نەرێنیێت ئالاڤێن تۆرێن جڤاكی
خالد خدر 
تۆرێن جڤاكی كۆنترۆل لسەر ژیانا مەكرینە ب تایبەتی و ب رەنگەكی بەرفرەه و بووینە بەشەكی گرنگ ژكەلتۆرێ مە یێ رۆژانە ،بەلكو رەوشت و سرووشتێ مە تا رادەكی بەرچاڤ گهۆری یە،بێگومان كارتێكرنێن وێ تاك و خێزان وجڤاك دەرباس كرینە و گەهشتیە چارچۆڤێت جیێن كاری ،و بزاڤا راگەهاندنێ وشێوازێ هەڤركیا سیاسی و گەهشتن بۆ ناڤ پەیوەندیێن وەلاتان ب هەموو جوبار و گرێن خۆڤە،ئەڤ دیاردا هەنێ هەتا نهۆ یە تازەیە ب شێوەكی رێژەیی و نەهاتیە دیاركرن ب وی رەنگێ خۆ یێ پێشكەفتی یێ كو پێ هاتی ناسین ل نهۆ دا ،كو ل داویا سالێن نۆتان ژ چەرخێ بیستێ و ل دەستپێكا چەرخێ نهۆ پێشكەفتنەكا بەرچاڤ ب خۆڤە گرتیە،ماسنجر ل سالا(1999)هات و فەیسبووك ل سالا(2004)هات و یوتیوب ل سالا(2005)هات،ل پێرا تویتەر ل سالا(2006)گەهشتیە بەردەست كو ئەڤە بۆ نموونە نەكو بۆ هژمارتنێ .بێگومان وەك هەر ئالاڤەكی دی یێ راگەهاندنێ تۆرێن جڤاكی ژی (سوشیال میدیا ) ئەرێنی و نەرێنیێت خۆ هەنە ،بەلێ نەرێنیێت وان پترن ب تایبەتی تویتەر كو ب شێوەكی بەرچاڤ دئێتە بكارئینان و لسەر ئاستێن سیاسی یێن بلند و نهۆ هۆسا تێتە ناسین ب ((سیاسەتا تویتەر )) و بوویە دیاردەكا ترسناك لسەر ئاستێ پەیوەندیێن وەلاتان و لسەر ئاشتیا كۆمەلگەهێ و جێگیربوونا ئاسایش و سیاسەتێ،هەروەسا نهۆ ئالاڤێن راگەهاندنێ گرنگیەكا مەزن ددەنە تویتەری و بخۆ كرینە بابەتەكی گەرم و بالكێش ، ل وەلاتێ بریتانیا گۆتگۆتكەك هەبوویە كو پێكۆل هاتبوونە كرن كارتێكرنێ لسەر راپرسیا دەركەفتنێ ژ ئێكەتیا ئەورۆپی بكت،هەروەسا ل ئەلمانیا و فەرەنسا و هندەك وەلاتێن دی یێن ئەورۆپی،داخویانی هەبوون كو پێكۆل هاتبوونە كرن داكو كارتێكرنێ بكن ل پرۆسێن هەلبژارتنان ل وان وەلاتان ب رێیا تۆرێن جڤاكی،كو هندەك وەلاتێن دی ژی گۆمان ژ هندەك وەلاتان برن ب مایتێكرنێ ژ هەولدانێن وان ژبۆ كارتێكرنێ لسەر رایا گشتی و پرۆسێن هەلبژارتنان ل وەلاتێن وان دا ب رێیا بەخشكرنا دەنگوباسێن نەدروست و پرۆپاكندان و بەلاڤكرنا هندەك چیرۆكا و ریكلاما لسەر ئالاڤێن تۆرێن جڤاكی،ڤەگوهاستنا چیرۆكێن نە دروست و بەلاڤكرنا گۆتگۆتكان ژی بوویە ئاریشەكا مەزن و ترسناك لسەر پەیوەندیێن وەلاتان ولسەر ئاشتیا كۆمەلگەهێ كو گەفان ل تەناهی وئاسایشێ دكەتن،هندەك جاران ب مخابنی ڤە خەلك هندەك بابەت و دەنگوباسا بەلاڤە دكەتن دناڤ جڤاكی دا بێ بەلگە و زانینا ژێدەرێ وی یێ راستەقینە،ئەڤ بابەتێن هەنێ ژئالیێ خەلكی ڤە تێنە بەلاڤكرن ب شێوەكی بەرچاڤ و بەرفرەه و لسەر ئالاڤێن تۆرێن جڤاكی،بێگومان ئەڤ پرسا هەنێ پرسەكا مەترسیدارە لسەر جڤاكی بخۆ بەری هەر تشتەكی،و دەركەكرنا هەڤركیێن مەزن لدۆر چاوانیا بەرسنگرتنا ڤی شەرێ نوو یێ وەلاتێن دەرڤە ودەزگایێن هەوالگێری ئالاڤێن تۆرێن جڤاكی بكاردئینن داكو كارتێكرنێ ل رایا گشتی بكن،دیسا دبێژین خەلكەكی سادە وكێم شارەزایی دڤی بیاڤی دا پشكداریێ تیدا دكەتن ل دەمێ تێنە پالدان بێ هشیاری ژبۆ بەلاڤكرنا چیرۆك و دەنگوباس و سەرهاتیا بێ هیچ بەلگە و لێگەریان ل ژێدەرێ وان ،ئەڤ بابەتە زۆر یێ هەستیارە و پێتڤی دانوستاندنەكا كوورە،ژبەركو پرسیارێن زۆر لپێ خۆ دئینە لدۆر چاوانیا رێكخستن و دسپلینكرنا ئالاڤێن تۆرێن جڤاكی و یێ ئەڤ بەرپرسیاری یە دكەڤە سەر ملێ وی، و رۆلێ تاك و دەستەلاتان و دەستنیشانكرنا ئازادی و دسپلینا وێ ل بۆشایا ئنترنێتێ.
تُتاح هذه الصورة أيضا في: کوردی
