شوبات 29, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ساکار کامل:پەیڤەك د دەرهەقا (پیر خدرێ سلێمان) دا

پەیڤەك د دەرهەقا (پیر خدرێ سلێمان) دا

ساکار کامل
ب هەر ئاوایەکێ ڕوودایی و چێبوویی، دیرۆک و ئەدەبییاتا ئێزدییان تێرا خوە و زێدەتر ژی یا هاتییە شێواندن و هنداکرن ژ ئەگەرێ وان نەهامەتییێن ب سەرێ وان هاتین و دوو جاران ب توندی باجا ڕوح، وار، ئاڤ و ئاخا خوە دان، ب دەرەجە ئێک وەکو ئۆل و دەرەجە دوو وەک نەتەوە و هەتا نهۆ ژی وێ باجێ ددەن.
هەتا چارئێکا دوماهییا سەدسالا چۆیی ژی ئەدەبییاتا ئێزدییان تەنێ ئەدەبییاتەکا زارەکی بوو، گەلەک ڕۆژهلاتناس و ڤەکۆلەران هژمارەکا قەول و بەیت و ڕێوڕسمێن ئۆلی ب شێواندی یان ژی نەڕەسەن د کتێبێن خوە دا نڤیسین لێ، پتریا وان کتێب و دەستنڤیسان کو نها ژی ل مۆزەخانان دپاراستینە، ڕوویێ ڕاستەقینەیێ ئۆلا ئێزدییان دیارناکەن و گەلەک ب بێسەروبەری هاتینە نڤیسین، من گۆت هەتا چارئێکا دوماهییا سەدسالا چۆیی ژ بەر د وێ چارئێکا دوماهییێدا چەند نڤیسکارێن ئێزدییان شۆڕەشەکە فەرهەنگی، چاندی، ئۆلی و فۆلکلۆری دەستپێکرن و ئەدەبییاتا ئێزدییان ژ ڕکەها سینگێ کالەمێر، پیرەژن، قەوال و زانایێن ئۆلا ئێزدییان دەرئێخستن و وەکو گەنجینەیەکا مەزن پاراستن ژ نەمانێ، ژبەر کو هەتا وێ گاڤێ ژی تەنێ ئەدەبییاتا ئێزدییان لسەر زاری و د سینگێ قەوال، کۆچەک، زانایێن ئۆلی و کالەمێر و پیرەژناندا هاتبوو پاراستن، ژبەر کو د هەر فەرمانەکێدا دەستخەت، مشوور، و کتێبێن ئێزدییان دهاتنە سۆتن لەو ئێزدی ناچاردبوون د سینگێ خوەدە هلبگرن ژ ئەرێ وێ ئێکێ ژی هەر کالەمێرەک ئان ژی ئۆلدار و قەولبێژەکی وەفات کربا ئەو ئەدەبییات ژی دگەل وی بنئاخ دبوو و نەدما.
پیر خدرێ سلێمان و چەند نڤیسکارێن دن کو ب هژمارا تلیانە، د وێ چارئێکێدا، ژ نڤیسکار و ڤەکۆلەرێن پێشین بوون یێن کو بارەکێ گران داینە پشتا خۆ و ئەڤ ئەدەبییاتا نهۆ مایی و ل بەر دەستێ مە پاراستین، هەموو کەد و خەباتا پیری و هەڤالێن دگەل وینە.
ب ئاوایەکێ زەحمەت و سەرەرایی نەبوونا ئالاڤێن پێویست بۆ تۆمارکرنا قەول و بەیتان و ب هەر حالەکێ هەیی، پیر خدرێ سلێمان و هەڤالێن خۆ (نفشێ ئێکێ یێ نڤیسکارێن ئێزدییان) ئەو گەنجینەیا ئەدەبییاتا ئێزدییان ژ هندابوونێ پاراست و کرنە ئەرشیفەکێ مەزن بۆ ئەدەبییاتا کوردی و ڤەکۆلەر و نڤیسکارێن ل پەی خوە ڕە.
کەد و خەباتا پیر خدرێ سلێمان و هەموو وان نڤیسکارێن ئەڤ بارێ گران کرینە پاڕا خوە و ب هێسانی ل بەر دەستێ مە دانی، نائێتە ژبیرکرن و هەتا هەتایێ ئەم دێ شانازییێ پێ بەین.
پیر خدرێ سلێمان بتر ژ دەهـ بەرهەمان هەنە د وارێ ئەدەبییات و ئێزدیناسییێدا.
ئیرۆ گەلەکێ کەیفا مە هات کو پەڕدە ل سەر پەیکەرێ پیر خدرێ سلێمان ژ ئالیێ پارێزگەرێ دهۆکێڤە ل شێخان هاتە لادان و ڕێز ل کەد و ئەمەکا وی هاتە گڕتن.
ل داوییێ ژی ئەز هیڤیدارم قەدرێ قەلەما نڤیسکارێن خودان کەد و خەبات بهێتە زانین و ڕوحا پیرێ مە ژی شاد بت و ڕێیا وی بەردەوام.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi