كۆنفرانسێ بنگەهێ لالش هاتە گێران
تۆرا لالش یا راگەهاندنێ/دهۆك
ب سەرپەرشتیا سەرۆكێ دەستەیا بلندا بنگەهێ لالش،كۆنفرانسێ سالانە یێ بنگەهێ لالش ب ئامادەبوونا سەرۆك و ئەندامێن دەستەكا بلند و دەستەكێن رێڤەبەر یێن تایی و نڤیسینگەهان هاتە گێران.
ئیرۆ ئینیێ18/1/2019ێ ب سەرپەرشتیا بەرێز”شێخ شامۆ”سەرۆكێ دەستەیا بلندا بنگەهێ لالش كۆنفرانسێ سالانە یێ بنگەهێ لالش ب ئامادەبوونا سەرۆك و ئەندامێن دەستەكا بلند و دەستەكێن رێڤەبەر یێن تایی و نڤیسینگەهان،بۆ هەلسەنگاندنا كار و چالاكیێن سالا2018ێ و بتر رێكخستن و خۆ بەرهەڤكرن بۆ دارێتنا پلانا سالا نوو 2019ێ و باشتركرنا كارێن باش و دەستنیشانكرنا سستی و كێماسیا ژبۆ چارەسەركرنێ وزێدەتر خزمەتكرنا جڤاكی و رەوشەنبیریا ئێزدیان د چارچۆڤێ سیاسەتا نەتەوی و كوردستانێ دا هاتە گێران.
ل دەستپێكێ وەك رێزگرتن بۆ گیانێ جانگۆریێن كوردستانێ و سەروەرێ وان بارزانیێ نەمر و ئدریس بارزانی ئامادەبوویی خۆلەكەكی سەكنین لگەل سرودا ئەی رەقیب،پاشی كۆنفرانسی دەستپێكر و پشتی بخێرئانینا ئامادەبوویان بەرێز”شێخ شامۆ”سەرۆكێ بنگەهی پەیڤەك بڤێ هەلكەفتێ پێشكێشكر و ئاماژە دا رۆلێ بنگەهێ لالش هەر ژ رۆژا دامەزراندنێ بۆ خزمەتكرنا كوردێن ئێزدی ل ئاستێن جودا جودا و چەسپاندنا هەبوونا ناسناما نەتەوی یا كوردێن ئێزدی و بەرسڤدانا هەر كەسەكی پێكۆلا ژناڤبرنا وێ بكت،زێدەباری رۆلێ وی بۆ بەلاڤكرنا رەوشەنبیریا ئێزدیان و رەوشت و تیتالێن ئایینی و رەسەنەتیا فەلسەفا ئایینێ ئێزدیان،هەروەسا تەكەز ل پێكۆلێن هەموو تایی و نڤیسینگەهێن لالش كر سەرەرای هێرشا هۆڤ و درندێن رێكخراوا داعش یا تیرۆرستی دژی ئێزدیان ب شێوەكی گشتی و خەلكێ شنگالێ ب تایبەت،داخواز ژ كارمەندێن تایێن لالش كر پێكۆلێن خۆ زێدەتر بێخنە كار ل قۆناغا داهاتی كو لگەل سەنگ و جیێ بنگەهی لناڤ ئێزدیان و ل دەردۆران بگونجت.
ل پێرا بەرپرسێ پشكا رەوشەنبیری ل بنگەهێ لالش بەرێز”شەمۆ قاسم” راپۆرتا دەستەیا بلندا بنگەهێ لالش پێشكێشكر و گرنگترین چالاكیێن سالا2018ێ پیشاندان،پاش راپۆرتا راگەهاندنا لالش ژبال بەرێز”خدر خەلات”ڤە هاتە پێشكێشكرن.
پاشی راپۆرتێن تایی و نڤیسینگەهێن لالش لدۆر بزاڤ و چالاكیێن ل سالا2018ێ ئەنجام داین هاتنە خووندن و پلانا خۆ بۆ سالا2019ێ راگەهاندن.
ل داویێ دەرگەهێ گەنگەشێ و دانوستاندنێ دناڤبەرا ئامادەبوویان دا لدۆر چالاكیان هاتە ڤەكرن و چەندین پێشنیار لدۆر ئەنجام دانا چالاكیان ل ماوێ ل داهاتی هاتن پێشكێشكرن.
تُتاح هذه الصورة أيضا في: کوردی
