پارێ ئاڤێ ب ڤى ره‌نگى دێ ژ وه‌لاتيان هێته وه‌رگرتن
ئه‌ڤرۆ نيوز:
رێڤه‌به‌رێ ئاڤا دهۆكێ ئاشكه‌را كر كو ئه‌ڤه دو هه‌يڤه پارێ ئاڤا مالان ل دووڤ پيڤه‌رێ زيره‌ك دهێته هژمارتن و پاره ل دووڤ وى سيسته‌مى دهێته وه‌رگرتن. هه‌تا نها زێده‌ترى 50% ژ مالان پيڤه‌رێن زيره‌ك گرێداينه.
جه‌لال جه‌ميل رێڤه‌به‌رێ ئاڤا دهۆكێ د داخۆيانيه‌كێ دا بۆ ئه‌ڤرۆ نيوز گۆت: “بۆ ماوێ دو هه‌يڤانه سه‌ره‌ده‌ريێ ل دووڤ پيڤه‌رێ زيره‌ك ل گه‌ل وان مالان دكه‌ين ئه‌وێن پيڤه‌رێن زيره‌ك دانايبن و د ڤان رۆژێن بهێت دا دێ گه‌ره‌كا دى يا وان پيڤه‌ران گه‌هيته پارێزگه‌ها دهۆكێ دا كو يێن ماين ژى بدانن”.
رێڤه‌به‌رێ ئاڤا دهۆكێ زێده‌تر گۆت: “نها زێده‌ترى 50% ژ پيڤه‌رێن زيره‌ك ل مالان هاتينه دانان و به‌رى سه‌رێ سالێ ژماره‌كا دى يا پيڤه‌ران دێ گه‌هن و دێ ده‌ست ب دانانا وان ژى كه‌ن”.
ب گۆره‌يى رۆژناما فه‌رمى يا هه‌رێما كوردستانێ، “وه‌قائعى كوردستان” هژمارتنا پيڤه‌رێن مالان دێ ل دووڤ سيسته‌مه‌كێ ده‌ستنيشانكرى بيت كو بۆ مالان هه‌ر ژ سفر هه‌تا پێنج مه‌ترێن سێ جا دێ 50 دينار هێنه وه‌رگرتن و ژ 5.1 هه‌تا 15 مه‌تر دێ 150 دينار هێنه وه‌رگرتن و ژ 15.1 هه‌تا 30 مه‌ترێن سێ جا دێ 400 دينار هێنه وه‌رگرتن و ژ 30.1 هه‌تا 60 مه‌ترێن سێجا دێ 600 دينار هێنه وه‌رگرتن و ژ 60 مه‌ترسێن سێ جار وێڤه بۆ هه‌ر مه‌تره‌كا سێ جا دێ دو هزار دينار هێنه وه‌رگرتن.
ده‌رباره‌ى په‌رستگه‌هان و داموده‌زگه‌هێن حكومى ژى دێ بۆ هه‌ر مه‌تره‌كا سێ جا 500 دينار هێنه وه‌رگرتن و بۆ كه‌رتێن نيمچه حكومى و وه‌به‌رهێنان نه‌بيت دێ 750 دينار بۆ ئێك مه‌ترا سێ جا هێته وه‌رگرتن.
كه‌رتێ بازرگانى و پێشه‌سازى و گه‌شتيارى و وه‌به‌رهێنانێ ژى دێ بۆ هه‌ر مه‌تره‌كا سێ جا هزار ديناران ده‌ن و جهێن شووشتنێ ژى ب هه‌ر ره‌نگه‌كێ هه‌بيت دێ بۆ هه‌ر مه‌تره‌كا سێ جا دو هزار ديناران ده‌ن.
تُتاح هذه الصورة أيضا في: کوردی
