چالاكڤان ناڤین سمۆقی:مافێ ژنێن ئێزدی هاتیە وونداكرن
تۆرا لالش یا راگەهاندنێ
چالاكڤانا دبوارێ مافێ ژنا ئێزدی دا(ناڤین سمۆقی)ددیدارەكێ دا بۆ رۆژناما دەنگێ لالش راگەهاند،ژنێن رزگاربوویێن ئێزدی تووشی رەفتارێن زۆر دژوار بووینە ژ دەستێ تیرۆرستێن داعشێ،تەكەز دكت كو ل سەر هەموو نەخۆشیێن تووش بوویێ ژنێن مە ب هێزن و هەردەم بەرخودان ژ دۆزا خۆ كریە،ئاماژەكر ژی مافێ ژنێن ئێزدی هاتیە وونداكرن و كەس گوه ل ئێش و ئازارێن وان ناگرت.
ل دۆر رەفتارا تیرۆرستان لگەل ژنێن ئێزدی،چالاكڤانا دبوارێ مافێ ژنا ئێزدی دا(ناڤین سمۆقی)دیاركر،دچەند دیداران دا لگەل هندەك ژنێن رزگاربوویێن ژ دەستێ تیرۆرستێن داعشێ،بۆ من بەحس كرن كو رەفتارا سەخت یا سكسی لگەل وان دهاتە كرن و زۆر جاران وەكی گرۆپ ئەو كارە لگەل ژنان دكرن،ئەو ژنا نەهێلابە دئیشاندن،رزگاربوویان ئاماژە كرن ژی كو هەر ل نێڤ خۆدە داعشێ كرین و فرۆتن ب ژنان دكر و گەلەك داعشا ئافرەتێن ئێزدی دكرین ،تاكو خزمەتكاریێ ژبۆ خێزانا وان بكن،ژبلی كارێ سكسی لگەل دكرن،ئەڤ ئافرەتە تووشی رەفتارێن زۆر دژوار دبوون هەر ژ ئالیێ خێزانێن داعش ڤە و دهاتنە بكارئینان ،ژبۆ ئامادەكرنا پەقینان و كریارێن خوكوژیێ.
هەروەسا ل دۆر ژیان و ئازارێن ژنێن رزگاربووی(سمۆقی)گۆت:هەتا نۆكە ساناهیترین پێتڤیێن ژیانێ بۆ ڤان ژنان نەهاتینە دابینكرن و چ سەنتەر نەهاتینە دروستكرن،داكو ڤان ژنان وەربگرن و ژیانا وان خۆش بكن و بۆ پتریا وان چ دەرمالە وەك دراڤی ب شێوەیەكێ هەیڤانە بۆ وان نەهاتیە تەرخانكرن،كو بكارن ژیانا خۆ ب رێڤەببەن وەكی خەلكێ دی،چنكو گەلەك ژ وان خێزانێن وان هەتا نۆكە ل ژێر دەستێ داعش دانە و ژیانا وان یا تایبەت نەوەكی خەلكێ دییە،ژبەر وان نەخۆشیێن تووش بووینێ ژ ئالیێ داعش ڤە،وەك چالاكڤانەك بناڤێ خۆ و هەموو ژنێن رزگاربووی من ل گەلەك كۆنفرانسا و ژمارەیەكە مەزنا رێكخراوان داخواز كریە و نۆكە ژی داخواز دكەم مافێ مە بەرزە نەكن،چنكو مافێ ژنێن ئێزدیان یێ ووندایە و هاتیە هنداكرن و كەس گوه ل ئێش و ئازارێن وان كچ و ژنان ناگرت.
سەبارەت رەوشا دەروونی یا ژنێن رزگاربووی چالاكڤانێ خویاكر،ژنێن رزگاربووی نۆكە لگەل هندەك رێكخراوان كاردكن و هەتا نۆكە مفایەكێ زۆر ژێ وەرگرتینە، ژ ئالیێ دەروونی ومەعنەوی و مادی ڤە.
دەربارەی بەرخودانا ژنا ئێزدی( ناڤین سمۆقی)دبێژت:ژنێن ئێزدی ب گشتی و یێن شنگالێ ب تایبەتی ل سەر هەموو نەخۆشیێن تووش بووینێ هێش ب هێزن و ب ئۆمێدن و مل ب ملێ زەلامێ خۆ رۆژێن دژوارێن ژیانێ دەربازكرینە و ل هەموو لایەنان جهێ خۆ گرتینە و هەردەم بەرخودان ژ دۆزا خۆ كریە ،مینا كچا ئێزدی(نادیا موراد) كا چاوا دەنگێ ژنێن ئێزدی گەهاندە وەلاتێن جیهانێ و ئەو ب خۆ قوربانیا دەستێ داعشێ بوو،هەروەسا ژنێن ئاوارە ژی تووشی رەوشەكا ژیانێ یا ب زەحمەت بووینە لگەل زەلامێ خۆ و هێشتا گەلەك ئافرەتێن ئێزدی ل بن دەستێ داعش دانە،لەورا داخوازێ ژ هەموو خێرخوازا دكەم ب هانا ئافرەت و گرتیێن مە بێن هەتا كو هەموو ئازاد ببن.
تُتاح هذه الصورة أيضا في: کوردی
