نێچیرڤان بارزانى 29 سالییا دامه‌زراندنا بنگه‌هێ لالش یێ ره‌وشه‌نبیرى پیرۆزكر
سه‌رۆكێ هه‌رێما كوردستانێ نێچیرڤان بارزانى پیرۆزباهى ل بنگه‌هێ لالش یێ ره‌وشه‌نبیرى ب هه‌لكه‌ڤتا بوورینا 29 سالان لسه‌ر دامه‌زراندنا وێ كر، و دیاركر وه‌كو هه‌رده‌م دێ پشته‌ڤانییا ماف و داخوازیێن خووشك و برایێن ئێزدى كه‌ن و هه‌ر چ یا پێدڤى بیت دێ بۆ وان هێته‌كرن.
ده‌قێ پیرۆزباهییا نێچیرڤان بارزانى
بیرهاتنا (29) سالییا دامه‌زراندنا بنگه‌هێ لالش یێ ڕه‌وشه‌نبیرى ل هه‌مى ئه‌ندام و كادرێن بنگه‌هى و ته‌ڤایا خوشك و برایێن ئێزدى پیرۆز دكه‌م. ب ڕێز و پێزانین ل كار و خه‌بات و چالاكى یێن بنگه‌هێ لالش دنێڕین كو هه‌رده‌م وه‌ك دروشما وێ دبێژیت: كانییه‌كا زه‌لاله دهوڕته د ڕووبارێ ڕه‌وشه‌نبیرییا كوردیدا.
دڤێ بیرهاتنێدا جاره‌كا دى هه‌مى خوشك و برایێن خۆ یێن ئێزدى پشتڕاست دكه‌ین كو وه‌ك هه‌رده‌م دێ پشته‌ڤانێن ماف و داخازێن وان بین و هه‌ر چ پێویست بیت دێ كه‌ین، هه‌روه‌سا هندى خوشك و برایه‌كێ ئێزدى، ڕه‌ڤاندى مابیت، دێ هه‌ولێن مه ژبۆ ڕزگاركرنا وان، یان دیاركرنا چاره‌نڤیسێ وان به‌رده‌وام بن.
ئه‌م ب دلگرانى ل بوویه‌رێن ده‌ڤه‌را شه‌نگالێ و نه‌چاربوونا خوشك و برایێن ئێزدى دنێڕین كو جاره‌كا دى ئاواره دبن. داخازێ ژ حكوومه‌تا عیراقێ دكه‌ین ب هاریكاریێ دگه‌ل حكوومه‌تا هه‌رێما كوردستانێ هه‌مى هه‌ولا بده‌ن بۆ ئارامكرنا ڕه‌وشا شه‌نگالێ و هه‌مى ده‌ڤه‌رێن ئێزدیان و ئاڤه‌دانكرنا وان و ڤه‌گه‌ڕاندنا ژیانێ و خزمه‌تگوزارییان ژبۆ وان.
هه‌ر ب ڤێ هه‌لكه‌فتنێ، سه‌رۆكێ به‌رێ یێ ده‌سته‌یا بلندا بنگه‌هێ لالش یێ ڕه‌وشه‌نبیرى خودێ ژێ زێ ڕازى شێخ شامۆ و كار و خزمه‌تا وى ب بیر تینین كو به‌رى هه‌یامه‌كێ كۆچا داویێ كر. بیرهاتنا وى ب خێر و جانێ وێ شاد.
تُتاح هذه الصورة أيضا في: کوردی
