ئاوارێن شنگال ژیانا كەمپان هەلدبژێرن
تۆرا لالش:
پشتی بوویەرا ئاگربەبوونێ ل كەمپا شاریا روودایی كو نێزیكی(400)خێڤەتێن ئاوارێن شنگال هاتنە سۆتن و زیانێن مادی یێن مەزن ب خەلكی كەفتین،ئاوارێن شنگال ل كەمپێن سنوورێ پارێزگەها دهۆكێ ئاماژێ ب وێ چەندێ ددەن كو ژیانا كەمپان یا ب مەترسی یە ژبەر روودانێن ئاگربەربوونێ،لێ ئەگەر رەوش ل شنگال ئاسایی نەبت و خزمەتگۆزاری نەئێنە دابینكرن ئەو دێ كەمپان هەلبژێرن و ناڤەگەرنە سەر جی وارێن خۆ ڤە.
قاسم عومەر ئاوارەیەكێ خەلكێ شنگالێ ل كەمپا كەبەرتوویێ ئاكنجی یە بۆ دەنگێ لالش دیاركر،ژیانا وان ل ناڤا كەمپان دا گەلەك ب زەحمەت ب رێڤە دچت و چاڤەرێ بوون رەوشا وان باشتر ببت لێ هەتا نۆكە د رەوشەكا پەریشان دا ژیانێ دەرباز دكەین،شنگال ژلایێ رێكخراوا تیرۆرستیا داعشێ ڤە هاتیە وێرانكرن و ژیان ل وێدەرێ ژی یا گونجای نینە،لەورا داخوازێ ژ نەتەوەیێن ئێكگرتی و حكومەتا هەرێما كوردستانێ و حكومەتا عێراقێ دكەین پێنگاڤێن خۆشكرنا ژیانێ ل شنگال پاڤێژن ژبەر ژیان ل وێ دەڤەرێ نابت ژبەر نەبوونا ئیدارا شەرعی و نەبوونا ئێمناهیێ و خزمەتگۆزاریان و ئاڤەدانیا دەڤەرێ ئەڤە هەموو ئەگەرن كو خەلكێ شنگال ژیانا خیڤەتان هەلدبژێرن و نا زڤرنە سەر جی و وارێن خۆ.
ژلایەكێ دی ڤە عیماد عەلی ئاوارەیەكێ ئاكنجیێ كەمپا شاریا یە بۆ دەنگێ لالش گۆت: ئاوارێن شنگال د رەوشەكا گەلەك زەحمەت دانە ژبەر گەلەك ئەگەران ل سنوورێ پارێزگەها دهۆكێ ب دەهان جارا بوویەرێن ئاگربەربوونێ ل كەمپێن ئاواران پەیدابووینە و زیانێن گیانی و مادی ل پەی خۆ هێلاینە و مەترسی نە لسەر ژیانا خەلكی،هەری داوی ژی ئەو بوویەرا ئاگربەربوونێ یا ل كەمپا شاریا روودایی و نێزیكی(400)خیڤەتێن ئاواران هاتیە شەوتاندن و زەرەر و زیانێن مادی یێن مەزن ب خەلكێ كەمپێ كەفتن ژ ئەگەرێ وێ بوویەرا ئاگربەربوونێ و جارەكا دی ئەو خەلكێ زیانڤێكەفتی ئاوارە بووینە و نۆكە ل هندەك جیێن دی ئاكنجی بووینە هەتا كو جیێ وان سەر ژ نوو دئێتە نووژەنكرن و چێكرن،ئەم داخواز دكەین بتر كار بێتە كرن ژبۆ دیتنا رێگە چارەیەكێ ژبۆ شنگال و خەلكێ شنگال زۆر بێزاربوون و بووینە قوربانیێن ڤێ ململانا سیاسی یا كو ل شنگال هەی،ئەگەر رەوش بڤی ئاوایی بت و چارەیەك نەئێتە دیتن خەلكێ شنگال هێشتا دێ ل ناڤا ژیانا كەمپان و ئاوارەیێ دا بن.
ژبال خۆڤە فەواز خەلەف ئاوارەیەكێ دی یێ شنگالێ ل ئێك ژ كەمپێن پارێزگەها دهۆكێ بۆ دەنگێ لالش راگەهاند،دڤێت خەلكێ شنگال بێتە قەرەبووكرن و حكومەتا هەرێما كوردستانێ و حكومەتا عێراقێ و دگەل یوئێن چارەیەكێ ژبۆ ڤێ خەلكی ببینن،داكو خەلكێ شنگال زێدەتر دەربەدەر و كۆچبەر نەبت،ئەگەر چارەیەك ژبۆ رەوشا شنگال نەئێتە دیتن دێ رەوش رۆژ بۆ رۆژێ بتر ئالۆزتر بت،داخوازا هەرە سەرەكی یا خەلكێ شنگالێ ئەوە جێبەجێبكرنا رێككەفتنا شنگالێ دناڤبەرا هەولێر و بەغدایێ دا،داكو ئارامی و ئاڤەدانی ل دەڤەرێ پەیداببت و خەلك ژی ب سەر بلندی و سەرفەرزای ڤەگەرتە سەر جی و وارێن خۆ ڤە و ژڤێ ژیانا ئاوارەیێ و ژیانا پەریشان ل ناڤا كەمپان دا قورتالببن.
ئەڤە ماوێ بتر ژ شەش سالایە بتریا خەلكێ شنگال ژیانا خۆ ل ناڤ كەمپان دا ل سنوورێ پارێزگەها دهۆكێ دەرباز دكن،لێ ژبەر هەبوونا گرۆپێن نەشەرعی و نەبوونا ئارامی و تەناهیێ و هەڤركیێن سیاسی و خزمەتگۆزاریان،خەلك ژیانا ل كەمپان دا خۆشتر دبینن هەتا كو رەوش ل دەڤەرێن وانا ئاسایی ببت.
تُتاح هذه الصورة أيضا في: کوردی
