حكوومەتا عێراقێ هەتا نۆكە هاریكاری نەگەهاندینە ئاوارێن كەمپا خانكێ 
تۆرا لالش یا راگەهاندنێ/بەختیار قادر
رێڤەبەرێ كەمپا خانكێ دبێژت،حكوومەتا عێراقێ هەتا نۆكە چ دەستێ هاریكاریێ نەگەهاندیە ئاوارەیان وچ رۆلێ بەرچاڤ نینە،هەڤدەم ژی ئاوارە نۆكە پێتڤی ئاڤ تەزینكێن كچك و بای تەزینكانن.
پیر دەیان،رێڤەبەرێ كەمپا خانكێ بۆ(تۆرا لالش یا راگەهاندنێ)خویاكر”ل كەمپێ 2هەزار و 908خێزانێن ئاوارە ئاكنجینە،داخوازیا خەلكێ مە نۆكە پتر ئەوە رەوشا كارەبا نشتیمانی باش بت،ژبەركو دەمێ دئێتە برین مە موەلیدە نینن بدەینە كاری و چەندین جاران مە داخوازكریە وهێش چوو بەرسڤ بۆ مە نەهاتینە،هەروەسا ئاوارە دخوازن ئاڤ تەزینكێن كچك و بای تەزینك بۆ وان بێنە دابینكرن،هەرچەندە مە بای تەزینك ل سالا ئەولی دابەشكرن،بەلێ گەلەك خێزان نوو هاتینە و بێ بەهربووینە دەمێ هاتینە دابەشكرن ئەو نەدبەرهەڤ بوون”.
زێدەتر گۆت:” ل سالا 2014دەمێ كەمپە هاتیە چێكرن”یونسی ئار” گۆتە مە یا فەرە پشتی سالەكێ ئەو خیڤەت بێنە گهۆرین،لێ ئەڤە دۆرێن سالەك و 10هەیڤایە مە گۆتیە وان دبێژن ،ژبەر ئەگەرێن دارایی مە دەست بگوهارتنا وان نەكریە،كو پێتڤیە هەموو خیڤەت بێنە گوهۆرین كو ژمارا وان سێ هەزار و 120 خیڤەتن”.
ئەو ژی خویاكر:”وەك كارگێریا كەمپێ كارێ مە هەماهەنگە دەمێ كەسەك یێ رزگاربوویی دگەهتە كەمپێ،ئێكسەر سەرەدانا وان دكەین و دگەهیننە وان رێكخراوێن شۆلەژێ تایبەت ل دهۆكێ ژی رێڤەبەرییا بۆردێ كاروبارێن مرۆڤایەتیێ هاتیە ڤەكرن،تنێ سەرپەرشتیا ئاواران ل دهۆكێ دكت”.
هەروەسا پیر دیان ئاشكەراكر:”حكوومەتا هەرێمێ ل گۆر شیانێن خۆ تەخسیرنەكریە سەرەرای ڤێ قەیرانا تێدا دبۆرت،رۆلێ رێكخراوان نە ل ئاستێ پێتڤی یە،ژبەركو گرێبەستێن وان سێ هەتا شەش هەیڤانە و پاشی دچن،هەروەسا رۆلێ حكوومەتا ناڤەندی ژی چ رۆل بەرچاڤ نینە ب مخابنی ڤە و چ دەستێ هاریكاریێ نەگەهاندیە ئاوارێن كەمپێ”.
رێڤەبەرێ كەمپا خانكێ خواست رێكخراوێن خێرخوازی و جهێن شۆلەژێ هاریكاریا ئاوارێن كەمپێ بكن.
تُتاح هذه الصورة أيضا في: کوردی
