پەیڤا باران د كەلەپۆرێ شنگالێ دا
حەیدەر عەرەبۆ یوسڤانی
دیرۆك بۆ مە دیار دكت هەر ژ كەڤندا ل چیایێ شنگالێ باران بتر ل دەشتێ دئێت و خەلكێ شنگالێ ژیانەكا زۆر زەحمەت ل ڤی وەرزێ زڤستانێ سالێ دیتیە و ژیانا خۆ پاراستینە ڵ شكەفت و نقولێن چیا دا و ژیاینە،ژبەر سەرمایا دژوار وهەر باران بوویە هەڤالەكی بەردەوام بۆ ئاكنجیێن چیایی و گیانێ وان پاراستیە،هەروەسا باران بوویە ژێدەرێ ژیانا وان وئاڤا بارانێ بخۆ هلگرتینە دهندەك جیێن كور دا دبێژنێ (چال) هەتا هاڤینێ و ئەو ئاڤا بارانێ و بەفرێ مایە وەرزێ هاڤینێ،پەیڤا باران و بەڤر گەلەك وا دكەلەپۆرێ شنگالێ دا هاتیە مینا چیرۆكا و یاریا زارۆكا و سترانا و گۆتنێن مەزنان دا،دناڤ ئێزدیان دا مەحما رەشان ب خودانێ بارانێ دئێتە ناسكرن و سالا كو باران كێم ببارت خەلك هیڤی و دوعایان دكن و خۆ دهاڤێژنە مەحما رەشان داكو ژ كەرەما خوەدی بارانێ ببارینت و هەكە باران شەڤ و رۆژەكێ ل پێ ئێك ببارت دێ بێژن پلە كەفت و هندەك سالا پلە دەرەنگ دكەفت،هندەك یاریێن زارۆكا ژی دناڤ خەلكێ شنگال دا هەنە تایبەت ب كێم نەهاتنا بارانێ ڤە ئەو ژی یاریا قردكی قردۆش كو دێ هندەك زارۆك گەهنە ئێك و قردكەكی چێكن و دێ ل ناڤ گوندی گەرینن مال ب مال،ب مەرەما باران بارینێ ودێ كابانیا مالێ تشتا دەتێ و دێ هندەك ئاڤێ پێدا كت و ئەو زارۆك ژی دێ سترانا قردەك بێژن:
قردكێ قردۆش
سیتل و پەرۆش
مەحما رەشان ببارینێ
كادینا كایێ هلوەشینێ
پایا قردك ڤردە بینێ
و هەكە جۆتیار گەنمێ خۆ بچینت و باران كێم ببارت دێ زارۆك چنە ناڤ زەڤیێ و سترانا ل خوارێ بێژن:
بارانێ ببار ببار
چوچكە گەنمێ تە خوار
تالیا مایی قدكە خوار
باران ل گۆتنێن مەزنان دا:
_چی رۆژ بارانە، ئەو رۆژ زڤستانە
_باران هات و قەلشێن بانا قەشرین
_تەشنشێت بارانێ بانە و یێت مرنێ تانە
_ باران هات ب شری گویی بێ دەولەتێ هوری،یان بای و باران زووتێ،بێ فەلەكا گۆتی
تُتاح هذه الصورة أيضا في: کوردی
