كێمیا پەرتۆكان كێشە بۆ قوتابیێن ئاوارێن شنگال دروستكریە
تۆرا لالش یا راگەهاندنێ
قوتابیێن ئاوارێن شنگالێ یێن خووندنا كوردی ل كەمپێن سنوورێ پارێزگەها دهۆكێ ئاماژێ ب وێ چەندێ ددەن كو كێمیا پەرتۆكان ل قوتابخانان كێشە بۆ قوتابیان دروستكریە،داخوازێ ژ پەروەردا شنگال دكن ڤێ كێشێ چارەسەر بكن داكو غەدرە ل قوتابیان نەئێتە كرن.
دەربارەی ڤێ كێشێ(شەهاب ئەحمەد)قوتابیەكی ئاوارەیێ شنگالێ یە بۆ رۆژناما دەنگێ لالش ئاخفت،ئەم وەكو قوتابیێن ئاوارە ب گشتی ژبەر پرسگرێكا نەبوونا پرۆگرامێن خووندنێ دنالن و زەحمەتەكا مەزن دبینن ،ژبەركو خووندن بێ پرۆگرام نابت و ئەم نەچارن ژبەر بەریكا خۆ پرۆگرامان بكرن یان كۆپی بكن،داخوازێ ژ پەروەردێ دكەین ب رۆلێ خۆ رابن و ڤێ كێشا قوتابیان چارەسەر بكن و پەرتۆكا ژبۆ قوتابیان دابین بكن داكو قوتابی بكاربن بەردەوام بن لسەر خووندنا خۆ،لێ ئەگەر هات و پەرتۆك نەئێنە دابینكرن ژبۆ قوتابیان رەنگە كارتێكرنەكا مەزن ل قوتابیان ببت و گەلەك قوتابی ژئەگەرێ نەبوونا پەرتۆكا سالا خۆ یا خووندنێ دووبارە بكن.
لدۆر هەمان كێشەقوتابی (ئەرسەلان حسێن)بۆ رۆژناما دەنگێ لالش خویاكر،ژبەر نەبوونا پەرتۆكا گەلەك ئاستەنگ دكەڤنە دپێشیا مە دا و هەموو قوتابیان پێ چێ نابت لسەر داهاتێ خۆ پەرتۆكا بۆ خۆ بكرن،ژبەركو بتریا قوتابیان هەژارن،لەوما داخوازێ ژ پەروەردا قەزا شنگالێ یا زمانێ كوردی دكەین،كو هەر چ زوویە ڤێ كێشێ چارەسەر بكن داكو غەدرە ل قوتابیان نەئێتە كرن ژبەركو نهۆ قوتابی ژبەر نەبوونا پەرتۆكان درەوشەكا پر زەحمەت دا دەرباز دبن و ئەگەر ئەڤ كێشە نەئێتە چارەسەكرن قوتابیێن ناڤا كەمپان دا دێ تووشی كێشان بن.
تُتاح هذه الصورة أيضا في: کوردی
