تۆرا لالش/ مەھدی حەسەن موراد
پارتی دیموكراتی كوردستان مەزنترین شۆرەشا نیشتیمانی و نەتەوەیی ل 11ی ئەیلولا سالا 1961 ب رابەراتیا بارزانی نەمر کو ب مەزنترین شۆرەشا نیشتیمانی و نەتەوایەتی د دیروکا کوردستانێدا دهێتە دیتن بەرپاكر و بناغه‌كێ موکم بۆ بزاڤا رزگاری خوازا کوردستانێ دانا.
شۆره‌شا ئه‌یلولێ فاکتەری خوراگری و بەرخۆدانێ و ڤەژاندنا کوردایەتی و قوتابخانا کورد پەروەری و فیداکاری و دیموکراسیێ بوو و تۆڤێ هیڤی و باوەرییێ دناڤ مللەتی دا چاند، ئەڤێ دادپەروەریێ و رێبازا بارزانیێ نەمر كو رێبازا راستەقینەیا گەلێ كوردستانێ ھێلا ھەموو پێکهاتێن كوردستانێ سەرێ خو ھلبدەن و رۆلێ خۆ دناڤا شۆرەشێ دا ب گێرن نەخاسمە ئێزدی بتر ھەر كێم ئاین و نەتەوەكێ ل كوردستانێ ھاتبوونە تەپەسەركرن چ ل چەرخێ بۆری و ب تایبەت ل سه‌رده‌مێ ئۆسمانیا گەلەك زۆرداری ل ئێزدیان كرن فرمان ل پێ فرمانێ ل سەر ئێزدیان د ھاتنە راكرن و كەسی خۆ ل ئێزدیان نە دكرە خودان ھەتا دروستبوونا دەولەتا ئێراقێ مەلكی و دەسھەلاتێن خوپەرست ئێزدی پشت گوھ ھاڤێتبون، لەوما ھەر گاڤ د كوڤی بوون و كێم تێكلییا مللەتا د كرن ھەر ب ترس بون.
بەلێ شۆرەشا ئەیلولێ بوو ئومێدەكا ب هێز بۆ گەلێ كورد شیا رێزێن خۆ رێك بێخت و هەموو پێكهاتێن جڤاكی و ئۆلی بێ جوداهی د ئێك سەنگەر دا كوم بكەت ب مەرەما بەرگری كرن ژ هەبوون و مافێن ڕەوا یێن خەلكێ كوردستانێ نەخاسمە ئێزدیان ل ڤێ شۆرەشێ سەرێ خو ھلدان و بۆ جارا ئێكێ كەفتنه قادا خەباتێ و مل بملێ برایێن خۆ یێن بسلمان و مەسیحی كو دزانین شۆرەش شۆرەشا دادپەروەریێ یە و ھەموو ئاین و نەتەوە دێ ب مافێ خو شادبن لەوما ئێزدیان ب ھەموو تەخ و چینێن خۆڤە بوونه پێشمەرگەھـ و قوربانی ل پێناڤی دۆزا گەلێ خۆ دان و دەربەدەربووبنە و خۆ ب خودانێن ئاخ و وەلاتی خۆ دانه زانین.
و ژبەر ڤی رۆلێ ئێزدیان د بزاڤا ئازادیخوازا کوردستانێ و بتایبەت ل شۆرەشا ئەیلولا مەزن كو ئێزدیان رۆلەکی سەرەکی ھەبوو ب هلگرتنا چەکی و قوربانی دانێ و ھاریکاری و پشتەڤانیا پێشمەرگەھی دكر و دەرگەھێ خانیێن خۆ بۆ پێشمەرگەھی ڤەدکرن و ئەرزاق و مالێن خۆ د خزمەتا شۆرەشێ دا دکرن و خۆ ب کوردێن رەسەن دانە زانین و کوردستان ب ئاخ و وەلاتێ خو دانه زانین، ئەڤ چەندە ژی بۆ وێ ھندێ ڤەدگەرێت ئێزدیان باوەریەکا مەزن ب رێبازا پارتی و بارزانی هه‌بوویه.
رێزگرتنا شۆرەشێ و بارزانی ل ئێزدیان و ھەر کێم ئاین و نەتەوەکا ل کوردستانێ ھەیه و ڤێ باوەریێ بۆ ئێزدیان دروست بۆ جارەکا دی تێکلی شۆرەشێ بن و خۆ ل ئاخ و وەلات بکەنه خودان ئەوژی پشتی ڤەقەتیانەکا درێژ دناڤ بەرا ئێزدیان و جڤاکێ دۆرماندۆر دروست بووی ژ ئەنجامێن ئەو فەرمانێن ھاتینه سەرێ ئێزدیان بۆ جارا ئێکێ ل شۆرەشا ئەیلولا مەزن ئێزدیان جارەکا دی باوەری دانه خۆ و ئازاد و سەربەست بژین وەک ھاولاتیێن پلە ئێک ل کوردستانێ.
لەوما میرێ ئێزدیان و بابا شێخ و چەندین مەزن و کەسایەتیێن جڤاکێ ئێزدیان ب ھەموو تەخ و چینێن خۆ ڤە گەھشتنه شۆرەشا ئەیلولا مەزن ل ھەر گوند و باژێرەكی ئێزدی لێ ھەین و داخواز ژ مللەتی کرن چەکێ شەرەفێ ھلگرن دژی ستەم و زۆرداریا بەعسیا و داگیرکەرا ڕاوستن و بەرەڤانیێ ژ کوردستانێ ب کەن، ژبەر ڤی ھەلویستێ ئێزدیان پشتی نەکسا سالا ١٩٧٥ و شۆرەشا کوردی شکەستی ژ ئەنجامێن ئەو خیانەتا ھاتیەکرن کو ئیراقێ نیڤ ئاڤا روبارێ ئەرەبی (شط العرب)دا ئیرانێ بەرامبەر شکەستنا شۆرەشا کوردی و دەستبەرداری وێ رێکەفتنا ھاتیە مۆرکرن لسالا ١٩٧٠ دناڤ بەرا سەرکردایەتیا شۆرەشا ئەیلولا مەزن و دەستھەلاداریا بەعسیا، جارەکا دی ناوڤچەیێن مە ھاتنه داگیرکرن و گەلێ کورد ب گشتی ھاتە دەربەدەرکرن و گوڕزێ ھەرە مەزن ب ئێزدیان کەفت و ئێکەمین پێنگاڤا بەعسیا ھاڤێتی تەعریب کرنا گوندێن ئێزدیان بوو و عەرەب ئینانە سەر گوند و ملک و ئەملاکێن ئێزدیان و ئەڤ ناڤچا زەنگین ب خێر و خێرات و دەخل و دانەکی زۆر ل دەڤەرێن ئێزدیان ھەیی رادەستی عەرەبا کرن و ئێزدی ئینانە خالا سفرێ و بن دەست کرن ل ڤان کۆمەلگەھێن زۆرە مللی ئاکنجی کرن.
کەرب و کینا بەعسیا ل سەر ئێزدیاتیێ و ئێزدیان ڤەدگەرت بۆ وێ ھاریکاری و پشتەڤانیا ئێزدیان بۆ شۆرەشا ئەیلولا مەزن ئەڤا ب سەرۆکاتیا بابێ روحی و نەتەوەیی بارزانیێ نەمر ھاتیەکرن، ھەر چەندە شۆرەشا ئەیلولێ ب شۆرەشەكا سەرانسەری یا هەر چوار پارچێن كوردستانێ دهێتە ناسین، و ئەڤێ شورەشێ بۆ ناڤەندا بەلاڤكرنێ بوو ب هێز كرنا هەست و هوشیارییا نەتەوایەتی و شۆرەشگێری ل سەرانسەری كوردستانێ، ژ ئەنجامێ خەبات و بەرخودان و خوراگریا شۆرەشا ئەیلولێ و سیاسەتا راست و دروستا بارزانیێ نەمر حكومەتا عیراقێ نەچار كربوو دانپێدانێ ب چەندین مافێن گەلێ كورد بكەت و رێكەفتنا 11ی ئادارێ ب مەزنترین دەستكەفتێ ڤێ شۆرەشێ دهێتە هژمارتن.
كەلتورێ پێكڤە ژیانێ و سەقامگیریا سیاسی و ئاشتی و دیموكراسی بۆ عیراقێ ژ ئارمانجێن شۆرەشا ئەیلولێ بوویە، ل سەر ئاستێ نیڤ دەولەتی ژی شۆرەشا ئەیلولێ شیا كێشا كوردی ب جیهانێ بدەتە ناسین، هەروەها شۆرەشا ئەیلولا مەزن مێژویا سیاسی و نەتەوەی یا کوردستانی گەهاندە قوناغەکادی یا سەردەمیانە حكومەت و پەرلەمان و سیستەمێ دیموكراسی و هەلبژارتنێن ئەڤرۆ یێن ئازاد و پێكڤەژیان ل هەرێما كوردستانێ ژ ئەنجامێ خەبات و قوربانی دانا هەردوو شورەشێن ئەیلولا مەزن و گولانا پێشكەفتنخواز و خەلكێ نیشتیمان پەروەر وەرێ كوردستانێ و ژ ئەنجامێ سیاسەتا دروستا پارتی و سەروك بارزانی بوویە.
تُتاح هذه الصورة أيضا في: کوردی
