ئێزدی جودا ژ سالێن بۆری بەرهەڤیێن گێرانا رێورەسمێن جەژنا رۆژیێن ئێزی دكن
تۆرا لالش یا راگەهاندنێ 
جەژنا رۆژیا جەژنەكا هەرە كەڤن و دێرین یا مللەتێ ئێزدیە،ئیسالە ل رۆژا(17/12/2019)ێ ئێزدی دێ دەست ب گرتنا رۆژیێن ئێزی كن و ل رۆژا چارێ ژی دبتە جەژن،ئەڤ رۆژی فەرزن و ئێزدیان جودا ژ سالێن بۆری بەرهەڤیێن گێرانا رێورەسمێن جەژنێ كریە.
لدۆر گێرانا رێورەسمێن جەژنا رۆژیێن ئێزی (عسمەت تەحسین بەگ)كورێ میر تەحسین بەگ بۆ رۆژناما دەنگێ لالش دیاركر،ئیسالە ئێزدی ل رۆژا(17/12/2019)ێ دێ دەست ب گرتنا رۆژیێن ئێزی كن ل رۆژا چارێ ژی دبتە جەژنا رۆژێن ئێزی و ئەڤ رۆژی فەرزن و پێتڤیە هەموو كەسێن ئێزدی ڤان رۆژیان بگرن،ئەڤ جەژنە دكەفتە دئینیا ئێكێ ژ هەیڤا كانوونا ئێكێ ب هژمارا رۆژهەلاتی،تەكەزكر ژی ئێزدیان هەشت جەژن هەنە ژوانا ژی سێ جەژن ل پەرستگەها لالش دئێنە گێران ئەو ژی جەژنا چلێ هاڤینێ وجەژنا چلێ زڤستانێ و جەژنا جەمایێ و پێنچ جەژن ل ناڤ جڤاكی دئێنە گێران ئەو ژی جەژنا سەرسالێ و رۆژیێن ئێزی و بێلندێ وخدر ئلیاس و جەژنا قوربانێ،ئیسالە رێورەسمێن جەژنا رۆژیێن ئێزی ل ب ئامادەبوونا سەماحەتا بابێ شێخ و جڤاتا رۆحانی دێ ل پەرستگەها لالش ئێنە گێران ،ژبەركو جەژنا رۆژیا جەژنەكا هەر كەڤن و دێرین یا مللەتێ ئێزدیە ،هەر بڤێ هەلكەفتێ دەربارەی رەوشا ئاوارێن ئێزدیێن شنگالێ گۆت:رەوشا خەلكێ شنگال یا پەریشانە و ماوێ پێنج سالایە رۆژی و جەژنێن خۆ دناڤ خیڤەتان دا دەرباز دكن و ب هیچ رەنگەكی رێورەسمێن داب ونەریتێن خۆ نەهێلاینە،ئەڤ یەك ژی جیێ سەربلندیێ یە ل نك هەموو ئێزدیان.
ئۆلدارێ ئێزدیان(خواجە خەتاری) بۆ رۆژناما دەنگێ لالش خویاكر،دباوەریا ئێزدیان دا رۆژی بۆ خودێ نە هەر كەسەكێ ئێزدی بت پێتڤیە ڤان هەر سێ رۆژیان بگرت رۆژی گرتن ژی ئەو مرۆڤ بهایێ ژیانێ بزانت،چنكو ئێزدی ل سبان دەمژمێر چاری سبێ رۆژیێ دگرن ونابت هیچ تشتەك بێتە خوارن و ڤەخوارن هەتا دبتە دەمژمێر پێنچی ئێڤاری پشتی پێنجی ئێڤاری خوارن وڤەخوارنێ دخۆن وفتار دبن،ل رۆژا جەژنا رۆژیێن ئێزی جڤاتێن ئێزدیان ل هەموو دەڤەران ل هەڤ كۆم دبن هەكە ئاریشەك دناڤبەرا دوو خێزانان دا هەبت یان دل مانەك،ل جەژنا رۆژیێن ئێزی ئەو ئاریشە دئێتە چارەسەركرن ئەڤە ژ كەڤندا هەبوویە هەتا ئیرۆكە ژی ئێزدی پێگیریێ پێ دكن،و هەر دڤان رۆژا دا هەر كەسەكێ بڤێت خێرەكێ بكت خێرا خۆ دكت و هاریكاریا فەقیر و ژارا تێ كرن و ل دەمێ فتارێ ئانكو بەری فتارێ هەر مالەك هندەك زادی ب خێر لسەر جیرانێن خۆ دا بەلاڤ دكن و ئەڤە ژی ژ كەڤن دا هەبوویە ،پشتی ئێزدی رۆژا سێشەمبوو چارشەمبوو و پێنج شەمبوویێ ب رۆژی دبن و رۆژا چارێ كو دكەفتە رۆژا ئینیێ دبتە جەژن،دجەژنێ دا خەلك قەستا زهمانێن خۆ دكن ل گوندا و هەر كەس دچتە سەر گۆرا مریێ خۆ و خێرێ بەلاڤ دكن و ل گەلەك دەڤەرێن ئێزدیان قەوال ب دەف و شبابا دچنە سەر زەهمانا و پشتی خەلك ژ سەر زەهمانا دزڤرنە مالێ رێورەسمێن جەژنێ دەست پێ دكن و خەلك ب مەرەما پیرۆزكرنا جەژنێ قەستا مالێن هەڤ دوو دكن و شرینیا بسەر هەڤ دا بەلاڤ دكن و جەژنێ لێك پیرۆز دكن و جەژن رۆژەكا خۆشە ل نك هەر ئێزدیەكی.
دبەردەوامیا ئاخفتنا خۆ دا گۆت:چەند فرمان بێنە سەرێ ئێزدیان رێورەسمێن خۆ یێن ئایینی ناهێلن و دێ د بەردەوام بن لسەر گێرانا رێورەسمێن خۆ،بڤێ هەلكەفتێ ژ خودێ مەزن دخوازین سالا بێت دەربەدەر و ئاوارە ب دلەكێ خۆش ڤەگەرنە سەر مالێن خۆ و رێورەسمێن خۆ ل دەڤەرێن خۆ بگێرن،هیڤیخوازن كچ و ژنێن گرتیێن ئێزدی ژ دەستێن تیرۆرستێن داعشێ بێنە رزگاركرن و ب دیتنا كەس و كارێن خۆ شاد ببن و ژ كاسا ئازادیێ تام كن و ژ حكوومەتا هەرێما كوردستانێ و حكوومەتا عێراقێ و جڤاكێ نێڤ دەولەتی و رێكخراوێن خێرخوازی دخوازین خۆ لسەر ڤی بابەتی بێ دەنگ نەكن و بكارێ رزگاركرنا ڤان كچ و ژنان رابن.
دەربارەی بەراوردیا دناڤبەرا جەژنێن نهۆ و یێن بەرێ دا(لوقمان خەلەف)وەلاتیەكێ ئێزدی یە بۆ رۆژناما دەنگێ لالش دبێژت: جەژنا رۆژیا جەژنەكا هەركەڤن یا مللەتێ ئێزدی یە و ژ سەردەمێ باب و كالا دا رێورەسمێن ڤێ جەژنێ تێنە گێران،ئەگەر ئەم بەراوردیێ بكەین جەژنێن بەرێ ژ یێن نهۆ خوشتر بوون چنكو بەرێ مرۆڤ یێ ئارام بوو نە وەكی نهۆ بوو،ل بەرێ بەریا رۆژیا ب هەیڤەكێ خەلكێ ئامادەكاریێن خۆ دكرن و ئەم ب دلەكێ خۆش ل بەندا هاتنە رۆژیان بوون داكو ئەم رۆژیێن خۆ بگرن و رێورەسمێن جەژنا خۆ بگێرن و خەلك هەموو ل هەڤ كۆم دبوون كچا قەستا مالێن باب دكر و كەیف خۆشی بوو،بەری رۆژیا هەر مالەكێ پەزەك خودان دكر و ل رۆژا دووشەمبوویێ ئێڤارا سێشەمبوویێ خەلكێ پەز سەرژێ دكر دگۆتنە وێ رۆژێ رۆژا پەز كوشتنێ و ل هەر سێ رۆژیان خەلكێ گوندا هێڤاران دچۆنە شەڤبێریێن ئێك و دوو دەمێن خۆش دبۆراندن و هەر كەس لسەر كارێ خوە بوو خەلك ب ژیانا خۆ یێ رازی بوو،لێ نهۆ وەك بەرێ نەمایە نیڤەكا ڤان تشتا ل ناڤ جڤاكی دا هاتینە ونداكرن و پێگیریێ پێ ناكن راستە خەلك ئامادەكاریێن خۆ دكن و رۆژیا دگرن لێ نە وەك بەرێ.
تُتاح هذه الصورة أيضا في: کوردی
