حوزه‌یران 16, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

حالەتێن نەخۆشیێن دەروونی و خۆكوشتنێ‌‌ دناڤ ئاوارەیێن شنگالێ‌ دا زێدەبووینە

حالەتێن نەخۆشیێن دەروونی و خۆكوشتنێ‌‌ دناڤ ئاوارەیێن شنگالێ‌ دا زێدەبووینە
تۆرا لالش:
ماوێ‌ هەشت سالانە هێشتا ب هەزاران ئاوارەیێن خەلكێ‌ شنگالێ‌ دناڤ كەمپێن ئاوارەیێ‌ دا ل سنوورێ‌ پارێزگەها دهۆكێ‌ ژیانا خۆ دبۆرینن،درێژبوونا ماوێ‌ ئاوارەبوونێ‌ و ژیانا سەخت و دژوار یا كەمپان بوویە ئەگەر چەندین حالەتێن نەخۆشیێن دەروونی دناڤ واندا پەیداببن و پەنایێ‌ بۆ خۆكوشتنێ‌ ببەن و ئەڤ دیاردە بەرەف زێدەبوونێ‌ ڤە دچن.‌
ڤەكۆلەرێ‌ دەروونی(عیماد حسێن) بۆ رۆژناما دەنگێ‌ لالش خویاكر،خۆكوشتن دیاردەیەكا هەرە كەڤنە و ل سەر تاكێن هەر جڤاكەكی یا ب مەترسیە و ئەڤ دیاردە دناڤ هەموو كۆمەلگەهێن جیهانێ‌ دا ڕووددەت و هەر كەسەكێ‌ هزر د خۆ كوشتنێ‌ دا بكەت ژبەر هندەك ئەگەرێن جودا جودایە،بێ‌ كو ئەو ئەگەر بێنە بەلاڤكرن ل ناڤ جڤاكێ‌ دا،ژبەر هندەك ئەگەرێن تاكەكەسی هزر و پێكۆلێن خۆكوشتنێ‌ دكەن ژوان ئەگەران ژی بێزار بوون و بێ‌ هیڤیبوونا مرۆڤی یە دژیانێ‌ دا و پەیدابوونا ئاریشێن خێزانی و جڤاكی ئەگەرن مرۆڤ هزرێن خراب بكەت،هەروەسا كارتێكرنا تۆرێن جڤاكی ل سەر خێزانێ‌ ژ مەترسیدارترین ئەگەرێن ڤی بوویەرێنە وەكو بەلاڤكرنا وێنەیێن خێزانی ل تۆرێن جڤاكی بوویە ئەگەرێن خۆ كوشتنی،دیسان ژیانا كێم دەرامەتیێ‌ ئەگەرەكە و …هتد.
دبەردەوامیا ئاخفتنا خۆدا گۆت:بتریا دیاردێن خۆ كوشتنێ‌ یێن ل ڤێ‌ داویێ‌ رووداین ب تایبەت ل ناڤا كەمپێن ئاوارێن شنگالێ‌ تەمەنێ‌ وان دناڤبەرا‌ 14 بۆ 25 سالیێ‌ دانە،كو تەمەنێ‌ هندەكان هێشتا تەمام نەبوویە ئانكو هزرا خۆ ناكەن و زوو ڤێ‌ بریارا شاش ددەن بێی كو بگەهنە چارەسەریێ‌ ژبەر هندێ‌ بەرەف خۆكوشتنێ‌ ڤەدچن.
هەر ل دۆر هەمان دیاردە چالاكڤانا كچ(سەلوا شنگالی)بۆ دەنگێ‌ لالش دبێژت:ئاوارێن شنگالێ‌‌ یێن ل ناڤ كەمپان دا ئاماژێ‌‌ ب وێ‌‌ چەندێ‌‌ ددەن كو چەندین حالەتێن نەخۆشیێن دەروونی و خۆكوشتنێ‌‌ دناڤ واندا پەیدابووینە،بێگۆمان مانا ئاواران بۆ ڤی ماوێ‌ درێژ و نەچاڤەرێكری دێ‌ ئاریشێن جڤاكی و نەخۆشیێن دەروونی پەیداكەت و ئەڤ چەندە دێ‌ كارتێكرنەكا مەزن ل سەر ژیانا وان یا رۆژانە كەت،هندەك جاران دگەهتە دیاردا خۆ كوشتنێ‌ و ئەڤ دیاردە رۆژ بۆ رۆژێ‌ بەرەف زێدەبوونێ‌ دچت،لەورا وەك ئەركەكێ‌ دینی و مرۆڤایەتی دڤێت مرۆڤێن پسپۆر ل سەر ڤێ‌ چەندێ‌ راوەستن و گرنگیێ‌ بدەنێ‌ و هەركەسەك ژلایێ‌ خۆڤە كاری ل سەر بكەت جڤاكی بپارێزت داكو ئەڤ دیاردە د بێتە كێمكرن،دڤێت مامۆستایێن ئاینی و نۆژدارێن دەروونی سمیناران ل دۆر خۆ پاراستنێ‌ دناڤ جڤاكی دا پێشكێش بكەن داكو جڤاك یێ‌ پاراستی بت ژ ڤان دیاردان.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi