شنگال وبەرخودان
جەمال كودی
ئەڤە سالەك بسەر وێ كارەساتا دلتەزینا شنگالێ رە دەربازبوو ئەو یا ل رێكەفتی 3/ 8/ 2014روودای ورێكخراوا تیرۆرستی بناڤێ دەولەتا ئیسلامێ هێرش بریە سەر گوند وكۆمەلگەهێن دەڤەرا شنگالێ ودەست ب تالانكرن وكوشتنا خەلكێ سڤێل وبێ گونەه كر ،تا كو ژئەنجامێن وێ چەندێ نهۆ ئەم یێت بینین تەڤایا ئاكنجین وێ مال وگوندێن خۆ بەرداینە نهۆ ددەربەدەرن تا نهۆ چ ژپاشەرۆژا خۆ نزانن وژبلی ئەو یێن شەهید وئێخسیر وبریندار بوین ،ئەڤێ كارەساتێ دڤی سەردەمی دە زیانەكە مەزن گەهاندەهەموو ئێزدیخانێ یا بوو ئەگەركو پتریا ئێزدیا ئیرۆ وەلاتێ خۆ بجه بهێلن.
بێ گۆمان ئەڤە نە جارائێكێ مللەتێ كورد ب گشتی وب تایبەتی ئێزدی تووشی ڤان جۆرە كارەسات وفەرمان ودەربەدەریێ دبن ،چنكو هەردەم پلانێن دوژمن ونەحەزێن مللەتێ مە دداناینە وهەر دەمەكی دەلیڤا خۆ دیت دێ هەموو شیانێن خۆ بكارئینن بۆ نەهێلانا نەتەوا كورد ، ڤێ جارێ ژی برێیا ئاینی ژبەر كو شنگال جهەكی كوردی یێ رەسەنە ئەرەبێن دكتاتۆر و شۆفینزم چاڤێن وان پێ رانە بوون ئیرۆ كوردستان بگەهتە ئاستەكی وەسا هەموو نەتەوە وئایین وكێمینە دبن سیبەرا دیموكراسی وئازادیێ دە بێ هیچ ئاستەنگ بژین باژارێ شنگالێ كرنە ئامانجا خۆ بخیانەت هەزارەها ژن وزارۆك وگەنج وپیروكالا بێ هیچ ئەگەرەك كوشتن وهنداكرن وئێخسیركرن ،رەنگە نهۆ ژی پلانێن وان دبەردەوام برێیا ڤان جۆرە كریارێن بدژی مرۆڤایەتێ هەموویێ نەك بدژی ئێزدیا یان نەتەواكورد لێ ئەونزانن دیرۆكا خۆ بتر شێلوو ورەش دكەن ل هەموو جیهانێ ، لەورا نەتەویێن ئێكگرتی وهەر وەلاتەكەكی پێ چێبووی خۆ لڤێ كارەساتێ كرەخودان وبەردەوام پێكۆل یێ دئێنە كرن ل سەرانسەری جیهانێ ببتە جینۆساید ، لەورا نەیە ب ساناهیە ئەڤ بیرەوەرییا دلتەزین ببۆرینا دەمی بێتە ژبیركرن ،بەلكو ئەركەكی نەتەوەیی ومرۆڤایەتی یە رێزەكە مەزن ل شەهید وقوربانیێت ڤێ كارەساتێ وهەموو شەهیدێن بزاڤا رزگاری خوازا كوردی بێتە گرتن ،چنكو وەكی هەر فەرمانەكێ ددیرۆكێ دە هاتە تۆماركرن كا چاوە بەری سەدەها سالا ستەم ل كوردێن ئێزدی دهاتە كرن داكو رەسەنایەتی وبیرۆزیا وان نەمینت.
هەژی گۆتنێ كو ئەڤ بارودۆخێ پەیدابووی بۆ هندەك لایەنا بوو دەلیڤە دا ئەو رەوشا نهۆ كوردستان تێدە ژلایێ ئەمنی وسیاسی تێك بچت،لێ چو دەر نەگرتن وبتریا خەلكێ كوردستانێ یێ هاریكاربوو ب تایبەتی لدەستپێكا كارەساتێ خزمەتەكە باش بۆ ئاوارا هاتەكرن ،هەروەسا جهێ فەخر وشانازیێ یە ئیرۆ ژمارەكە مەزن ژشەرڤان وپێشمەرگی قارەمان ل دووری خێزان مالباتێن خۆ ئەڤە سال زڤری سالێ ل چیایێ شنگالێ نە وگەلەكا گیانێ خۆژی گۆری وێ ئاخێ كر ویێ بەردەوام بەرەڤانیێ ژئاخا شنگال وكوردستانێ دكن فەرە روولێ وان یێ پیرۆز نەئێتە ژبیركرن ،چنكوهەر بزاڤەكە ژلایێ وان ڤە هاتبتە ئەنجامدان لاپەرەك ددیرۆكا بەرخودانا چیایێ شنگالێ دە ،پشتی بۆرینا سالەكێ دسەر ڤێ كارەساتا دلتەزین رە خەلكێ شنگالێ و تەڤایا ئێزدیا دهەژی وێ چەندێ نە ئیرۆ داخوازیێن وان بێنە بجه ئینان بتایبەتی ژلایێ نێڤدەولەتی ڤە وەكی جینۆساید ناساندنا شنگالێ وپاراستنا مافێ ئێزدیان وەك هەر پێكهاتەكێ ددەستوورێ هەریمێ دە ، بزاڤێن باش بێنە كرن بۆ قورتالكرنا رەڤاندیا یێن تا نهۆ ددەستێ خوین مژ و تیرۆرستا دە،ڤێ هەلكەفتا خەمگین سلاڤ لگیانێ شەهیدێن شنگالێ وتەڤایا شەهیدێن كوردستانێ بن وهەر بژیت پێشمەرگە وبەرخودانا چیایێ شنگالێ.
تُتاح هذه الصورة أيضا في: کوردی
