حەنان نایف) ئاوارەیەكێ كەمپا ئێسیا یە بۆ رۆژناما دەنگێ لالش گۆت:گەلەك حالەتێن خۆ كوشتنێ ل ناڤ كەمپان دا چێدبن و گەلەك ژ وان حالەتا ژ دەردەسەریا ژیانەكا ب زەحمەتە و نەخۆشیێن پیستی ژی پەیدابووینە و ئەڤە دەمەكێ درێژ بۆری ئاوارە لبن خیڤەتێن ئاوارەبوونێ دا و هزرا خۆ ژ ژیانەكا خۆش و ڤەگەرا جیێ باب و كالا قوتكرینە،لەوما گەلەك ژڤان حالەتێن نەخۆش چێدبن،ئەم داخواز دكەین چارەیەك ل حالێ مە بێتە كرن و ژیانا كەمپان قورتال بین و جارەكا دیتر ڤەگەرینە دەڤەرێن خۆ ڤە.
كەمپا ئێسیان ئێك ژ كەمپێن ئاوارەێن شنگالێ ل سنوورێ پارێزگەها دهۆكێ یە ل ناحیا باعەدرێ ل سالا (2015)ێ هاتیە دروستكرن و نێزیكی(15)هەزار كەسان تێدا دژین.
تُتاح هذه الصورة أيضا في: کوردی
