ئایار 28, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

عبدالرحمن خشخاشی:دەڤ و دل نەئێكن

دەڤ و دل نەئێكن
عبدالرحمن خشخاشی
گۆتنەك ڕەنگە ڕۆژانە مرۆڤی ژ زاردەڤێ‌ گەلەك كەسێن دەوروبەر گوهـ لێ‌ دبت، مرۆڤ ب خۆ ژی گەلەك جارا ڤێ‌ گۆتنێ‌ دهندەك وەختان دە بكاردئینت، ب تایبەت ل دیوان و شاهی و بەهیان ئەڤ گۆتنە یا بوویە زمانحالێ‌ مە هەموویان و هەر ئێك ژ مە گازندێ‌ ژیێ‌ دی دكەت و كەس ژكەسی یێ‌ رازی نینە و كەس تۆمەتا ڤێ‌ چەندێ‌ ژی نابەتە سەر خۆ.
یا ژ مەڤە هەرئێك ژمە فریشتەیەكە و یێ‌ زەڵالە ژ هەركارەكێ‌ خراب، بتنێ‌ دەوروبەرێن مەنە خرابیێ‌ دگەهیننێ‌ و ڤێ‌ ژیانێ‌ بێ‌ تام دكەن، لێ‌ د راستی دا وەسا نینە و بارا پتریا ژمە بار و پشكێن خۆ دگەل ڤێ‌ چەندێ‌ هەینە، دەڤێ‌ مە تشتەكی دبێژت و دلێ‌ مە ئاوازەكا دی دژەنت، هەروەكو دەڤ و دلا چ پەیوەندی ب ئێكڤە نەیی،ئەڤ دیاردا كۆمەلایەتی گەلەك یا دناڤ كۆمەلگەها مەدا بەربەلاڤبووی و پڕانییا خەلكێ‌ مە زمانەكێ‌ دوو روو یێ‌ هەیی و دلەكێ‌ تژی ژ نەڤیانێ‌ و كەرب و كینا ئێك دوو د سنگی دایە و هندی ل جەم ئێك بن چ گۆمانان ژئێك نابەن، بەلكو ل پشت پەردێ‌ سەد ئاوازێن نەخۆش بۆ ئێك دوو لێ‌ ددەن، هەر كۆمبوون و جڤاتەكا مرۆڤ بچتێ‌ یا ڤالا نابت ژڤان گازندا، ئێك دێ‌ بێژت: دنیایەكا بێ‌ رەحمە كەسی كەس نەڤێت، و ئێكێ‌ دی دێ‌ دەتە دووڤ و دێ‌ بێژت: ئەڤە چی ل مرۆڤێ‌ ڤی سەردەمی هاتییە، یانژی ئەم چەندێن بێ‌ دلۆڤان بووین و دەڤ و دلێت مە نەئێكن و ئاخفتن و كریارێن مە دوو تشتێن هەڤدژن، خۆزی ئەم ل دووڤ زمان خۆشییا زمانێ‌ خۆباین، دا چەند دلێت مە دخۆشبان و پەیوەندیێن مە د گەل ئێك د موكوم بان، دهەمان دەم دا ڕەنگە وی ب خۆ ئەڤ ئێشە ڤێ‌ هەبت و دەڤ و دلێت وی دوو تشتێت ژێك جودا بن و ئەڤە وێ‌ چەندێ‌ نائینتە جەم خۆ چێدبت وی ژی چەندین كێماسی د دەرهەقی ڤی بابەتی دا هەبن و یێ‌ تەخسیر حال بیت سەبارەت وێ‌ یا ئەو دبێژیت.
ئەگەر ئەم هەموو ب ڤی ڕەنگی تەماشەبكەین كو ئەم مرۆڤ بێ‌ كێماسی نە و ژ هەر كێماسییەكێ‌ د دورین و بتنێ‌ مرۆڤێن دەوروبەرێن مەنە ئەڤێ‌ ژیانێ‌ نەخۆش دكەن و ئەو دلساخی و جوامێری و دەڤ خۆشی و دلخۆشیا جاران ل جەم نەمایە،چوو جاران ژ نهۆ وێڤە ئەم خۆزیێن جاران ڕاناهێلین و نابێژین خوزیێت دوهی نەیێن ئیرۆ، بەلكو ڕۆژانە دێ‌ نەفرەتا ل ڕۆژێت خۆ كەین، لەوما دڤێت هەر ئێك ژ مە هزر د شاشی و خالێن خۆ یێن نەرێنی دا بكەت و دەستێ‌ تۆمەتێ‌ بۆ خۆ ژی درێژبكەت و شاشیێن خۆ راستڤە بكەت، داكو ئەم هەموو پێكڤە ببینە ئەو كەسێن راست و دروست و دەڤ و دلێن مە ئێك ئاواز بژەنن و ڕیتمێ‌ ژیانا خۆ بەرەف باشتر ب بەین و دلێن خۆ ب راستییا گۆتنێن خۆ خۆشتر لێ‌ بكەین.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi