مه‌سروور بارزانی داخوازا هاریكاریكرنا ئاواره‌یان ژ جڤاكا نێڤده‌وله‌تی كر
WAAR-دهۆك:
سه‌رۆكوه‌زیرێ هه‌رێما كوردستانێ ئه‌ڤرۆ ژ بۆ هایداربوونێ ل سه‌ر ره‌وشا كه‌مپێ و پێدڤیێن ئاواره‌یان، سه‌ره‌دانا كه‌مپا به‌رده‌ره‌ش یا ئاواره‌یێن رۆژئاڤایێ كوردستانێ كر.
مه‌سروور بارزانی، سه‌رۆكوه‌زیرێ هه‌رێما كوردستانێ د گه‌ل رێبه‌ر ئه‌حمه‌د، وه‌زیرێ ناڤخوه یێ حكومه‌تا هه‌رێمێ و فه‌رهاد ئه‌ترووشی، پارێزگه‌رێ دهۆكێ، سه‌ره‌دانا كه‌مپا به‌رده‌ره‌ش یا ئاواره‌یێن رۆژئاڤایێ كوردستانێ كر، کو ئارمانج ژێ هایداربوون بوو ل سه‌ر ره‌وشا كه‌مپێ و پێدڤییێن ئاواره‌یان.
مه‌سروور بارزانی و شاندا د گه‌ل دا ل ده‌ستپێكێ د گه‌ل ئیداره‌یا كه‌مپێ دا كۆم بوو كو ژ ئالییێ ده‌زگه‌هێ خێرخوازی یێ بارزانی ڤه دهێت برێڤه‌برن و ئیداره‌یا كه‌مپێ، رۆهنكرن ل سه‌ر هه‌ژمارا ئاواره و پێدڤییێن وان ژ بۆ سه‌رۆكێ وه‌زیران دان.
د په‌یڤه‌كێ دا سه‌رۆكوه‌زیر بارزانى راگه‌هاند: نها ملیۆنه‌ك و 100 هزار ئاواره ل هه‌رێما كوردستانێ نه و سالانه ملیاره‌ك و 500 هزار دۆلار ل پێدڤییێن وان دهێنه خه‌رجكرن، حكومه‌تا هه‌رێما كوردستانێ ژی خه‌مساری نه‌كرییه و هه‌ر چ یا د شیان دا بیت ژ بۆ ئاواره‌یان كرییه.
مه‌سروور بارزانی داخواز ژ جڤاكا نێڤده‌وله‌تی ژى كر، هاریكارییێن وان بۆ ئاواره‌یێن ل هه‌رێما كوردستانێ به‌رده‌وام بن.
تُتاح هذه الصورة أيضا في: کوردی
