بنگەهێ لالش بەردەوام هاریكاریان پێشكێشی ئاوارەیێن باعەدرێ دكت
دیدار:كاروان باعەدری
ل دەستپێكا هاتنا ئاوارەیێن شنگالێ و باشیكێ بۆ دەڤەرێن هەرێما كوردستانێ،بەشەك ژوان قەستا ناوچەیا باعەدرێ و دەردۆرێن وێ كرن و لێ ئاكنجی بوون،بنگەهێ لالش ل باعەدرێ ئێكەم دەزگەه بوو خۆ ل ئاوارەیان كرە خودان،بەرپرسێ بنگەهێ ناڤبری بۆ رۆژنامەیا دەنگێ لالش راگەهاند،ل سەر ڤێ قەیرانا دارایی و هاتنا ڤێ ژمارا زۆر یا ئاوارەیان،مە ب هەموو شیانێن خۆ هاریكاری ب سەر ئاوارەیان دا بەلاڤكرینە و ب تایبەت بسەر وان كچ و ژنێن ژ دەستێ داعشێ رزگاربووین.
بەرپرسێ بنگەهێ لالش تایێ باعەدرێ(خەلات باعەدری)دیاركر،هەر ژ دەستپێكا هاتنا ئاواران بۆ هەرێما كوردستانێ و ب تایبەت پارێزگەها دهۆكێ،بەشەك ژوان بوونە بەهرا ناوچەیا باعەدرێ و دەردۆرێن وێ،بنگەهێ لالش ئێكەم بنگەه بوو ل ناوچەیێ خۆ ل ئاوارەیان كرە خودان ،هەروەسان كۆمەكە گەنجێن دەڤەرێ وەك گرۆپ لگەل بنگەهی دهاریكاربوون وەك لژنە دخزمەتا ئاوارەیان دابوون هاریكاریێن دەستپێكی پێشكێشی ئاوارەیان كرن و هەتا نۆكە ژی هاریكاری دبەردەوامن.
دەربارەی بەلاڤكرنا هاریكاریان ژی باعەدری گۆت:بنگەهێ مە لگەل چەندین رێكخراوێن بیانی و ناڤخۆیی هاریكاری لسەر ئاوارەیان دا بەلاڤ دكرن،دیسان مە گەلەك هاریكاری و پێتڤی ب سەر وان كەسێن زێدە پێتڤی كو چوو چارە نەبوون و پێتڤیەكا مەزن ب جلك و كەلوپەلێن ناڤمالێ هەبوون دابەشكرن،هەروەسا مە چەندین رێكخراوێن دی ئینانە كو دناڤا كەمپا و كاڤلان دا بگەرێن،چنكو ئەو دێ پتر رەوشا ئاوارە و نەخۆشان ببینن و پتر خۆ ل داخوازی و پێتڤی و نەخۆشی و چارەسەریێن وان بكەنە خودان،مینا دەزگەهێ خێرخوازی یێ بارزانی و مە چەندین خۆلێن جودا جودا بۆ ئاوارەیێن ناڤا باعەدرێ و كەمپا ئێسیان ڤەكرن و مە كاری خەلكێ خۆ ژی هان بدەین هاریكاریان لسەر ئاوارەیان بەلاڤ بكن.
دبەردەوامیا ئاخفتنا خۆ دا گۆت:مە هاریكاری ب سەر وان نەخۆشان دا بەلاڤكرن ئەوێن نەخۆشیێن دۆم درێژ هەیی،چنكو ئەو پێتڤی ب هاریكاریێن بەردەوام بوون،ل سەر ڤێ قەیرانا ئابووری دا و هاتنا ڤێ ژمارا زۆر یا ئاوارەیان مە ب هەموو شیانێن خۆ ڤە مە هاریكاری ب سەر وان ئاوارەیان دا بەلاڤدكرن و ب تایبەت بسەر وان كچ و ژنێن ژ دەستێ داعشێ رزگاربووین ب هەر شێوەیەكی هەبا ب هەماهەنگی لگەل رێكخراوێن بیانی و ناڤخۆی،زێدەباری هندێ مە رێكخراوێن ساخلەمیێ هان ددان كو پتر خزمەتكاریا پێشكێشی كچ و ژنێن رزگاربووی بكن.
تُتاح هذه الصورة أيضا في: کوردی