ئایار 28, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

نایف محمود:گازندا پیرێ‌ و نانێ‌ شڤانی!؟

گازندا پیرێ‌ و نانێ‌ شڤانی!؟
نایف محمود
دیرۆكا كوردان وەسا سەلماندیە كو كورد بەشەكن ژ گەلەكێ‌ ستەم دیدە و زولم لێكری…..هتد، مخابن كو بەختێ‌ مە كوردان ب دڕێژاهیا ساڵان ڕەش بوویە هەلبەت بۆ ڤێ‌ چەندێ‌ نڤیسینەكا تایبەت بۆ مێژوویێ‌ پێ‌ دڤێت و ناچینە دناڤ كوراتییا ڤێ‌ مژارێدا، و دا گەلەك دوور نەچم جارەكێ‌ ئەز ل دیوانا پیرەژنەكا ب ناڤ سالڤەچۆی دا جڤیام و مە چەندەكێ‌ سوحبەت كر، من دیت د دەمەكی دا پیرێ‌ ب هەناسەیەكا بهێن هلمایی و ب ئاخینك و كەلەژانێن خۆ یێن كوور و چاڤێن تژی ڕۆندك ڤە گۆت ئەز گۆڕی ڤی زەمانی و سەر وەختێ‌ هەوە گەلەك یا خۆشە و بێ‌ ماندیبوون و ڕەزالەتە، بەلێ‌ ل سەردەمێ‌ مە ژیان پڕی زەحمەت و ماندیبوون و ترس و نەخۆشی بوو، ژ پێخەمەت چنیەكا نانی و دەبارا ژیانێ‌ كارێ‌ مە ناڤ برنج و ئادەو و دروونا دەخلا و گەلەك كارێن دی یێن كو هەتا نۆكە نیشانێن پەق و برینان ل سەر دەستێن مەنە ئەوژی ژ پێخەمەت پەیداكرنا پاریەكی نانی داكو زارۆیێن مە پێ‌ بژین، پێڤەچۆ و گۆت ئەڤە ژبلی ڤەحەواندنا مێهڤان و كاروانی و خزمەتكرنا پێشمەرگێن شۆڕەشێ‌ ل وی وەختی.
ل ڤێدرەێ‌ من پیرێ‌ ڕاوستاند و گۆتێ‌ ئەرێ‌ وە چ خزمەت پێشكێشی پێشمەرگێن شۆڕەشێ‌ كرییە؟ گۆت هێی هێی ئەزگۆڕی نیڤەكا خوارن و ڤەحەواندنا پێشمەرگان ل سەر ملێن خەلكێ‌ گوندان و ناڤچێن چیایی بوو، هەتا ب ڤی زمانی و ب پەریشانیڤە گۆت واللە ڤێ‌ خاتوونێ‌ د سەروەختێ‌ خۆدا هند نان یێ‌ پاتی و كرییە چانتێ‌ پێشمەرگەیی دا ل وی دەمی داكو شۆڕەش یا بەردەوام بت ژبۆ هندێ‌ زكێ‌ پێشمەرگەیی یێ‌ تێربت و بكارن ب سەر دوژمنان زال بن و ئاخ نامووس و شەرەفا كوردان بپارێزن، مە ژدەستێ‌ وان ڕزگار بكەن.
كوردایەتی و ئاخ و ڤیانا وەڵاتی دسنگێ‌ پیرێ‌ دا مینا ڤۆلكانەكا ئاگرو بوو، مینا ڤیانا جەگەرێ‌ و هێش وێڤەتربوو، ژبەركو تشتێ‌ ئەز ژێ‌ حێبەتی بوویم و پێ‌ داخباربوویم پیرێ‌ ئەڤ سەربۆرە ژی بۆ من ڤەگێرا و گۆت، سپێدەهیەكێ‌ من نان و سەرتوویێ‌ پەزی بۆ كوڕێ‌ خۆ یێ‌ شڤان كرنە دچانتەیی دا بۆ نۆبا خۆ یا بەر پەزی داكو بخۆت، لێ‌ ژنشكەكێ‌ ڤە جۆتەكێ‌ پێشمەرگان ب ڕەخت و تڤەنگڤە ڤە قەستا بەر دەرێ‌ مە كر و نان ژمن خواست، من ژ ب هەموو باوەری و مەردینی و دل پێڤەبوون نان ژ چانتێ‌ كوڕێ‌ خۆ ئینا دەر و هندی مە نان مایە ل مال من پێشكێشی وان كر، دبێژت من گوتە كوڕێ‌ خۆ دای گۆڕی هەڕە بەرپەزی و ئیرۆ بێ‌ نان ب قەتینە یانژی ژ بەهرا هەڤالێ‌ خۆ بخۆ! گۆتێ‌ چنكو من نانێ‌ تە دا پێشمەرگەیی، چ گەرماتی و باوەرییە پیرێ‌ وەسا پەروەردەكری ئەگەر نەڤیانا ئاخا وەڵاتی بت، هەلبەت ب هەزاران پیرەژنێن مینا ڤێ‌ ب هەر ئاوایەكی بت پشكداری د خەبات و تێكۆشان و بەڕەڤانیكرنا دۆزا ڕەوایا گەلێ‌ خۆدا كریە و بەشەك بووینە ژ سەرخستن و بهێز ئێخستنا مۆرالا پێشمەرگەیی د شەڕ و جەنگێن وی دەمیدا، لەورا ژپێخەمەت ڤێ‌ یەكێ‌ هەموو دایك و پیرەژنێن وەڵاتی پێتڤی ب ڕێزگرتن و چاڤ لێ‌ كرنێ‌ نە.
ل داویا سوحبەت و هندەك ژ حەنەكێن پیرا خودان سەربۆڕ بتنێ‌ گازندا پیرێ‌ ئەو بوو و گۆت مخابن ئەم یێن هاتینە ژبیركرن و كەس بهایێ‌ مە نزانت!،بەس ب حەمد و سوپاسیڤە گۆت ئیرۆ ئەم دئازادین و سەرێ‌ مە یێ‌ تەنایە و نانەكی ب خۆشی و رەحەتی دخۆین.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi