كوردێن خومالی!!
شيرزاد نايف
كوردێن ئێزدی ل ده‌ف كوردستانێ و كوردستانیان وه‌كو زارۆیه‌كێ نازاندی یه، هه‌ر ژ ده‌سپێكا رۆژا ئۆبدێتكرنا كورداتیێ كو پشتی سه‌رهلدانا سالێن نوتان سه‌رۆكێ كوردستانێ شوونتبله‌كا دیرۆكی تۆماركر د ناڤ گۆتارا خوه دا و ئه‌و گۆتن هه‌تا ئه‌ڤرۆ بوویه ماركه‌ما تۆماركری ل سه‌رانسه‌ری كوردستانێ ده‌مێ گۆتی: ئێزدی كوردێن ره‌سنن و چو كورد نینه هه‌كه ئێزدی كورد نه‌بن… ئه‌ڤه گۆتنه بوو جهێ خۆشحالیا هه‌ر كورده‌كی و هه‌ر ئێزدیه‌كی ل سه‌رانسه‌ری جیهانێ، به‌لێ ئه‌ڤرۆ گه‌له‌ك پیڤه‌ر یێن دهێنه گوهارتن، نه‌خاسه پشتی وێ پیلانا مه‌زنا و دژوار یا ل سه‌ر ملله‌تێ مه كه‌فتیه هۆلێ، ئه‌و مه‌رگه‌ساتێن ب سه‌رێ خه‌لكێ مه ئینایین، ب تایبه‌ت و ل ده‌سپێكێ ئێزدیێن شنگالێ. دووماهی تشتێ بۆ مه بوویه جهێ حێبه‌تیێ ئه‌و بوو كو میرێ وان گۆتیه سه‌رۆكاتیێ مه بدانن وه‌كو وه‌لاتیێن پله دو، چونكو ئه‌م یێن بووینه وه‌لاتیێن پله سێ!. مانێ ئه‌و گۆتنا سه‌رۆكی یا جاران گۆتی هێشتا ئێكسپایه‌ر نه‌بوویه و هه‌كه ئێكسپایه‌ر ببیت ژی، ئه‌ڤه كوردن هه‌می ئێكسپایه‌ر بوون، وه‌لاتیێن نه‌ته‌وه‌یێ و وه‌لاتیێن ئاینی كارتێكرنێ ل هه‌ڤدو ناكه‌ن، ئه‌م هه‌می كودین و پاشی موسلمان و ئێزدینه. یا جوانه میرێ كۆمه‌كا مرۆڤان خه‌مێن وان بخۆت و لێ ببیته خودان، وه‌كو وی كابرایێ گۆتی ئه‌م ئێزدی نه‌كوردین و هه‌ر ب وی زمانێ كوردی یێ دایك و زه‌لال. به‌لێ میر ژی مرۆڤه و تاكه و دبیت تۆره ببیت و دبیت ژ خه‌مێن گه‌لێ خوه دا فشارا وی یا خوینێ بلند ببیت، هنده داخۆیانیان بده‌ت، دبیت ب دلێ گه‌له‌ك ژ مه‌عیه‌تا وی ب خوه ژی نه‌بیت، ئێشا نه‌ته‌وه‌بوونێ و ئاینبوونێ وه‌كو ئێشا فشارێ خینێ و ئێشا شه‌كرێ یه، هه‌كه كه‌سه‌كی هه‌ردو ئێش هه‌بن، ئێك زیانێ ناگه‌هینته یا دیتر ب وی راده‌یێ مه‌ترسیێَ، ئه‌ڤجا دبێژم ئێزدی نه وه‌لاتیێن په‌له سێنه و نه یێن دوژ ی نه، دبیت یێن ئێك ژی نه‌بن، بلا زیرۆ بن، سۆپه‌ر، واته ژ عه‌زیزتریتن جۆرێن كوردان، ئه‌وان كه‌لتۆر و زماتن و تایبه‌تمه‌ندی و ره‌سناتیا مه د ناڤا خوه دا راگرتیه، ئه‌م هه‌می شانازیێ پێ دبه‌ین، به‌لێ هه‌كه ئێزدی بێژن ئه‌م نه‌كوردین پا ئه‌م چ بێژین؟!. تشته‌كێ گه‌له‌كێ گرنگ هه‌یه ره‌وشه‌نبیرێن ته‌خا ئێزدیان باشتر ژ من دزانن، كو ئه‌ڤرۆ ئاماژه‌یێن په‌یداكرنا ده‌رزێن تائیفی و ناكۆكیان یێن دیار دبن د لاشێ كوردستانی دا، مه گه‌له‌ك دوژمن هه‌نه، ل سه‌ر هه‌می وه‌ریسان دله‌یه‌زن، جار ب رێیا داعش، جار ب رێیا په‌كه‌كێ ، برینا بودجه و مووچان، پرسگێركا په‌كه‌كێ، توركمانێن كه‌ركووك، برایێن ئێزدی، حه‌شدا شه‌عبی و شیعه‌یاتی، شه‌رێ مووسل و كوشتنا سڤیلان ب رێیا به‌ربه‌ستێ به‌شه‌ری كو خوین بهێته رێتن، هه‌رێما مه ژی یا خوه راگره، هیڤیه كوردێن ئێزدی و ب تایبه‌تی كه‌ساتیێن ره‌وشه‌نبیری بمه رابگه‌هن، ئه‌م هه‌می پێدڤی ئێكودوینه!!. ئێزدی تاجا سه‌رانه خینا ره‌هێن كورداتیێ نه، هه‌روه‌كو من جاره‌كێ ل سه‌ر لاپه‌رێ خوه یێ فه‌یسبۆكی به‌لاڤكری، كو ئێزدیاتی جوانترین رتمه د هه‌لبه‌ستا كوردینیێ دا. ئه‌ڤجا بێ پێگۆتنه‌ك.. ئه‌م هه‌می ئێزدینه!!.
ئه‌ڤ گۆتاره ل مالپه‌رێ ئه‌ڤرۆ نيوز،ل 2/4/2017ێ هاتيه به‌لاڤكرن.
تُتاح هذه الصورة أيضا في: کوردی
