بنگەهێ لالش پتری 67 دەمژمێرێن دكیۆمێنتكرنا كارەساتا شنگالێ گەهاندینە جهێن بەرپرسیار
تۆرا لالش یا راگەهاندنێ
بەرپرسێ لژنا رەوشەنبیری و ئەندامێ دەستەیا بلندا بنگەهێ لالش ل دهۆكێ(شەمۆ قاسم)بۆ رۆژناما دەنگێ لالش راگەهاند،بنگەهی پتر ژ (67) دەمژمێرێن دكیۆمێنتێ گەهاندینە لژنا بلندا جینۆساید ناساندنا كارەساتا شنگالێ ل هەرێما كوردستانێ و دادگەها تاوانێن نێڤ دەولەتی ل لاهای،ئاماژەكر ژی كو 23 بەیانناما ل دۆر كارەساتێ هاتینە دەرێخستن،هەروەسا پەرتووكەك هاتیە چاپكرن و تشتێن گرنگ و دكیۆمێنتێن نوو تێدا هەینە.
ل دۆر رۆلێ بنگەهی دكارەساتا شنگالێ دا(شەمۆ قاسم)دیاركر،ل دەمێ كارەساتا شنگالێ روودایی، بنگەه رابوو ب دروستكرنا 36لژنێن كاری ژبۆ گەهاندنا خزمەتكاریێن بلەز بۆ ئاواران،ژوان خزمەتان دابینكرنا ئاڤێ و خوارنێ و ئامادەكرنا جهێ ئاكنجیبوونێ و لژنا نڤیسینا ناڤان و وەرگرتنا هاریكارییان ژ وەلاتیان و زۆربەیا هەڤالێن بنگەهی خۆبەخشانە بۆ ڤی كاری هاتنە پێش وەك مامۆستا و گەنج و وەلاتیان پێشوازیا ئاواران كرن،كو بكارێ ب جیكرنا سەدان خێزانان ل بارەگایێ دەستەیا بلند و هۆلێن لالش ل دەڤەرێن خانكێ و شاریا و باعەدرێ و شێخان و دێرەبوونێ رابوون و رۆژانە خوارن بۆ وان دابین دكرن هەتا ل كەمپان هاتین ئاكنجیكرن،هەروەسا لژنە ل تایێن بنگەهی ژی بۆ پێشوازیكرنا ئاواران هاتنە دروستكرن،زێدەباری پەیداكرنا پەیوەندیێن بلەز لگەل رێكخراوێن جڤاكێ سڤیل و فەرمانگەهێن حكوومی یێن پەیوەندیدار ژبۆ دابینكرنا پێتڤیێن بلەز بۆ ئاواران،دیسان بەلاڤكرنا ب دەهان تەنێن خوارنێ و جلكا یێن رێكخراوێن خێرخواز ل سەر ئاواران و هاریكاریێن دراڤی یێن رێكخراوا خاچا سۆر ل سەر ئاوارەیێن بێ كەس وكار و ئێتیم.
دەربارەی دكیۆمێنتكرنا كارەساتێ بەرپرسێ لژنا رەوشەنبیری گۆت:بنگەهی ب ڤیدیۆ و وێنا كارەسات دكێۆمێنتكریە و پتر ژ (67) دەمژمێرێن دكیۆمێنتێ گەهاندینە جهێن پەیوەندیدار وەك لژنا بلندا جینۆساید ناساندنا كارەساتا شنگالێ ل هەرێما كوردستانێ و دادگەها تاوانێن نێڤ دەولەتی ل لاهای ل هۆلەندا و رێكخراو و جهێن پەیوەندیدار یێن ب كارێ كۆمكرنێ رابووین،لگەل پشتەڤانیكرنا مادی بۆ ب دەهان كەسانێن فلم و كلیپ ل سەر كارەساتێ چێكرین و ئامادە دكن ،مە پێزانین بۆ جهێن شۆلەژێ ل سەر ژمارا ئاواران د كەمپان و كاڤلان دا كۆمكرن و پشكداری دسمینار و كۆرێن ڤەكری ل دۆر جینۆسایدا شنگال ل هندور و ژ دەرڤەی هەرێمێ دا كریە.
سەبارەت داگیركرنا شنگالێ ژلایێ تیرۆرستێن داعشێ ڤە(شەمۆ قاسم)دبێژت:ژ دەستەیا بلند و تایی و نڤیسینگەهان 23 بەیانناما ل دۆر روودانێن ب كارەساتێ ڤە گرێدایی هاتنە دەرێخستن و مە پشكداری دخرڤەبوونێن نەرازیبونێدا كریە ل دژی كریارێن هۆڤانە یێن تیرۆرستێن داعش پێ رابووین ل شنگالێ پشتی هاتیە داگیركرن،ل هۆلا دەستەیا بلند بیرەوەریا ئێكێ یا دل تەزین یا كارەساتێ كو پتریا تایی و نڤیسینگەه ژی پێ رابوون و بیرەوەریا دل تەزینا گوندێ كۆچۆ ساخكرن.
ناڤبری ئەو چەندە ژی خویاكر،بنگەهی سەرەدانا كەمپێن ئاواران ل سەرانسەری پارێزگەها دهۆكێ كریە و هاریكاری پێشكێشی خێزانێن هەژار و ژنێن ژ دەستێ داعش رزگاربووین كرینە،پرۆژێ چاندنا زەرزەواتا ژی بۆ ئاواران ل كۆمەلگەها خانكێ ڤەكریە و ئارمانج ژێ پەیداكرنا دەلیڤێن كاری بوو بۆ 1800كەسان.
ژلایەكێ دیڤە (شەمۆ قاسم) دیاركر،بنگەهی ب دەهان سمینار و گۆتار دناڤ ئاواران دا پێشكێشكرینە و پەرتووكەك ل دۆر كارەساتا شنگالێ چاپكریە كو پتر ژ 600 لاپەرایە و تشتێن گرنگ و دكیۆمێنتێن نوو تێدا هەینە،هەروەسا رۆژناما دەنگێ لالش هەر ژ دەما كارەسات چێبوویی هەموو ژمارێن خۆ تەرخانكرن بۆ ڤەگۆهاستنا دەرد و داخوازیێن ئاواران و ژمارەكا تایبەت ژ گۆڤارا لالش ل دۆر كارەساتێ هاتە دەرێخستن.
ئەندامێ بنگەهێ لالش ئاماژەكر،بنگەهی چەندین ۆرووك شۆپ و خۆلێن فێركرنا كاری ب هەماهنگی لگەل رێكخراوێن مافێ مرۆڤی ویوئێن و رێكخراوێن نێڤ دەولەتی بۆ ئافرەتێن ئاوارە ڤەكرینە،ژبۆ ب دەستڤە ئینانا دەلیڤێن كاری،دگەل ڤەكرنا چەندین سەنتەرێن چارەسەریێ و28 خۆلێن فێركرنا زمانێ ئینگلیزیێ و كۆمپیۆتەری دناڤ كەمپان دا.
تُتاح هذه الصورة أيضا في: کوردی
