ئەرێ ما پێشكەفتنا ئابووری د گوهارتنا جل و بەرگان دایە؟
سەردار شاكر سلێڤانەی
دبت ئەڤ بابەتە جیێ سەرسورمانێ بت بۆ زۆربەیا مە لێ ژ بابەتێن گرنگە و دڤیا بت ئەم ب هووری لێ بنێرین چنكو سەرهلدانا شۆرەشا گوهارتنا جل و بەرگان و جوانكرنا سەروسیمایی نێزیكە هندەك كەسان و ژیانا وان تێك بدەت یان ژی بارەكێ گران و كاودانێت نەخۆش یێن ئابووری بسەپینن لسەر وان،هەر دیسان ئەگەر ئەم بزڤرین بۆ هەموو ئاینێن هەین و هەموو كەسێن ئاین ناس و پێغەمبەرێن بۆری ژی هەمان تەكەز لسەر پاقژی و جوانی یا كری بەلێ دهەمان وەختدا دەست بەلاڤیا زێدە هاتیە رەتكرن و بگونەه هاتیە هژمارتن، دیسان ئەم دبینن ل زۆربەیا وەلاتێن ئەورۆپی و ب تایبەتی ژی كەسێن زانا و پرۆفیسۆر و هەتا هندەك دەولەمەندێن زێدە ژی بجل و بەرگەكێ سادە دگەرن و هەتا هندەك جاران ژی كرینا جل و بەرگێن وان ژ بازار و مولێن ئەرزان بوویە،بەلێ ب مخابنی ڤە ئەم دكارن بێژن ل وەلاتێن نەپێشكەفتی ئەوێن بتر چاڤێن وان لسەر سەر و سیمایی و جل و بەرگان دیاردا كرینا ماركان و مودیلێن ب بها سەرهلدایە و هەتا هندەك جاران ژی بوویە چاڤلێكرن و زارۆكێن هەژاران ژی ئەڤ دیاردە بكارئینایە و بووینە ئەگەر بارگرانی لسەر مال و خێزانێت خۆ پەیدا بكن،ل ڤێدەرێ ئەم نابێژن كو د ماوێ هەیڤەكێ دا یان سالەكێ دا بلا تە ئێك جلك هەبت بەلێ هەر وەكی مەزنێت كوردا گۆتی (خویێ و خویێ ژی بمەعنە) یان ژی هەرۆ بدەستەك جلان قەستا دەوام یان كاری بكەی،ئەم نابێژن كرنا جل و بەرگێن ب بها و ماركە یا باش نی نە بەلێ د وەخت و دەمێ گونجایی دا،و ئەگەر ئەم بێن و تەماشەی خەلكێ كوردستانێ بكن و ب تایبەتی تەخا گەنجان ل شوونا چاڤێ وان بمینت لسەر چاوانیا دروستكرنا جل و بەرگ و دیزاینەكا نوو و ب مفا تنێ چاڤێ وان یێ لسەر وێ چەندێ كا كەنگی جل و بەرگەك نوو دێ ئێت یان ماركەكا نوو دا لبەر بەژنا خۆ بكت و خۆ دناڤ هەڤال و دەوروبەرێن خۆ دا بینتە پێش و دیار بكت كو گەلەك كەسەكێ مودرێنە و رەوشەنبیرە و گەلەك یێ زەنگینە و ئەم دكارن بێژن نەتنێ ئەڤ كاودان بەلاڤە بۆ جل و بەرگان لێ هەتا بگرە ژ جۆرێن ترومبێل و ئامیرێن تەلەفونان ژی و هەتا هندەك جاران هندەك كەس هەبووینە قەرەكێ زێدە وەرگرتینە بۆ كرینا ئامیرەكێ تەلەفونێ تنێ دا سەرەنجا دەوروبەران رابكێشت و پاشان تووشی ئاریشەیێن دارایی یێن مەزن بووینە،ل ڤێدەرێ من دڤێت نموونەیەكێ بینم كا ئەرێ تەخا زانایان ژی ل وەلاتێن بیانی لدوڤ مودێل و جل و بەرگان دچن یان نە؟ ل سالا(2014)ێ وەختێ من دەست ب خووندنا ماستەرێ كری ل وەلاتێ بریتانیا و ئێكەم رۆژا وانێ و چۆیمە دهۆلا خووندنێ ڤە و ل هیڤیا دكتۆر و پرۆفیسۆرێ خۆ مایم من هزر كر ئەگەر مامۆستایێ من بێت چێدبت جل و بەرگێن وی و ترومبێلا وی باشترین بن و یێن وەكی وان كێم بن،بەلێ دگەل هاتنا ژۆر مامۆستا و پرۆفیسۆرێ مە كولاڤێ پایسكلێ خۆ ژبەر خۆ كر و دانا سەر مێزێ هەروەسان قاپووتێ خۆ ژی ئێخست ب هەمان شێوە و ب جلەكێ گەلەك سادە و نۆرمال دەركەت هەروەكی دێ بێژێ ئەڤی مامۆستایی جل و بەرگێن خۆ یێن ژ بازارێن دەستێ دوویێ كرین و هیچ نیشانەكێ دیار نەكر كو ئەڤە ماركەكا گران بەهایە،بۆ من سەیر نەبوو ئەڤ كاودان چنكو من زانی ئەو خودانێ هندەك هزر و بیرێن مەزن و نموونەیە و ئەو بتر مژوولی ئاڤاكرنا مێشكێ خۆ و دەوروبەرێ خۆ یە و چاڤێ وی لسەر سەر و سیمایێ وی نی نە،بەلێ تشتێ سەیر و سەرەنج راكێش بۆ من ئەو بوو كو ئێكسەر من هزرا هندەك رێڤەبەر و فەرمانبەر و كەسێن نۆرمال ل كوردستانێ كر وەختێ قات دبێژتن قاتی وێڤە هەرە و وەختێ بێهنا ئاڤا گولا بەرپرسێ مە هەتا سێ یان چار رۆژان سەرێ مە بەرنەدەتن و ئەم تنێ ب بەژن و بالا خۆڤە مژوول و جدی نە و ئەم خودانێ مێشكەكێ لاواز و ڤالانە و چ داهێنان و پێشڤەچۆن بۆ مە خەم نی نە،لێ هەر چنەبت ئەگەر مە خۆ ژی نەڤێت دڤێت ئەم باش هزر ل زارۆك و گەنجێت خۆ یێت بێت بكن و ل شوونا ئەم وان بكن بار گرانی بۆ حكومەت و كۆمەلگەهێ و ل شوونا تنێ هزرا وی سەر و سیما و جلكێت وی بن ئەم هاندانا وی بكن بۆ گەنجەكێ دەست گرتی و بتر هزرا وی گەشەكرن و پێشكەفتنا كوردستانێ بت چ ژلایێ ئابووری یان ژی ژلایێ داهێنانان ڤە و ببت كەسەك داهاتێ وەلاتێن دی ژی بۆ وەلاتێ مە بكێشت و نە تنێ هەر دراڤێ مە هەی بەرەف وەلاتێن بیانی ڤە ببەت بكرینا جل و بەرگ و تشتێن بیانی و یێن بێ بنەما.
تُتاح هذه الصورة أيضا في: کوردی
