سۆتنا گلێشی ل كەمپا چەم مشكۆ زیانەكا مەزن گەهاندیە خەلكی
تۆرا لالش یا راگەهاندنێ/لەیت حسێن
ئاوارێن ئێزدی ئاماژێ ب وێ چەندێ ددەن ژبەر دوكێلا سۆتنا بەرمایك و گلێشێ ل دەردۆرێن كەمپا چەم مشكۆ ژمارەكا خەلكی نەخۆش دبن و زیانەكا مەزن گەهاندیە نەخۆشان،ژبال خۆڤە رێڤەبەرێ كەمپێ ئاشكەراكر دگەل كۆمپانیێ رێككەفتینە ئێدی ب چ رەنگان گلێش نەئێتە سۆتن.
(موراد قتۆ) ئاوارەیەكی كەمپێ دبێژت:رەوشا خەلكێ كەمپێ نەیا باشە ژلایێ خزمەتكاریان ڤە تا رادەیەكی دلاواز،بەلێ ئەم هیڤی دكن ژ جیێن پەیوەندیدار و كاربدەست كو خزمەتكاریێن ناڤ كەمپێ باشتر لێ بكت و ئەم پێتڤی ب بەلاڤكرنا ڤاوچەرانن و كەلوپەلێن ساخلەمیێ كو دڤێت هەیڤانە لسەر مە بێنە بەلاڤكرن،دیسان گازندێن مە ژ كارەبا نشتیمانی نە و مە دڤێت ب شەڤێ بەردەوام بت،چنكو ئەم بەرەف وەرزێ هاڤینێ دچن و سەقا ژی هێدی هێدی گەرمتر دبت،سەبارەت ڤەگەریانێ بۆ شنگالێ ژی دڤێت خزمەتكاریێن سەرەكی وەك ئاڤ كارەب و ئەولەهی ل شنگالێ زێدەتر لێ بێن و بێنە دابینكرن،دا خەلكێ مە پتر بكاربت ڤەگەرتە سەر جی و وارێن خۆ،ئەم دخوازن و ب پێتڤی ژی دبینن كو پاراستنا نیڤ دەولەتی بۆ مە ئێزدیان بێتە سەپاندن و چۆنا خەلكێ بیانی بۆ شنگال و دەوروبەران بێتە قەدەغەكرن ،چنكو هەر ئەو كەسن یێن كو بووینە ئەگەرا كۆمكوژیێ ل(3/8/2014).
لدۆر كاریگەریا سۆتنا گلێشی لسەر ساخلەمیا خەلكێ كەمپێ ئاوارە(فادل سلێمان)دیاركر،رەوشا خەلكێ دناڤ كەمپێ دا یا لاوازە ژبەر درەنگبوونا هاتنا مووچەی و بڕینا یێ هندەكان ژ خەلكێ و نە هاریكاریكرن ژبال رێكخراوان ڤە وەك لپێش نهۆ،ل كەمپا مە ژمارەكا زێدە یا خێزانان تێدایە،لێ ئەو گلێشا لدۆرا كەمپێ دئێتە سۆتن گەلەك كارتێكرنا خۆ لسەر ساخلەمیا خەلكێ كەمپێ هەیە و هەموو ژی ب وێ چەندێ نە رازی نە و دبتە ئەگەرا نەخۆشیان ل نك وان،هەروەسا داخوازا مە زێدەكرنا كارەبا نشتیمانی یە ل دەمێن پێتڤی و ڤاوچەرێن مە بەردەوام بێن و هەیڤانە كەلوپەلێن ساخلەمیێ بۆ مە بێنە دابینكرن،دخوازم كو تشتەك بۆ وان خێزانێن ڤەگەریان بۆ شنگال هاتبە كرن دا ڤەگەراندنا مە و هەموو خەلكێ مە یێ هەتا نهۆ ل ناڤ كەمپان دا ب ساناهی ببا.
ژلایەكی دی ڤە ئاوارە (عەلی ئەلیاس)گۆت:هەر ژ رۆژێن پێشیێ یێن ئاوارەبوونێ و هەتا نهۆ ئەو بەرمایك و گلێشێن كو ل نێزیكی كەمپا چەم مشكۆ دئێنە سۆتن خەلكێ كەمپێ نەرازی دكت و ژبەر بەربەلاڤبوونا دیكۆلێ بێزار بووینە،ژبەركو دبتە ئەگەرا چەندین نەخۆشیان و زیانەكا مەزن دگەهینتە نەخۆشان ب تایبەت ئەوان نەخۆشان یێن كو نەخۆشیا تەنگەنەفەسیێ هەین و كارتێكرنێ لسەر وان ئافرەتێن دووگیان و وان زارۆكێن شیرمێژ دكت.
لدۆر ڤێ چەندێ رێڤەبەرێ كەمپا چەم مشكۆ(مامون یەحیا)دیاركر،رەوشا كەمپێ ب شێوەیەكی گشتی زۆر باشە كو هەیڤانە ژلایێ رێكخراوا (wfp)ڤە ڤاوچەر لسەر ئاوارەیان دئێنە بەلاڤكرن،ژلایێ كارەبا نشتیمانی ڤە مە دەست ب دروستكرن و رێكخستنا سندۆقێن كارەبێ كریە و بۆ وەرزێ هاڤینێ وەكی سالا بۆری دەمژمێرێن كارەبێ بكەینە درۆژێ دا و دێ رەوشا كارەبێ باشتر لێ ئێت،ژبەركو سەرپێچیێن كارەبێ هەتا داویا نیڤا هەیڤا پێنچ نامینن،دیسان ژلایێ پاقژیێ ڤە د نهۆ دا دوو تمبێلێن راكرنا گلێشی و ئێكا ئاڤا گران ژلایێ رێكخراوێن ( CARE & HARIKAR) ڤە هاتینە دابینكرن و رۆژانە كەمپە تێتە پاقژكرن،دەربارەی سۆتنا گلێشی ل نێزیكی كەمپێ ئێدی گلێش ب چ رەنگان نائێتە سۆتن،چنكو ئەم دگەل كۆمپانیا راكرنا گلێشی رێككەفتینە كو ئێدی ب چ رەنگان گلێش نەئێتە سۆتن ژبەر وێ دیكۆلا دهاتە ناڤ كەمپێ و كەش و هەوایێ وێ تێك ددا.
تُتاح هذه الصورة أيضا في: کوردی
