ئێزدى:پەكەكێ و حەشدا شەعبی دڤێت مه ژكورد و كوردستانێ ڤه‌قه‌تينن
وشه
بەرپرسان و كەسایەتیی ئێزیدی رای دەگەیەنن، ئێران هەوڵ دەدات لە رێی پەكەكە و حەشدی شەعبییەوە، ئێزیدی و ناوچەكانیان لە كورد و كوردستان داببڕێت. ئەوان هۆشداری لەو رووەوە دەدەن و ئاماژە بەوە دەكەن ئەو هەوڵە نەك لە دژی كوردستانە، بگرە مەترسی لەسەر چارەنووسی ئێزیدییانیش دروست كردووە.
مەحموود ئێزیدی كەسایەتی سیاسیی، بە”وشە”ی راگەیاند، “پەكەكە و حەشدی شەعبی ئەجێندای وڵاتان لە شنگال و ناوچە ئێزیدینشینەكان جێبەجێ دەكەن، ئەوان دەبێت لەو ناوچەیە بكشێنەوە و دەستێوەردانی تێدا نەكەن.
ئەو كە ئەندامی سەركردایەتیی پارتی دیموكراتی كوردستان و بەرپرسی لقی شێخانی ئەو حزبەیە، زیاتر دەڵێ، “پێشتر دەمانزانی هەبوونی پەكەكە و حەشدی شەعبی كێشە دروست دەكات و لەو رێگەیەوە وڵاتان دەست دەخەنە شنگال، بۆیە دەبێت بەزووترین كات پەكەكە شنگال چۆڵ بكات”.
دووپاتی كردەوە، “خەڵكی شنگال و حكوومەتی هەرێم سوپاسی پەكەكەیان كردووە كە ئەركی خۆی جێبەجێ كردووە، بەڵام چەندان جارە داوا لە پەكەكە دەكەن شنگال چۆڵ بكات، رێز لە حكوومەت و خەڵكی شنگال ناگرن و كێشە دروست دەكەن، منداڵانی ئێزیدی دەڕفێنن بۆ قەندیل و شەڕ دەفرۆشن”.
كەسایەتی و بەرپرسە ئێزیدییەكان دووپات لەوە دەكەنەوە كە “پەكەكە بە ئەجێندای ئێرانەوە لە ناوچەكەدا ئامادەیی هەیە”.
مەحما خەلیل قایمقامی شنگال، بە”وشە” گوتە “ئێران بە هاوكاری پەكەكە و حەشد دەیەوێت شنگال بكاتە دەروازیەك بۆ گەیشتن بە سووریا و كۆنترۆڵی ناوچە ئێزیدییەكان و بەتایبەت شنگال بكات”.
زیاتر دەڵێ، “بەڵام شنگال و ئێزیدییان لەوە تێگەیشتوون كە پەكەكە و حەشد هیچ خزمەت بە كەیسی ئێزیدییان ناگەیەنن، دەزانن كوردستان و حكوومەتی هەرێم كار بۆ ئێزیدی دەكات لە پرسی جینۆساید و هاوكاری رفێنراوەكان و رزگاركردنیان.”
هاوكات حەسەن رەشید قەوال چاودێری سیاسی و كەسایەتی ئێزیدی، بۆ “وشە” ئەوەی خستە ڕوو، “ئەو لایەنانە بە پشتگیری هەندێك لایەنی دەرەوە، دەیانەوێت ئێزیدییەكان و تەواوی پێكهاتەكان دژی كورد و كوردستان بەكار بێنن و بە تایبەت پارتی دیموكراتی كوردستان، بەم كارە هیج خزمەت بە ئێزیدییەكان ناگەیەنێت”.
ئاماژەی دا، “دەبێت ئێزیدییەكان وریا بن و سەرەدەرێكی باش لەم قۆناغەدا ناسكەدا بكەن و خۆیان لەم پیلانە دوور بخەنەوە”.
تُتاح هذه الصورة أيضا في: کوردی
