فره‌نسا ئاماژه‌يێ دده‌ته گرنگيا كاراكرنا رێككه‌فتنا شنگالێ دناڤبه‌را هه‌ولێر و به‌غدا دا
گاڤ نيوز
كۆنسۆلگه‌ريا فره‌نسا ل هه‌رێما كوردستانێ ئه‌ڤرۆ رۆژا چارشه‌مبيێ ئاماژه دا گرنگيا كاراكرنا رێككه‌فتنا شنگالێ دناڤبه‌را هه‌ولێرێ و به‌غدا دا.
ئوليڤێ ديكۆتينى كۆنسۆلێ فره‌نسا د ديداره‌كێ دا ل گه‌ل په‌رله‌مانتار ڤيان ده‌خيل دويماهيك پێشهاتێن شنگالێ و ره‌وشا ئاواره‌يان به‌حسكرن.
ل گۆره‌ى به‌يانه‌كا په‌رله‌مانتار ڤيان ده‌خيل؛ د ديدارێ دا گرنگترين پێشهاتێن سياسى هاتنه به‌حسكرن و ڤيان ده‌خيل د ديدارێ دا ئاماژه‌يێ دده‌ته رۆلێ گرنگ يێ فره‌نسا د هاريكاريكرنا ئاواره‌يێن د كه‌مپان ڤه ب رێكا پرۆگرام و هاريكاريێن مرۆڤايه‌تى و گرنگيا به‌رده‌واميا ڤان هاريكاريان ژ لايێ فره‌نسا ڤه.
كۆنسۆلێ فره‌نسا ژ لايێ خۆڤه ئاماژه دا به‌رده‌واميا پشته‌ڤانيا فره‌نسا بۆ پێكهاته‌يان ل ئيراقێ و ب تايبه‌ت ئێزديان ژبه‌ر وێ كۆمكۆژيا تووشبووينێ كو تا نوكه و پشتى بۆرينا پتر ژ حه‌فت سالان هێشتا چاره‌نڤيسێ گه‌له‌ك به‌رزه‌بوويان نه‌هاتيه زانين و ب هزاران خێزان د كه‌مپان ڤه دژين.
به‌يانێ ديار ژى كريه: هه‌ردو لايان ته‌كه‌زى ل سه‌ر گرنگيا كاراكرنا رێككه‌فتنا شنگالێ و گرنگيپێدانێ ب ژێرخانه‌يا شنگالێ بۆ ڤه‌گه‌ڕيانا ئاواره‌يان كرن.
ل 9ى چريا ئێكێ يا سالا 2020 به‌غدا و هه‌ولێر رێككه‌فتنه‌ك بۆ ئاسايكرنا ره‌وشێ ل شنگالێ ئيمزاكربوون.
ل گۆره‌ى وێ رێككه‌فتنێ، پێدڤيه قه‌زايا شنگالێ ژ روويێن كارگێرى، ئه‌منى و خزمه‌تگۆزارى ڤه ب هه‌ڤپشكى ژ لايێ هه‌ولێرێ و به‌غدا ڤه بهێته برێڤه‌برن.
تُتاح هذه الصورة أيضا في: کوردی
