بنگەهێ‌ لالش جەژنا سەرسالێ‌ پیرۆز دكت:جەژنێن مە یێن كەڤنار پشكەك ژ ناسنامەیا رەوشەنبیری و ئاینی و نەتەوەی یە

بنگەهێ‌ لالش جەژنا سەرسالێ‌ پیرۆز دكت:جەژنێن مە یێن كەڤنار پشكەك ژ ناسنامەیا رەوشەنبیری و ئاینی و نەتەوەی یە

ب هەلكەفتا هاتنا جەژنا سەرێ‌ سالا ئێزدیان(سەرێ‌ سال_چارشەمبوویا سۆر)،جوانترین و گەرمترین پیرۆزباهیان ئارستەی تەڤایا ئێزدیان ل كوردستانێ‌ و عێراقێ‌ و جیهانێ‌ دكەین،هیڤیخوازن سالا تەناهی و ئارامی و خێر و خۆشیێ‌ بە بۆ هەموو مرۆڤایەتی و ئێزدیان ل وەلات و ژ دەرڤەی وەلاتی.
و ب هەلكەفتا ڤێ‌ جەژنێ‌ كو دبتە ئێك ژ كەڤنترین جەژنێن ئێزدیان،ئەم دووپاتێ‌ پێكڤەگرێدانا جەژنێن خۆ دكەین كو پێتڤیەكا دیرۆكی و هەڤچەرخە،ژبەركو ئەڤ جەژن خودان فەلسەفە و ناڤەرۆك و درێژەپێدانا دیرۆكی یا ئێزدیان ل خاكا وان یا كەڤنار و دێرین خویا دكە،و ئێك ژ كەڤنترین پێكهاتەیێن كو ل ڤی عەردی بنەجهبووین.
و ئەم دبینن كو ئەڤ جەژنێن مە،تایبەت جەژنا سەرێ‌ سالا ئێزدیان دبە پشكەك و ئالیەكێ‌ گرنگ ژ ناسنامەیا مە یا رەوشەنبیری و ئاینی و نەتەوەی،ئەم پشت راست دكەین هەر ئێكی بزاڤا شێواندنا بیروباوەرێن مە یێن ئاینی و ئینتیمائا نەتەوا مە یا كوردی یا رەسەن كری چارەنڤیسێ‌ وان شكەستن و بێ‌ هیڤی بوون بوویە،ژبەركو راستیا رۆن و ئاشكەرا ب دەڤێ‌ كۆمەكا كەسێن تۆز و با نائێتە ڤەشارتن.
كار و كریاران سەلماند كو ئینتیمائا مە بۆ كوردستانێ‌ وەكو خاك و مللەت ئنتیمائه‌كا سروشتی یە،و بێ‌ كوردستانا ئازاد و گەش و ئارام و بهێز ،پێشەرۆژا ئێزدیان ل رۆژهەلاتا ناڤەراستا یا دناڤ پری بوویەران دا نابە.
ژبەركو ل جەژنا سەرێ‌ سالا ئێزدیان دبت خرڤەبوونێن خێزانی و جڤاكی و جەماوەری پەیدا بن،ئەم داخوازێ‌ ژ هەموو خەلكێ‌ خۆ دكەین ل هەر جیەكی بن پێتڤیە رێنمایێن تایبەت ب بەرنگاربوونا ڤایرۆسێ‌ كۆرۆنایێ‌ ل بەرچاڤ وەرگرن و رێگریێ‌ ل بەربەلاڤبوونێ‌ بگرن،ب رێیا پێگیریكرنێ‌ ب رێكارێن ساخلەمیێ‌ یێن دئێنە دەركرن و ب هەر رەنگەگی دشیان دا بت تێكەلیێ‌ و ب تایبەت ل دەڤەرێن گرتی نەكەن.
سالا خێر و خۆشیێ‌ بە بۆ تەڤایا ئێزدیان و هەموو مرۆڤایەتیێ‌