دایكەك نەهـ هەیڤان كچا خۆ ژ دەستدرێژیێن تیرۆرستێن داعشێ دپارێزت
تۆرا لالش:
خانمەكا ئێزدی یا ل ژێر دەستێ رێكخراوا تیرۆرستی یا داعش،ب شێوازەكێ سەیر و سەرەنجراكێش بۆ ماوێ نەهـ هەیڤێن تەمام كاری كچا خۆ ژ دەستدرێژیێن تیرۆرستێن داعشێ بپارێزت.
مەنال خەلات،كچەكا رزگاربووی ئێزدی یە،ل سالا 2000ێ ل گوندێ حەردان سەر دەڤەرداریا شنگالێ ڤە ژدایكبوویە،چیرۆكا خۆ بۆ باسنیوز ڤەگەراند و دیاركر،ل رۆژا3/8/2014ێ دگەل خێزانا خۆ ل دۆریانا حەردانێ ژلایێ تیرۆرستێن داعشێ ڤە هاتینە دەستەسەركرن،ئەم نێزیكی پێنجی كەسان بووین،تیرۆرستان هەر ئێكسەر زەلام ژ مە جودا كرن و كچ و ژن ژی سواری ترومبێلان كرن و برینە تەللەعفەر،هەتا دنیا هەبت چوو جاران ئەوان دیمەنێن ب پێخواسی و چاڤێن تژی رۆندك یێن دەیك و زارۆكان ژبیر ناكەین.
دبەردەوامیا ئاخفتنا خۆ دا گۆت:تیرۆرستێن داعش ل تەللەعفەرێ ئەم برینە قوتابخانەیەكێ و پشتی بیست رۆژان پاشی ئەم برینە زیندانا بادووش ل مووسلێ، خەلكەكێ زۆر یێ ئێزدی دوێ زیندانێ دا بوون و هەموو كچ و ژن بوون،پشتی بیست رۆژان جارەكا دی هندەك چەكدارێن تیرۆرستێن داعش هاتن و هەردوو خوشكێن من زینا و خالیدا دگەل كۆمەكا كچ و ئافرەت و زارۆكان ڤەگوهاستنە تەللەعفەرێ و ل وێدەرێ بۆ ماوێ دوو مەهان ڤەگوهاستنە (كەسر ئەلمحراب).
مەنالێ دیاركر ژی دایكا من زۆر هەول ددا من و خوشكێن مە ڤەشێرت داكو چەكدارێن تیرۆرستێن داعش مە نەرەڤینن،بەلێ ئەو تیرۆرست گەلەك د پیس بوون،رۆژەكێ هندەك تیرۆرست هاتنە تەللەعفەر پشكنین دگەل مە كر و لدووڤ كچان د گەریان داكو بۆ خۆ ببەن، ل وێدەرێ من پرچا خۆ گەلەك تەڤلی هەڤ كر و جلوبەرگێن پیس كرنە بەرخۆ داكو تیرۆرست وەسا تێبگەهن ئەز یا دینم و داكو من نەرەڤینن و نەبەن،رۆژەكێ تیرۆرست هاتن داكو كچان ب خۆ ببەن، پرچا من گەلەك یا درێژ بوو، دەیكا من پرچا من كورت كر و وەكی كوركا لێ كرم و جلوبەرگێن كوركان كرنە بەر من و ب ئەڤێ چەندێ چەندین مەهان تیرۆرستێن داعشێ نكارین من ببەن.
وێ كچا رزگاربووی ئاشكەراكر،دەیكا من ناڤێ من ژ مەنالێ گهۆری بۆ ناڤێ (سامر) بۆ ماوێ نەهـ هەیڤان چەكدارێن تیرۆرستێن داعشێ نەدزانین ئەز كچم یا ژ وانڤە ئەز كورم، لێ ل داویێ چەكدارەكێ داعش بەرەف من ڤە هات و گۆتە من دزانم توو نەكوری توو كچی ئەز تە ب خۆ ببەم،ئێدی پشتی وەسا گۆتی و ئاشكەرا بوویم ژ ترسان دا گێژ بووم و كەفتمە سەر ئەردی و پاشی گەلەك ئەشكەنجەدام و گەلەك نەخۆشی و دەردەسەری ل بن دەستێن چەكدارێن تیرۆرستێن داعشێ من دیتن.
تُتاح هذه الصورة أيضا في: کوردی
