وه‌زاره‌تا ناڤخۆ دێ 300 ده‌رچوویێن ئاماده‌یی و زانكۆیێ دامه‌زرینیت
ئه‌ڤرۆ نیوز:
شیره‌تكاره‌كێ وه‌زیرێ ناڤخۆ ل هه‌رێما كوردستانێ ئاشكه‌را كر كو ناڤ نڤیسین بۆ دو خولێن ئه‌فسه‌ریێ كو بۆ 300 قوتابیان دێ هێنه ڤه‌كرن ژ ئه‌ڤرۆ ده‌سپێكر و دێ ب رێیا ئون لاین بیت و ئه‌و كه‌سێن مه‌رج ژێ دگرن دشێن د ڤان 10 رۆژان دا ناڤێن خوه تۆمار بكه‌ن.
لیوا به‌ختیار بابان شیره‌تكارێ وه‌زیرێ ناڤخۆ ل هه‌رێما كوردستانێ بۆ رووداو گۆت: “ژ رۆژا 23ی نیسانا 2017ێ ناڤ نڤیسین بۆ دو خۆلێن ئه‌فسه‌ریێ ل كولیژا پۆلیسی یا هه‌ولێر دێ ده‌سپێكه‌ت و دێ د رێیا ئون لاین و فورمان دا بیت و 10 رۆژان ژی دێ یا به‌رده‌وام بیت”.
ده‌رباره‌ی مه‌رجێن وه‌رگرتنا ده‌رچوویێن زانكۆیێ كو دێ 100 كه‌سان بۆ خولێ وه‌رگرن، ئه‌وی شیره‌تكارێ وه‌زاره‌تا ناڤحۆ ئاشكه‌را كر كو دڤێت ژیێ وان د ناڤبه‌را 22 بۆ 25 سالان دا بیت و ده‌رچوویێن ئاماده‌یی ژی كو ب تنێ یێن وێژه‌ی و زانستی دهێنه وه‌رگرتن 200 كه‌سن و دڤێت ژیێ وان ژی د ناڤبه‌را 18 بۆ 22 سالان دا بیت و خۆل ژی دێ 22 هه‌یڤان ڤه‌كێشیت.
هه‌ر ب گۆره‌ی رێنمایان پێدڤیه بلنداهیا كه‌سێ پێشكێش دكه‌ت ژ 170سم كێمتر نه‌بیت و ده‌رچوویێ ئاماده‌یی ل سالا 2016ێ سه‌رجه‌مێ نمره‌یان ژ 60%ێ وێڤه هه‌بیت و سالێن به‌ری وێ ژی ژ 63% كێمتر نه‌بیت. بۆ كه‌سوكارێن شه‌هیدان مه‌رجێ نمرێ لابریه.
تُتاح هذه الصورة أيضا في: کوردی
