مۆركرن د ئێزدیاتیێ دا
مەهدی حەسەن
رێ هەبوو مەعریفەتە
ئیمان هەبوو تەریقەتە
ئەوێ رۆژێ كانیا سپی بۆ مێرا كربوو قوبلەتا
لدووڤ بیروباوەرێن ئێزدیاتیێ هەر مرۆڤەكێ ئێزدی چ كور یان كچ بت دڤێت بێتە مۆركرن ،ژبەركو مۆركرن فەرزەكە ژ فەرزێن تەریقەتێ،لەوما هەر كەسەك دڤێت بێتە مۆركرن ل بەر كانیا سپی ل پەرستگەها لالش و ب ئاڤا كانیا سپی بێتە مۆركرن ب دەستێ مجێورێن بەر كانیا سپی و سەرێ وی زارۆكی دگەل دەست و لنگان ب ئاڤا كانیا سپی مۆركەت و دەستێ خۆ دانێتە سەر سەری و دوعایا مۆركرنێ بێژت وەكی ل ڤان هەر دوو سەبەقێن دوعایا مۆركرنێ دبێژت:
مۆر مۆرا مێرانە
كانیا سپی خۆش نیشانە
پەدشای ژێ دابوو بەیانە
جیێ ئێزدینە میر و هەر چار برانە.
مۆرا كانیا سپی یە
مێر هاتن و مەدەهـ ژێ داییە
ئەو جیێ پەدشێ من بخۆ یە.
دگەل ب داوای هاتنا دوعایێ د باوەریا مە ئێزدیان دا ئەڤ كەس هاتە حەلالكرن و بوو ئێزدیەكێ دروست دڤێت ب ئەركێن خۆ یێن ئۆلی ڕابت و فەرزێن خۆ یێن حەقیقەتێ و تەریقەتێ جێبەجێ كەت دەمێ مەزن دبت،هەروەسا دەیك و باب دگەل كەس و كارێن وی ل وی دەمێ دئێتە مۆركرن د هلهلینن و شریناهیان دهلاڤێژن و گۆڤەندێ ل بەر دەرێ كانیا سپی دكن و زادەكی ب خێرا شیخادی چێدكەن و شریناهیان ل سەر گوندی و جیرانان بەلاڤ دكن كو رامان ژێ ئەڤ زارۆكە هاتیە مۆركرن.
مۆركرن ئەركەكێ ئۆلی یە ل سەر دەیك و بابا پێتڤیە زارۆكێن خۆ مۆركەن ل هەر جیەكی بن،ژبەركو هندەك كەسان ئەو دەلیڤە نینە بێنە پەرستگەها پیرۆزا لالش و زارۆكێن خۆ مۆركەن د ئێزدیاتیێ دا رێك یا دای ب ڤان هەر سێ جۆران دروستە:
1_ فەرە هەر كەسەك زارۆكێن خۆ ل پەرستگەها لالش ل بەر كانیا سپی و ب ئاڤا كانیێ مۆركەت.
2_ دەمێ تاووس د گەریێت ل ناڤ مللەتی و هەر جیەكێ بچنێ قەوال ب دەنگەكێ بلند بانگ د دەت “وەرن ئاڤا كانیا سپی ڤەخۆن هەر كەسێ نە یێ مۆركری بلا ڤەخۆت”، هەر كەسێ ژ وی شێرپكی ئاڤێ ڤەخۆت یان ژی دەمێ قەوال دگەریێت مال ب مال و ئاڤا شێرپكی سەر ب هەموو ئەندامێن خێزانێ ڤەدكەت كو دیسان دئێتە مۆركرن و حەلالكرن هەر كەسێ ژ ڤی شێرپكی ئاڤێ ڤەخۆت، ژبەركو بتریا ئێزدیان د بژكینە و هەر كۆمەك ل وەلاتەكی هەنە ئەڤ جار بۆ مۆركرنا زارۆكێن وان شیخادی دەستور دایە ئەڤ كەسێن دوور و نقارن خۆ ب گەهینن لالشێ ل دەمێ گەریانا تاووسێ دروستە هەر كەس زارۆكێن خۆ ب ئاڤا شێرپكێ كانیا سپی مۆركەت.
3_ كەسێ نەگەهت و دەلیڤە بۆرا چێنەبت بێتە لالش و ب ئاڤا كانیا سپی زارۆكێن خۆ مۆركەت یان ئاڤا شێرپكێ تاووسێ نەگەهتە مالا وان و تاووس نەگەهتە جیێ ئەو لێ دكارت ب ئاڤا خوناڤێ ل رۆژا چارشەمبوویا سەرێ نیسانێ ل سەرسالێ دەست و چاڤێن وی زارۆكی ب شۆت و دوعایەكێ بكت و ب دەستوری خودێ ئەو كەس دئێتە مۆركرن و حەلالكرن هەتا رۆژەكێ خۆ ب گەهینتە لالشێ و ل وێدەر بێتە مۆركرن.
تُتاح هذه الصورة أيضا في: کوردی
