ئاستەنگێن گەنجان
سەگڤان شنگالی
گەنج تەخەكا هەرە گرنگ یا جڤاكی یە، ب رێژەیێن جودا جودا هەموو جڤاكان گەنج هەنە و گەنج دكارن ببنە ستوونا ئاڤاكرنا وەلاتی و رێڤەبرنێ ل پاشەرۆژێ ژبەركو ئەو گەنجە هێڤێنە ژبۆ ئایندەی.
جڤاكێ پێشكەفتی ب رێژەكا هەرە مەزن گرنگیێ ب گەنجان ددەن و ب سازیێن گرێدایی گەنجان بەردەوام پشتەڤانیێ ل وان دكن، بەلێ بەروڤاژی جڤاكێن پاشكەفتی چ گرنگیا زێدە ب گەنجان نادەن و بەروڤاژی كۆمەلگەهـ و سازیێن سیاسی و رێڤەبرنێ دبنە ئاستەنگ ل بەر شیان و بەهرە و ئارمانجێن وان،و هەتا گەلەك جاران ژی بزاڤێن ژناڤبرنا وان بەهرە و ئارمانجا ددەن،دەرئەنجام ژی گەلەك گەنج هەبووینە دناڤ ڤان كۆمەلگەها دا خەون و هیڤیێن وی/وان نەهاتینە ب جهـ ئینان و بەهرەیێن وی/وان هاتینە سەكناندن و بەری بێنە جێبەجێكرن بن ئاخبووینە، ئەڤە دبتە دەستپێك و بنەرەتێ ئاستەنگ و دیواران بەرامبەر گەنجان كو ب سەدان گەنج ب دەست ڤێ نەخۆشیێ بنالن.
ئەم دكارن وان ئاستەنگا دڤان خالان دا دیار بكن:
1_گرنگی پێ نائێتەدان ژلایێ سازیێن بەرپرس و رێڤەبرنێ یێن حكومی ڤە، ئەڤ گەنجە
هزر دكت ل وەلاتەكی دا دژیت و هەر یێ بتنێ یە و ئالیەكێ بەرپرسیار یێ پایە بلند نینە
ب دەستێ وی بگرت ژبۆ بجهـئینانا خەونێن وی و گەهشتن ب ئارمانجا،چنكو وەكە ئەم
دزانن گەنج و رێڤەبرن ب هەڤرە ببن یەك و پشتەڤان دێ كاربن گەلەك كارێن ئەرێنی و باش د خزمەتا وەلات و جڤاكێ خۆ را ئەنجام بدەن،دەرئەنجامێ گەلەك جارا ئەو گەنج خەون و ئارمانجێن خۆ ژ دەست ددەت یان بەرەف وەلاتەكێ دی دچت كو خۆ ل شیان و بەهرەیێن وی بكەنە خودان، ئەڤ ژی دەرئەنجامێ نەباش ل پێ خۆ دئینت ل پێشەرۆژێ ژبەركو ئەگەرێ ڤالابوونا وەلاتی ژ گەنجان یێ دروست بت.
2_ئاستەنگێن ژلایێ جڤاكی ڤە دئێنە پێشیێ،ئەم گۆتنەكا شارلی شاپلن ل بیر بینن دبێژت(هەكە خەلكێ باژێری هەموو سەقەت بن یێ ب وی كەنن یێ درست دمەشت)،ئەڤ ژی وەسا ل گەنجا دكت ژ خەون و ئارمانجێن خۆ بێ هیڤی ببن، شیان و بەهرەیێن خۆ بكارنەئینن ژبەركو ئەگەرێ رەشبینی و بزاڤێن شكاندنا وان گەنجا ڤێجا چ دایك و باب بن یان هەڤال یان جڤاك ب گشتی بت،ژبەركو وەكو ئەم دزانن جڤاك و تایبەت جڤاكێن گرتی و پاشكەفتی دبنە ئاستەنگ ل پێشیا گەنجان و بەردەوام ب هەر شێوەكی هەبت بزاڤێن ژناڤبرنا بەهرە و ئارمانجێن وان ددەن،ئەڤ چەندە بتر كارتێكرنێ ل سەر گەنجێ رەگەزێ مێ دكت و چ جار یان گەلەك ب كێمی ناهێلن كچ و ژن ژ رێیا وان داب و نەریت و بەهایێن جڤاكی دەركەڤن و ژ دەرڤەی ئەڤی بازنەی گاڤەكێ پاڤێژن ژبەركو ئەو ڤان ئارمانج و هیڤی و ئازادیا ب سەرپێچی و ژ رێ دەركەتن لسەر ژیانا خۆ دبینن و هەتا داویێ.
ب كورتی دەرئەنجامێ وان دبتە ئەگەر جڤاكەكا نەساخلەم و نەئاڤاكری و بالادەست ژلایێ مەزنا ڤە چێببت و هەر دیاردێن خراب و نەپێشكەفتی دناڤدا هەبن.
تُتاح هذه الصورة أيضا في: کوردی
