ڤان مفایێن سەیر یێن گیزێ بزانە

ڤان مفایێن سەیر یێن گیزێ بزانە
دهۆك ميديا
گیزان تایبەتییا خو ل دەف خەلکی هەنە، ژبەرکو ژبلی تاما وان یا خوش گیزان گەلەک مفایێن ساخلەمییێ ژی ژ بۆ لەشێ مرۆڤی هەنە، هند جاران ئەڤ کاکلێن گیزان ژبۆ درستکرنا تەحینێ و دوهنی دهاتن بکارئینان، دیسان وەک دەرمان ژبۆ چارەسەرییا هندەک نەخوشییان ژی گیزان مفایێ خو هەیە.

ل گۆری ڤەکۆلینێن زانستی گیزان گەلەک مفا هەنە ژبەرکو ب گەلەک ڤیتامین و کەرسەتەیێن مفادار یا دەولەمەندە وەکی ( دۆهنێ ئۆمێگا سێ، ئۆمێگا شەش، کەرەستەیێن کالسیۆم، ئاسن، چینکۆ، فسفۆر، ڤیتامین A، B1، B2، B6 و ڤیتامین C ..)تێدا هەنە، ئەڤ ڤیتامین و دۆهن و کەرەستەیە د کاکلێن گیزان دا هەنە و سەرەرای مفایێ وان تام و چێژەکا خوەش ژی هەیە، لەورا خوارنا گیزان تایبەتی و خوەشییا خوە هەیە، تشتێ بالکێش و سەیر ئەوە قەلپێن گیزان ژی مفا و تایبەتییێن خوە هەنە و گەلەک جاران وەکی دەرمانێن خوەزایی دهێن بکارئینان، لێ ژبەرکو تاما وان یا نەخوەشە و ناهێن خوارن لەورا ئەڤ تیڤل و قەلپێن گیزان دهاتن هاڤێتن و نەبووینە جهێ گرنگیپێدانا مرۆڤان.

مفایێن قەلپین گیزان ئەڤەنە:

1. ل دەمێ زڤستانێ و سەرمایێ قەلپێن گیزان ژبۆ نەخوەشییێن سەرمایێ یێن وەکی پەرسیڤ و کۆخکێ تایبەتی و مفایەکێ مەزن هەیە، ئەو ژی ئەگەر تیڤلێن گیزان بهێنە شووشتن و کەلاندن و پاشی ئاڤا وان بهیتە ڤەخوارن، دێ مفایەکێ تایبەت ژبۆ ڤان نەخوەشییان هەبیت.

2. دیسان هەر ئەڤ ئاڤا گیزان ژبۆ نەهێلانا کرمێن دناڤ ریڤیکان دا مفایەکێ مەزن هەیە و رێگرییا چێبوونا وان دناڤ ریڤیکان دا دکەت.

3 . هەروەسا ئاڤا گیزان ژبۆ نەخوەشییا شەکرێ ژی یا باشە ژبەرکو ب گەلەک مادەیێن مفادار یا دەولەمەندە.

4. دیسان ئاڤا گیزان ژبۆ پرچێ مفا و تایبەتییا خوە هەیە، گەر بەردەوام پڕچ ب وێ ئاڤێ بهێتە شووشتن دێ مییێن پرچێ بهێزتر لێ هێن و ناهێلیت داڤێن سپی ل ناڤ پرچێ زێدە ببن ئانکو رێگرییێ ل وەریان و سپیبوونا پرچێ دکەت.

5. تشتێ هەری گرنگ ئاڤا گیزان مفایەکێ مەزن ژبۆ پاقژکرن و بهێزکرنا ددانان هەیە، ب تایبەتی ژبۆ پاقژکرن و نەهێلانا کلسێ ددانان، ژبۆ ڤێ چەندێ ژی پێدڤییە 40 گرامێن قەلپێن گیزان دگەل گلاسەکا ئاڤێ بۆ دەمێ 20 خۆلەکان بهێنە کەلاندن، پاشی ئەو ئاڤ دێ هێتە سەفاندن و رۆژێ سێ جاران ب وێ ئاڤی دێ ددان هێنە شووشتن.