رزگاربوویێن ئێزدی ل كەمپان پێتڤی چاڤدێریا دەروونی نە
تۆرا لالش یا راگەهاندنێ
كچ و ژنێن رزگاربوویێن ئێزدی یێن ل كەمپان ئاكنجی ل سنوورێ پارێزگەها دهۆكێ هێشتا ل ژیان و بارەكێ دەروونی یێ نەخۆش دا دژین و ژبەر رەوشا تێدا گەلـەك ژوان هزر ل خۆ كوشتنێ كریە، ڤەكۆلەرەكی جڤاكی ژی دیار دكت كو رزگاربووی ل كەمپان پێتڤی چاڤدێریا دەروونی نە.
(مەنال لوقمان)ئێك ژ رزگاربوویێن دەستێ داعشێ یە بۆ رۆژناما دەنگێ لالش دیاركر،چ جارا وان دیمەنان ژبیرناكەین دەمێ تیرۆرستێن داعشێ ئەشكەنجە و ئازارداین و كرین فرۆتن بمە دكرن و ئەڤ كریارێن هۆڤانە دژی مرۆڤایەتیێ ل دیرۆكا جیهانێ دا چێنەبووینە تیرۆرستان دگەل مە كرن،بەلێ هەكە هاریكاری وەك پێتڤی بۆ مە هاتبا كرن دێ بارێ خەمێن مە سڤك ببان،لێ بەروڤاژی ڤێ چەندێ ئەم دووبارە ئێش و ئازارا ل كەمپان دكێشن و چ هاریكاری ژلایێ حكومەتا عێراقێ ڤە بۆ مە نەهاتیە كرن و هەر چ بۆ كچێن رزگاربووی بێتە كرن یا كێمە.
(حەلا سڤیل) رزگـاربوویەكا دی یا دەستێ داعشێ یە بۆ رۆژناما دەنگێ لالش ئانی زمان، وەكو رزگاربوویەك دبینم كــو هاریكاریەكا باش بۆ هندەك كچێن رزگاربووی هاتیە كرن و هندەكێن دی چ هاریكاری بۆ نەهاتیە كـرن و ژیانا خۆ ب خورتی دەرباس دكن و د ژیانەكا ب گری و نەخۆشی و بارەكێ دەروونی یێ نەباش دا دژین،گەلـەك ژوان هزرا خۆ كوشتنێ دكن ژبەر وێ رەوشا تێدا دژین،نهۆ ژی حالەتێن جۆرا و جۆر یێن دەروونی ل جەم رزگاربوویان چێدبن و پێتڤی ب چاڤدێریەكا بەردەوامن.
لدۆر رەوشا كچ و ژنێن رزگاربوویێن ئێزدی ڤەكۆلەرێ جڤاكی(جەمال عەلی) بۆ رۆژناما دەنگێ لالش ئاشكەراكر،رزگاربوویێن دەستێ داعشێ بەردەوام پێتڤی ب چاڤدێریێ نە كو چاڤدێرێن دەروونی سەرپەرشتیا وان بكن و هەول بدەن دەروونێ وان پچەكێ بزڤرینن بۆ بارێ خۆ یێ بەرێ،هەروەسا پێتڤی ب هاریكاریانە و تایبەت ئەو كچ و ژنێن كو ئەو بتنێ ژ مالباتێن خۆ رزگاربووین،ب سوپاسی ڤە گەلەك وەلاتێن جیهانێ هاریكاربوون و هندەك ژ رزگاربوویان برنە وەلاتێن خۆ داكو دوور بكەڤن ژ ژینگەها شەران و بارودۆخێن ئەمنی یێن نە ئـارام،بەلێ هەرچەندە و پێتڤیە ئەڤێن مایین ل عێراقێ ژی چاڤدێریا دەروونی یا تایبەت و بەردەوام بۆ هەبت داكو ئارام ببن.
تُتاح هذه الصورة أيضا في: کوردی
