عێراق بەھرا ھەرێمێ ژ قەرێ سندۆقا نێڤدەولەتی نادەت
ئەڤرۆ نیوز:
بڕیارە ل دووماھیا ڤێ ھەیڤێ پشکەک ژ قەڕێ سندۆقا نێڤدەولەتی بگەھیتە عێراقێ و پەرلەمانتارەکێ کورد ژی دبێژیت: ئەم بێ ھیڤی بووینە و عێراق ب چو شێوەیەکی بەھرا ھەرێما کوردستانێ ژ ڤی قەڕی نادەت.
سەرحان سلێڤانەیی، پەرلەمانتارێ کورد ل پەرلەمانێ عێراقێ بۆ رۆژناما ئەڤرۆ گۆت: “ھەر قەڕەک یان سولفەیەک ب ھەر ناڤەکی بۆ عێراقێ بھێت بەھرا ھەرێما کوردستانێ ژی تێدایە، ل گۆرەی دستوور و قانوونێ ھاتیە دیارکرن، بەلێ جھێ داخێ یە حوکمەتا عیراقێ دستووری و قانوونێ بجە نائینیت، لەوڕا ب دیتنا من ئەڤ قەڕێ کو بڕیارە سندۆقا نێڤدەولەتی بدەتە عێراقێ، پێنج ملیار و 400 ملیۆن دۆلاران دڤێت بۆ ھەرێما کوردستانێ بیت، لێ مخابن حوکمەتا عێراقێ ئەڤی پارەی نادەتە ھەرێما کوردستانێ”.
ناڤھاتی گۆتژی: “عەلی عەلاق، پارێزگارێ بانکا ناڤەندیا عیراقێ بەری نوکە ڕاگەھاندیە، بەھرا ھەرێما کوردستانێ د ناڤا بودجا گشتی یا سالا 2016 دایە و ئەڤ قەڕە وەکی ھاریکارییە، لەو ھەرێمێ ڤەناگریت”.
سلێڤانەیی ئاماژە ب وێ چەندێ ژی کر، ئەو گەھشتینە وێ باوەریێ سەدێ سەد عێراق ژ ئەڤی قەڕی بەھرا ھەرێما کوردستانێ نادەت و گۆت: “ئەڤە دو سالە ب ھەموو شیانێن خوە ئەم بزاڤان دکەین بەھرا ھەرێمێ ژ بودجا سالا بۆری و ئەڤ سالە بدەت، لێ عیێراق نادەت، ئەگەر عێراق بودجەی نەدەت دێ چاوا قەڕی دەتە ھەرێما وردستانێ”.
لدۆر مەرجێ کوردان بۆ ڤەگەڕیانا کۆمبوونێن پەرلەمانی بەغدا ھەمبەر دانا قەڕێ بەھرا ھەرێما کوردستانێ سەرحانی گۆت: “ئەز ئاگەھداری ڤی مەرجی نینم، پەرلەمانتارێن کورد ھەمبەر ڤەگەڕیانا بۆ پەرلەمانێ عێراقێ عەبادی سۆزا ھنارتنا قەڕی بۆ ھەرێما کوردستانێ دابیت”
تُتاح هذه الصورة أيضا في: کوردی
