راسته ئه‌م ملله‌ته‌كین ب تنێ ل داوه‌تا ده‌ستێ ئێك دگرین؟!
محه‌مه‌د ئيبراهيم ئامێدى
باوه‌ر بكه‌ن ل ده‌مێ مرۆڤ ڤی ما نشێتی دگه‌ل وێنه‌كێ داوه‌ته‌كێ دبینیت. كو یێ هاتیه نڤیسین و به‌لاڤكرن ل سه‌ر فێسبۆكێ یێ ل سه‌ر نڤیسی ( ئه‌م ملله‌ته‌كین ب تنێ ل داوه‌تا ده‌ستێ ئێك دگرین)، مرۆڤ پێ دهه‌ڕشیت و عاجز دبیت. كو رامان و تیشكێن كوور و درێژ ژێ دچن، مرۆڤ دكه‌ڤیته ناڤبه‌را نال و بزمارا دێ چ كه‌ت و چ بێژیت؟ چ ژ مرۆڤی ناهێت ژبلی نڤیسینا ڤێ گوتارێ. ئایه ژخه‌مخۆری ودلسۆزیا خوه یا گۆتی بۆ ئێك رێزی و ئێك گوتارا سیاسی یا كوردی و هه‌لویستێ وی یێ نه‌ته‌وه‌یی، یان ژی ژبه‌ر كاودانێن نوكه و جیاوازیا ئایدۆلۆجیا و بۆچوونێن پارت و لایه‌نێن كوردی و سه‌ره‌ده‌ریێن هه‌مه‌جۆر دگه‌ل وان كاودان و ململانا حزباتیێ و هه‌ر ئێك یێ ته‌ڤڕه‌كی ل ئه‌رده‌كی ده‌ت. و هه‌ولدان بۆ دوورخستنا لایه‌نێن خودان دیرۆك و خه‌بات و هزاران شه‌هیدێن نه‌مر ژ بزاڤا رزگاریخوازیا كوردی و قادا سیاسی. یان ژی نه‌بوونا كیانه‌كێ سیاسی یێ سه‌ربخۆ و ده‌وله‌ته‌كا كوردی و…هتد. دیاره ئه‌گه‌ر و ئارمانج گه‌له‌كن ژ ڤێ په‌یڤێ یان مانشێتی، لێ ئه‌گه‌ر ده‌ستپێشخه‌ریا رێزدار مه‌سعود بارزانی سه‌رۆكێ هه‌رێما كوردستانێ یا مێژوویی یا گرێدانا كۆنگرێ نه‌ته‌وه‌یی یێ هه‌ر چار پارچێن كوردستانێ هاتبوو ئه‌نجامدان، زێده‌باری هه‌لویستێ جه‌نابێ وی یێ دلسۆز و خه‌مخۆر بۆ رێكخستنا مالا كوردی و پاراستنا ئاسایشا نه‌ته‌وه‌یی یا كوردی و پرۆژێن ئاشتیێ، دا ده‌ست د ناڤ ده‌ستان دا بن نه ب تنێ ل داوه‌تا.
ئه‌ڤرۆ و پشتی بۆرینا سه‌دان سالان و ریبارێن خوینێ و ده‌هان شۆره‌ش و سه‌رهلدان و داستان و هزاران عه‌گید و خۆرته مێران جانێ خو گوری ئاخا كوردستانێ كرین. و ملله‌تێ مه‌یێ كورد تووشی ده‌هان كارێن جینوسایدێ بوین، ژ ئه‌نفالێن ره‌ش تا كیمیابارانكرنێ و كارێن سته‌مكاریێ و نه‌شه‌رعی و مرۆڤایه‌تیێ، و پشتی سه‌رهلدانا ئادارا سالا 1991 یا پیرۆز كو به‌رهه‌مێ وێ خوینا پاك و بزاڤێ یه، ئه‌م بووینه خودان په‌رله‌مانێ هه‌لبژارتی و حكوومه‌تا هه‌رێما كوردستانێ و جڤاتا وه‌زیران و سه‌دان پێگه‌هێن سازی. و دام و ده‌زگه‌هێن میری و پیشه‌یی و رێكخراوێن جه‌ماوه‌ری و خێرخواز و كۆمه‌لگه‌هێ مه‌ده‌نی و ل ژێر ئالایێ كوردستانێ بزاڤ و خه‌بات و كار دكه‌ین ل كوردستانه‌كا ئارام و ته‌ناهی.
كوردستان یا بوویه بنگه‌هێ ئاشتیێ و ئازادیێ و دیمۆكراسیێ و تیرۆشكێن شارستانیێ و پێشكه‌فتنا و پێكڤه‌ژیانێ و لێبورینێ و سه‌ركه‌فتنێن پێشمه‌رگێن قاره‌مان دژی شه‌رێ تیرۆرێ شه‌رێ داعش وه‌ك تاكه هێز ل جیهانێ ب درێژاهیا 1050 كیلومه‌تران یێن ڤه‌دده‌ن بۆ هه‌موو ره‌خ و لایێن جیهانێ یا فه‌ره و پێدڤیه ده‌ست د ناڤ ده‌ستی دابیت، كو نوكه ئه‌م یێن د ناڤ قووناغه‌كا گه‌له‌ك نازك و هه‌ستیار دا دژین، یا پێدڤیه ئه‌م هه‌می وه‌ك كورد و كوردستانی ب هه‌موو لایه‌نێن سیاسی و ئاینی و ئولا ڤه د ئێك سه‌نگه‌ر دا بین و پاسه‌وان بین زێره‌ڤان بین و چاڤدێر بین ب روح و جان به‌رگریێ ژ كوردستانێ بكه‌ین ل هه‌ردو به‌روكان. به‌روكێ شه‌ری و به‌روكێ ناڤخۆیی تا یێ دبلۆماسی و (ئه‌وله‌ویا سه‌ره‌كی یا هه‌رێما كوردستانێ شه‌رێ داعش بیت) وه‌كو هاتیه گۆتن ل سه‌ر زارێ سه‌رۆك مه‌سعود بارزانی ل كۆمبوونا رۆژا 21/6/2016 ل سه‌لاحه‌دین دگه‌ل شانده‌كێ هه‌ڤپشكێ عیراقی و ئه‌مه‌ریكی و بیرا چه‌لێ ل بیرا مه بیت و رۆژێن دژوار هه‌رده‌م ل به‌ر چاڤێ مه بن وه‌ك سه‌ربۆرا مێژوویه‌كا ره‌ش یا رژێمێن به‌رێ و سته‌مكاریێ و نیشانا خه‌بات و به‌رگریا مللله‌تێ مه بن دژی وان وه‌ك ره‌گه‌ز و بنه‌مایێن ده‌ست ئێكگرتنێ و به‌ر ب سه‌نگه‌رێ خورستی و ب هێزڤه بچین ب ئێك رێزیا ملله‌تێ كورد و ئێك گوتارا سیاسی و راگه‌هاندنه‌كا ئاڤاكه‌ر ب قه‌بوولكرنا فره‌لایه‌نی بۆ ژیانه‌كا پێكڤه و فره‌حزبی و ئارامیا كوردستانێ و یاسا و سه‌روه‌ریێ و ئاڤاكرنا كۆمه‌لگه‌ها مه‌ده‌نی و حوكمداریا پێگه‌هێن سازی وه‌ك (ده‌وله‌تا سازی و قانوونێ) ژ بۆ ئاینده‌كێ گه‌شتر و ده‌ستڤه‌ئینانا مافێ مه یێ ره‌وا و به‌ر ب ریفراندۆمێ ڤه بچین بۆ راگه‌هاندنا ده‌وله‌تا كوردی.
ئومێده‌وارین و هیڤیدارین ئه‌ڤ چه‌نده ل به‌رچاڤێن هه‌میا بن د به‌رژه‌وه‌ندیا كورد و كوردستانیان و پاراستنا ئاسایشا نه‌ته‌وه‌یی یا كوردی دابن. یادوور ژ مایتێكرنا لایه‌نێن بیانی و حزباتیێ و به‌رژه‌وه‌ندیێن كه‌سایه‌تی، ل ژێر ئالایێ كوردستانێ یێ ره‌نگین و سرودا نیشتیمانی یا ئه‌ی ره‌قیب و خوینا هزاران هزار شه‌هیدێن سه‌ربلند، دا ئه‌ڤ گۆتنا مه بریندار دكه‌ت نه‌مینیت و بیته ئه‌م ملله‌ته‌كین ده‌ست یێ د ناڤ ده‌ستی دا.
ئه‌ڤ گۆتاره ل مالپه‌رێ ئه‌ڤرۆ نيوز،ل 13/7/2016هاتيه به‌لاڤكرن.
تُتاح هذه الصورة أيضا في: کوردی
