موندیالا قه‌ته‌ر 2022 دێ بشێوازه‌كێ نوو هێته كرن
ئه‌ڤرۆ نيوز:
ل ئه‌ینیا بوری پشككێشانا یاریێن مۆندیالا جیهانی قه‌ته‌ر2022 ل ده‌وحه هاته ئه‌نجامدان ژبۆ به‌لاڤكرنا هه‌لبژارتیێن ده‌ربازبوویی ل سه‌ر هه‌شت كۆمێن جودا، ئه‌وا بڕیاره یاریێن وان ل 21 چڕیا دویێ هه‌تا 18ێ كانوونا ئێكێ یا بهێت به‌رده‌وامبیت.
• خشتێ هه‌ر هه‌شت كۆما بڤی ره‌نگی بوون.
……..وێنێ خشتی
• ژڤانێ ده‌ستپێكرنێ و یاریگه‌هێن هاتینه به‌رهه‌ڤكرن.
چاڤه‌ڕێ دهێته كرن ل 21ێ چڕیا ئێكێ یا بهێت موندیالا جیهانی یا 24ێ ده‌ستپێبكه‌ت ب ئه‌نجامدانا چه‌ند ئاهنگێن جودا و سه‌رنجراكێش كو لدووڤ چاڤدێرێن وه‌رزشی بۆ جارا ئێكێ یه دێ هێنه نیشان دان و هه‌شت یاریگه‌ه بۆ یاریێن موندیالێ هاتینه به‌رهه‌ڤكرن ئه‌وا هه‌شت ملیار دولار مه‌زاختیێ وان دروستكرنه، یاریگه‌ها ئه‌لبه‌یت ئه‌وا لدووڤ شێوازێ كه‌له‌تۆرێ قه‌ته‌ری هاتیه دانان كو شیانێن وه‌رگرتنا 60 هزار جه‌ماوه‌ران هه‌یه دێ یاریا ده‌ستپێكا قاره‌مانیێ ڤه‌كه‌ت ئه‌وا دناڤبه‌را هه‌لبژارتیێ سینگال و هۆله‌ندا هێته كرن و یاریگه‌ها لوسایێل دێ یاریا دووماهیێ یا قاره‌مانیێ مێڤانكه‌ت.
• گوهۆڕینا ژڤانێ قاره‌مانیێ.
ژبه‌ر سه‌قایێ گه‌رم ل وه‌رزێ هاڤینێ دا ل وه‌لاتێ قه‌ته‌ر ئێكه‌تیا ته‌پا پێی یا فیفایی بڕیاردابوو ژڤانێ موندیالێ ژ هه‌یڤا تیرمه‌هێ بۆ چڕیا دویێ بهێته گوهۆڕین كو دهێته هژمارتن بۆ جارا ئێكێ یه د دیرووكا مۆندیالا جیهانی دا وه‌لاته‌كێ عه‌ره‌بی مێڤانداریا قاره‌مانیێ بكه‌ت و یادویێ یه ل سه‌ر ئاستێ ئاسیا پشتی ل مۆندیالا 2002 هه‌ردو وه‌لاتێن كوریا باشۆر و چاپانێ مێڤانداریا وێ كری، دیسان دهێته هژمارتن ئه‌ڤ مۆندیالا دووماهی قاره‌مانیه 32 هه‌لبژارتی پشكداریێ بكه‌ن ژبه‌ركو بۆ مۆندیالا بهێت یا 2026ێ ئه‌وا دێ ب هه‌ڤپشكی ل ئه‌مریكا، مه‌كسیك و كه‌نه‌دا هێنه كرن 48 هه‌لبژارتی پشكداریێ كه‌ن.
• سیسته‌مێ به‌لاڤكرنا هه‌لبژارتیان.
ئێكه‌تیا فیفا لدووڤ سیسته‌مه‌كێ رێكخستی هه‌لبژارتیێن ده‌ربازبووی بۆ مۆندیالا 2022 قه‌ته‌ر ل سه‌ر چار ئاستان ده‌ستنیشانكر بوو كو پشتبه‌ستن لسه‌ر رێزبه‌ندیا وان یا جیهانی هاتبوو كرن، هه‌شت هه‌لبژارتی بۆ هه‌ر ئاسته‌كی دانابوو ب مه‌رجه‌كی نابیت دو هه‌لبژارتی د ئێك كێشوه‌ر دا بكه‌ڤنه دئێك كۆم دا ژبلی كێشوه‌رێ ئۆرۆپا نه‌بیت.
• یاریێن چاره‌نڤیس.
ژبه‌ركو سه‌رجه‌مێ 32 هه‌لبژارتیان 29 ژوانا ده‌ربازبوونا خوه مسۆگه‌ركریه بتنێ سێ هه‌لبژارتی ماینه ئه‌وا بڕیاره ل 13ێ خزیرانا بهێت هه‌شت هه‌لبژارتی بۆ سێ پلێتێن مایی هه‌ڤڕكیێ بكه‌ن و بڤی ره‌نگی، كۆستاریكا ژ كێشوه‌رێ ئه‌مریكا ناڤه‌راست ل گه‌ل نیوزیله‌ندا ژ ئێكه‌تیا ئۆكیانۆس سه‌ركه‌فتیێ وان دێ پشكداری كۆما پێنجێ بیت كۆ پێكهاتینه ژ ئسپانیا، ئه‌لمانیا و چاپان، ژ ئۆرۆپا سه‌ركه‌فتیێ یاریا ئۆكراین و سكۆتلاندا ل گه‌ل وێلز بۆ پلێتا دویێ دێ پشكداری كۆما دویێ بن ئه‌وژی ئنگلترا، ئه‌مریكا و ئیران، هه‌روه‌سان سه‌ركه‌فتیێ ئیمارات و ئوسترالیا ژ كێشوه‌رێ ئاسیا دێ هه‌مبه‌ری هه‌لبژارتیێ پێرۆ بیت ژ كێشوه‌رێ ئه‌مریكا باشۆر بۆ پلێتا سێیێ و دووماهیێ یا مۆندیالێ دێ پشكداری كۆما پینجێ بن ل گه‌ل هه‌لبژارتیێن فره‌نسا، دانیمار و تونس.
•خه‌لاتێ قاره‌مانیێ ژ 400 ملیۆن دولارا ده‌ربازكریه.
ئێكه‌تیا جیهانی فیفا خه‌لاتێ دارایی بۆ هه‌موو هه‌لبژارتیێن پشكدار د موندیالا جیهانێ دا دیاركر كو سه‌رجه‌مێ وان زێده‌تر 400 ملیۆن دولاران ده‌ربازكرینه، قاره‌مانا موندیالێ دێ 42 ملیون دولاران وه‌رگریت، خودانا رێزا دویێ 30 ملیونا،رێزا سێیێ 27 ملیون، رێزا چارێ 25 ملیون، هه‌لبژارتیێن دی ژ 17 ملیون هه‌تا ئێك ملیون و500 هزار دولاران وه‌رگرن.
• گرنترین هه‌لبژارتی و یاریزانێن بێ به‌هر ژ مۆندیالێ.
مۆندیالا جیهانی 2022 دێ هنده‌ك هه‌لبژارتی و یاریزانێن ستێر سه‌ر ئاستێ جیهانێ بێ به‌هربن پشتی پلێتا ده‌ربازبوونێ ژ ده‌ست دان ژوانا هه‌لبژارتیێ ئیتالیا خودانا چار ناسناڤێن جیهانی، هه‌روه‌سان نه‌رویج، نه‌مسا، سوید، مسر، جه‌زائیر، كودیڤوار و كۆلۆمپیا، ژلایه‌كێ دووڤه ئه‌و یاریزانێن د مۆندیالێ دا نا هێنه دیتن ئه‌وژی، ئێرلینگ هالاند یێ نه‌وریج، ستێرێن هه‌لبژارتیێ ئیتالیا نموونه جورجیۆ كێلینی،دۆنارۆما،جورجینیو، بیلۆتی، ماركۆ فیراتی لوكاتێلی،سیباستیان هاله‌ر یێ كودیڤوار، محه‌مه‌د سه‌له‌ح یێ مسری، ریاز موحرز یێ جه‌زائیری، دێڤێد ئالابا یێ نه‌مسا و ئیبراهیموڤێچ یێ سویدی.
• خودانێن ناسناڤێن مۆندیالێن جیهانی
دهێته هژمارتن هه‌لبژارتیێ به‌رازیل خودان مه‌زنترین رێژا ده‌ستڤه ئینانا ناسناڤێن جیهانێ ب پێنچ جاران ئه‌وژی ل سالێن 1958، 1962، 1970، 1994 و 2002، هه‌روه‌سان مه‌زنترین پشكداری هه‌یه ئه‌وژی ب 22 جاران پشكداری قاره‌مانیێ بووینه، ژلایێ خوه‌ڤه هه‌لبژارتیێ ئه‌لمانیا چار ناسناڤ ده‌ستڤه ئیناینه ئه‌وژی 1954، 1974، 1990 و 2014، دیسان ئیتالیا ژی چار ناسناڤ ل سالێن 1934، 1938،1982و 2006 ده‌ستڤه‌ئیناینه، فرنسا ل هه‌ردو سالێن 1998 و 2018 ده‌ستڤه‌ئیناینه، ئه‌رجه‌نتین ژی دو ناسناڤ سالێن 1978 و1986، ئۆرگۆایی ل سالێن 1930 كو دبیته ده‌ستپێكا چالاكیا مۆندیالێ و 1950، ژلایێ خوه‌ڤه ئسپانیا جاره‌كێ ل سالا 2010 و ئنگلترا ل 1966ێ ده‌ستڤه ئینایه، بۆ زانین مۆندیال ل 1942 و 1946 نه هاته ئه‌نجامدان ژبه‌ر شه‌ڕێ جیهانی یێ دویێ.
• پێنچ ژ باشترین گۆلكه‌رێن موندیالا جیهانی.
هێرشبه‌رێ هه‌لبژارتیێ ئه‌لمانیا مێروسلاڤ كلۆزه رێزا ئێكێ دهێت ب تۆماركرنا 16 گۆلان، یێ دویێ ستێرا به‌رازیلی رۆنالدو دالیما ب 15 گۆلان، جیرد مۆله‌ر یاریزانێ ئه‌لمانیا 14 گۆل تۆماركرینه و رێزا سێیێ دهێت، یێ فره‌نسی جوست فۆنتین خودانێ 13 گۆلان رێزا چارێ دهێت، بیلی ئه‌ڤسانێ به‌رازیل ب 12 گۆلان رێزا پێنجێ دهێت.
FacebookTwitterPrint
تُتاح هذه الصورة أيضا في: کوردی
