رێڤەبەر و مامۆستایێن خواندنا كوردی ل شنگال هاریكاریا قوتابیێن هەژار دكەن
تۆرا لالش:
ژ ئەگەرێ هەژاریێ و نەبوونا دەلیڤێن كاركرنێ حالەت هەینە خەلك نكارت زارۆكێن خۆ رەوانەی قوتابخانەیان دناڤ سەنتەرێ شنگال دا بكەن،لەوا رێڤەبەر و مامۆستایێن خواندنا كوردی ل شنگال هاریكاریا قوتابیێن هەژار دكەن داكو دەستان ژ خواندنێ بەرنەدەن.
مەیسەر حەجی،رێڤەبەرێ پەروەردا شنگال بۆ دەنگێ لالش دیاركر،ل قوبلەتا چیایێ شنگالێ گەلەك گوند و كۆمەلگەهـ و دەڤەرێن سەر ب شنگالێ ڤە هەینە مە نكاریە قوتابخانەیێن خواندنا كوردی لی ڤەكەین ئەوژی ژ ئەگەرێ نەبوونا ئاڤاهیان و نەبوونا مێلاكی ب تایبەتی ژی ل تلقەسەب و تلبنات و سیبا شێخدرێ، و ل گەلەك گوند و دەڤەرێن شنگال خەلك ڤەگەریایە لێ قوتابخانە ل وێدەر نەهاتینە ڤەكرن د ئەنجامدا قوتابی بخۆ ترۆمبێلان ب كرێ دكەن ل سەر كیستێ خۆ هاتن و چۆنێ دكەن،خەلكەكی هەژارە و كارژی نینە و نكارن كڕێیا ڤەگوهاستنا قوتابیان ب مەزێخن لەوران ژی حالەت پەیدادبن و ژ نەچاری قوتابی دەستان ژ خواندنێ بەرددەن،هندەك گوند و كۆمەلگەهێن شنگال هەینە خەلكێ وێ ڤەگەریایە سەر جهـ و مالێن خۆ، لێ هێشتا قوتابخانەیێن وان نەهاتینە ڤەكرن ئەو قوتابی نەچاردبن بۆ خواندنێ قەستا هندەك قوتابخانەیێن دی بكەن بۆ و د ئەنجامدا بۆ كرێ یا ترۆمبێلان پێتڤی ب پاران دبن و خەلكەكی پارە نینن، لەوران نەچاردبن ژبەر هەژاریێ قوتابخانێ بجهـ بهێلن.
رێڤەبەرێ پەروەردا شنگال خویاكر،نۆكە ل شنگال 30 هەزار قوتابی ل قوتابخانەیێن خواندنا كوردی دخوونن ،ژوانژی 12 هەزار قوتابی دناڤ سەنتەرێ شنگال دا زمانێ كوردی دخوونن و18 هەزار قوتابی دناڤ كەمپێن ئاواران ل دهۆكێ ب زمانی كوردی دخوونن.
ژبال خۆ ڤە شەهاب ئەحمەد، رێڤەبەرێ كارگێریێ پەروەردا شنگال بۆ دەنگێ لالش گۆت:حالەت هەبووینە قوتابی ژبەر هەژاریێ قوتابخانێ دهێلن لێ رێڤەبەریێن قوتابخانەیان و مامۆستایێن خواندنا كوردی ل شنگال دناڤبەرا خۆدا پاران كۆمدكەن و هاریكاریا قوتابیێن هەژار دكەن،داكو قوتابخانێ نەهێلن بۆ نموونە ژی دوو حالەت ل ئامادەیا جەگەر خۆین ل شنگالێ هەبوون و قوتابیان نكارین بەردەوامیێ ب خواندنێ بدەن ئیدارا قوتابخانێ و مامۆستایان ناڤبەرا خۆ دا هاریكاریا قوتابیان كرن و نەهێلان قوتابی دەستان ژ خواندنێ بەردەت.
ئاماژە ب وێ چەندێ دا دناڤ كەمپێن ئاواران و شنگال دا رێژا قوتابیێن قەستا خواندنا كوردی دكەن بەرەف زێدەبوونێ یە،ئیسالە 30 هەزار قوتابیان ل شنگال و دناڤ كەمپێن ئاواران ل سنوورێ پارێزگەها دهۆكێ قەستا خواندنا زمانێ كوردی كرن و سال بۆ سالێ بتر خەلك زارۆكێن خۆ رەوانەی خواندنا كوردی دكەن و بەردەوام حكومەتا هەرێما كوردستانێ پشتەڤانی یا پەروەردا شنگال دكەت،ئیسالە ژی پەرتۆك و پێتڤین قوتابخانەیان بۆ قوتابخانەیێن شنگال هاتینە دابینكرن.
سال بۆ سالێ رێژا قوتابیێن قەستا خواندنا كوردی دكەن،دناڤ كەمپێن ئاواران و شنگال دا بەرەف زێدەبوونێ یە.
تُتاح هذه الصورة أيضا في: کوردی
