نێچیرڤان بارزانی پێشوازی ل جێگرێ سەرۆکێ ئەمریکا کر
WAAR-دهۆك:
جێگرێ سەرۆکێ ئەمریکا سەرەدانا ھەولێرێ کر و ژ ئالیێ سەرۆکێ ھەرێما کوردستانێ ڤە پێشوازی لێ ھات کرن و پشتەڤانییا وەلاتێ خوە بۆ ھەرێما کوردستانێ دوپات کر.
جێگرێ سەرۆکێ ئەمریکا مایک پێنس د سەرەدانەکا نەچاڤەرێکری دا سەرەدانا ھەولێرێ کر و ژ ئالیێ سەرۆکێ ھەرێمێ نێچیرڤان بارزانی و سەرۆکێ جڤاتا وەزیرێن ھەرێمێ مەسروور بارزانی و جێگرێ جڤاتا وەزیران و ژمارەیەکا کاربەدەستێن ھەرێمێ ڤە پێشوازی لێ ھات کرن.
د وێ ھەڤدیتنێ دا نێچیرڤان بارزانی، رۆلێ ھێزێن ئەمریکا د شەرێ دژی داعشێ دا بلند نرخاند و گۆت: سەرەدانا پێنسی دڤی دەمی دا نیشانا پشتەڤانیێ یە ل ھەرێما کوردستانێ و ئیراقێ و ھەروەسا داخواز کر پەیوەندیێن ھەولێر و واشنتۆنێ بەرەڤ پێش بچن.
ژ ئالیێ خوەڤە جێگرێ سەرۆکێ ئەمریکا، پشتەڤانییا وەلاتێ خوە بۆ ھەرێما کوردستانێ وەک ھەڤپەیمانەکا ئەمریکا د چارچووڤێ ئیراقێ دا دوپات کر و گۆت: ب ئازایەتییا ھێزێن پێشمەرگە و ئەمریکا داعش ھاتە ژناڤبرن و ھەروەسا دلخوەشییا خوە ب پێشڤەچوونا پەیوەندیێن ھەولێر و بەغدایێ بۆ چارەکرنا کێشەیان نیشان دا.
ل گۆرەی ئاژانسا رۆیتەرزێ، پێنس د چوارچۆڤەیێ سەرەدانا خوە دا سەرەدانا ھێزێن ئەمریکی یێن ل سەربازگەھا عەین ئەسەد یا پارێزگەھا ئەنبارێ کر و ب رێیا تلەفۆنێ ژی ل گەل سەرۆکێ وەزیرێن ئیراقێ عادل عەبدولمەھدی ئاخفت و دلگرانییا ئەمریکایێ ژ زێدەبوونا دەستھەلاتا ئیرانێ ل ئیراقێ گەھاندێ.
تُتاح هذه الصورة أيضا في: کوردی
