“دڤێت ئێزدی نەهێلن چ لایەن وان ب دەرفەت ببینن و دحكومەتا كوردستانێ دا هەبوونا خۆ بچەسپینن”
دیدار:بەختیار قادر
رێڤەبەرا دەزگەهێ برایەتی یێ مافێ مرۆڤی ل ئەلمانیا(میدیا دهیر)د دیدارەكێ دا بۆ رۆژناما دەنگێ لالش دیاركر،بۆ پاراستنا هەبوونا ئێزدیان ل عێراقێ دڤێت هەموو شیان بێنە تەرخانكرن ئەو ل جهێن خۆ بمینن و چوو كارەساتێن دی ب سەر وان دا دووبارە نەبن،هەروەسا ئیرۆ ئێزدی نەهێلن چ لایەن وان ئیستغلال كرن ودرێیا پشكداریكرنێ دحكومەتا هەرێما كوردستانێ دا هەبوونا خۆ بچەسپینن وبەرەڤانیێ ژمانا خۆ بكن،ئاشكەراكرژی كو وان چەندین تاوانێن رێكخراوا قاعیدە و بەرەیا نوسرە یێن كوشتن وتالانكرنێ ل دژی ئێزدیان ل سووریا دكیۆمێنتكرینە.
دەربارەی ڤەكرنا دەزگەهێ برایەتی یێ مافێ مرۆڤی(میدیا دهیر)دیاركر،ل مەها ئێك سالا 2013ئەڤ دەزگەهە هاتە ڤەكرن وسێ نڤیسنگەهێن فەرمی ل باژێرێن حەسەكە و قامشلی و كۆبانێ هەنە،ل سالا2015ێ نڤیسنگەهێن نوول كۆبانی و گرێ سپی و تربەسپیێ هاتنە ڤەكرن وتۆرا كۆمكرن وبەلگەكرنا سەرپێچیكرنا مافێ مرۆڤی ل سەر هەموو ئەردێ سوریا هەیە و نڤیسینگەها سەرەكی یا دەزگەهی ل داوییا 2016ێ ل ویلایەتا نورد راین ڤێستڤالن ل وەلاتێ ئەلمانیا هاتە ڤەكرن و لبەرە ل دەمەكێ نێزیك بێتە هەرێما كوردستانێ و هەمەجۆرییا جڤاكی دبینت هێزا هەر جڤاكەكی وپالدەرەكێ سەرەكی یە بۆ پرۆسێسا دیموكراسیێ وبەربەلاڤكرنا ئاشتیێ ل گۆر پرەنسیپێن سەرەكی یێن مافێ مرۆڤی.
ل دۆر بزاڤ وچالاكیێن دەزگەه پێ رابووی ل دۆر ئێزدیان(دهیر)گۆت:ژ دەستپێكا دامەزراندنا دەزگەهی دكارێ خۆ دە داكۆكی ل سەر هەمەجۆری یا ئۆلی و نەتەوەیی كر وبۆ زانین كارمەندێ وێ ژهەموو پێكهاتایە وگرنگیێ ب سێ زمانا ددەت كوردی وعەرەبی وسریانی وزێدەباری ئینگلیزیی ژی،چەندین تاوانێن رێكخراوا قاعیدە و بەرەیا نوسرە یێن كوشتن وتالانكرنێ ل دژی ئێزدیان ل سووریا دكیۆمێنتكرینەل گوندێ دەوروبەرێ كۆبانێ‌ل سالا2013ێ و ب تایبەتی تاوانا گوندێ ئەسەدیێ ئەو یێ چەكدارێن نوسرە دۆرپێچكری،هەروەسا دەمێ داعش هێرش كریە سەر شنگال برێیا دیدارا چەندین تاوانێن وان ل كەمپا نەورۆز و دێركێ تۆماركرن وبەلگەكرن وكارگێریا دەزگەهی ل ئەوروپا پەیوەندی ب نوونەرێن وەزارەتا دەرڤە یا فەرەنسا كر وداخواز ژێكر هاریكارییا ئێزدیان بكن وئەو كریارێن دگەل ژن وكچێن ئێزدیان هاتینە كرن ل رەققە و دێر الزۆر هاتنە رەوانەكرن بۆ دادگەهێن نێڤدەولەتیو زانیاریێن باوەرپێكری پێشكێشی لژنا جڤاتا مافێن مرۆڤی یا سەرپێچیا ل كۆمارا سووریا كرینە ئەو یا راپۆرتەكە تایبەت ل دۆر تاوانێن ب كۆم یێن ئێزدیاندەرئێخستی.
سەبارەت پاشەرۆژا ئێزدیان ل عێراقێ(میدیا دهیر)ئاشكەراكر،عێراق بخۆ وەلاتەكێ نەی ئارامە و ئاژاوەكە تایفگەری لێ پەیدابوویە و ناكۆكی د ناڤبەرا شیعە وسونەیان دا پەیدابوویە ، حكومەتا عیراقێ هەتا نۆكە چ تشتێ بەرچاڤ بۆ كێمینەیا ل عێراقێ نەكریە وگەندەلی ژی لێ یە بەربەلاڤە ولبەر سیبەرا بەربەلاڤبوونا پەیامێن توندرەویێ دێ كێمینەیێن ئۆلی دێ پتر زەرەر مەند بن ، نهۆ ئەم پتر پێتڤی پێگەهاندنا مافێن مرۆڤی نە وداكۆكی ل سەر پرەنسیپێن مافێ مرۆڤی ومافێن كێمینەیا بێتە كرن ، دڤێت كار ل سەر دوو تشتا بێتەكرن هەتا ئێزدی بكارن هەبوونا خۆ بپارێزن ، یێ ئێكێ فشارل سەر حكومەتێن ناڤخۆیی و جڤاكێ نێڤ دەولەتی بێتە كرن وهەموو شیان بێنە تەرخانكرن كو ئێزدی ل جهێن خۆ بمینن دگەل دابینكرنا ژیانەكا ئارام وساخلەم ،یێ دوویێ گرنگییا دیاركرنا مە دگەل جڤاكێن دی ب ئارمانجا بەرەڤانیكرن ژمافێن ئێزدییا ونەدووبارەبوونا كارەساتێن بەری نۆكە یا ل شنگال روودایی،چنكو پتریا وان كەسێن ب ڤان تاوانا رابووین سونەیێن سوریا وعێراقێ بوون ،دیسان دەزگەه گرنگیێ ددەتە هاریكاریێنژیارا رۆژانە لێ ئەڤە نەبەسە،چنكو كەسێ ئێزدی پێتڤی پێگەهاندنێ‌یە دا ژلایێ هزری ویاسایی بێتە ئاڤاكرن وبكارت دپاشەرۆژێ دە داخوازا مافێن خۆ بكت ب تایبەتی ژنا ئێزدی دابكارت ڤی كاودانی دەرباز بكت ، ئەڤ زارۆكێن ژنوو ژدایك دبن ژی فەرە دگەل داب ونەریتێن جڤاكی بێنە گونجاندن وهاریكارییا وان بێتە كرن بتایبەتی ژلایێ سایكۆلۆژی ودەرونی ڤە.
ل سەر رەوشا نهۆ یا ئێزدیان ئاماژەكر كو رەوشا ئیرۆ دخوازت ئێزدیێن ئەوروپا هاریكارییا پەنابەرێن ئێزدی بكن ل كەمپێن هەرێما كوردستانێ و پرۆژێن كاری ل شنگال ڤەكن دا دەلیڤێن كاری بۆ وان پەیدابن ، دڤێت ئیرۆ ئێزدی نەهێلن چ لایەن وان ب دەرفەت ببینن و بكاربینن،لەوا دڤێت پشتگیریێ بدەنە خۆ ودرێیا پشكداریكرنێ دحكومەتا هەرێما كوردستانێ دە هەبوونا خۆ بچەسپینن وبەرەڤانیێ ژمانا خۆ بكن وەك پێكهاتەكی رەسەنێ دەڤەرێ.
تُتاح هذه الصورة أيضا في: کوردی
