راگه‌هاندنه‌ك ژ حكومه‌تا هه‌رێما كوردستانێ ل دۆر سه‌ره‌دانا سه‌رۆكوه‌زيرا ئيتاليا
گاڤ
سه‌رۆكێ حكومه‌تا هه‌رێما كوردستانێ ژ لايێ سه‌رۆكوه‌زيرا ئيتاليا ڤه بۆ سه‌ره‌دانا ئيتاليا هاته داخوازكرن.
د راگه‌هاندنه‌كا حكومه‌تا هه‌رێما كوردستانێ دا هاتيه؛ د ديداره‌كێ دا دناڤبه‌را مه‌سرور بارزانى سه‌رۆكێ جڤاتا وه‌زيرێن هه‌رێما كوردستانێ و جۆرجيا مێلۆنى سه‌رۆكوه‌زيرا ئيتاليا په‌يوه‌نديێن دناڤبه‌را هه‌رێما كوردستانێ و ئيتاليا دا هاتنه به‌حسكرن.
تێدا هاتيه ژى؛ سه‌رۆكوه‌زيرا ئيتاليا ئاماژه دا دوستايه‌تيا ب هێز دناڤبه‌را هه‌رێما كوردستانێ و ئيتاليا و ره‌وشا پێكڤه‌ژيانا ئاشتيانه دناڤبه‌را پێكهاته‌يێن هه‌رێما كوردستانێ دا و ب تايبه‌ت رۆلێ هه‌رێما كوردستانێ د پاراستنا كريستيانان دا.
راگه‌هاندنێ ديار ژى كريه؛ سه‌رۆكوه‌زيرا ئيتاليا ب فه‌رمى سه‌رۆكێ حكومه‌تا هه‌رێما كوردستانێ بۆ سه‌ره‌دانا ئيتاليا داخواز كر.
ژ لايێ خۆڤه، سه‌رۆكێ حكومه‌تا هه‌رێمێ سوپاسيا ئيتاليا بۆ پشته‌ڤانيا وێ بۆ هه‌رێما كوردستانێ و ب تايبه‌ت د چارچووڤه‌يێ هه‌ڤپه‌يمانيا نێڤده‌وله‌تى ل دژى داعش دا كر.
راگه‌هاندنێ ديار ژى كريه؛ چاره‌سه‌ركرنا كێشه‌يێن هه‌ولێر- به‌غدا، به‌رسينگگرتنا گوهۆڕين و كارتێكرنێن نه‌رێنى يێن سه‌قاى ل سه‌ر وه‌لاتيێن هه‌رێما كوردستانێ و ئيراقێ و چاكسازيێن كابينه‌يا نه‌هێ يا حكومه‌تێ ژ ته‌وه‌رێن دى يێن كۆمبوونێ بوون.
د ده‌مه‌كێ دى دا ژ ئه‌ڤرۆ، مه‌سرور بارزانى سه‌رۆكێ جڤاتا وه‌زيران د پرێس كۆنفرانسه‌كێ هه‌ڤپشك دا ل گه‌ل سه‌رۆكوه‌زيرا ئيتاليا راگه‌هاند بوو كو هه‌رێم دخوازيت په‌يوه‌نديێن خۆ ل گه‌ل ئيتاليا پێشڤه‌ببه‌ت و ديار ژى كربوو؛ سه‌ره‌دانا سه‌رۆكوه‌زيرا ئيتاليا بۆ هه‌رێمێ د ده‌مه‌كێ گرنك دايه.
ژ لايێ خۆڤه، جۆرجيا مێلۆنى دياركربوو؛ ئه‌م د ده‌مێ پێدڤى دا هه‌ڤكار و پشته‌ڤانێن هه‌رێما كوردستانێ بووين و دێ هه‌ر پشته‌ڤانيا هه‌رێما كوردستانێ كه‌ين و مل ب ملێ وێ راوه‌ستين.
سه‌رۆكوه‌زيرا ئيتاليا پشتى سه‌ره‌دانا به‌غدا كرى و ل گه‌ل سه‌رۆكوه‌زير و سه‌رۆككۆمارێ ئيراقێ كۆمبووى، ئه‌ڤرۆ پشتى نيڤرۆ گه‌هشتبوو هه‌رێمێ و ژ لايێ مه‌سرور بارزانى سه‌رۆكوه‌زيرێ هه‌رێمێ ڤه پێشوازى لێ هاتبوو كرن و ل گه‌ل هه‌ر ئێك ژ سه‌رۆكێ هه‌رێما كوردستانێ و سه‌رۆكێ حكومه‌تا هه‌رێما كوردستانێ كۆمببوو.
تُتاح هذه الصورة أيضا في: کوردی
