سالڤەگەرا جینۆسایدا ئێزدیان و خۆراگریا ئێزدیاتیێ خالەكا رەشە د چاڤێن تیرۆرستێن داعش دا
مەهدی حەسەن
بێشك خۆراگری و بەرخودانا مرۆڤێ ئێزدێ بەرامبەر وان تاوانێن ب سەرێ ئێزدیان هاتین ل دیرۆكێ دا نەخاسمە ئەڤ جینۆسایدا داعش ئەنجامدایی دەرهەقێ ئێزدیان و ئێزدیاتیێ و مللەتێ خۆراگرتی هنەرەكا هەرە مەزنە، و ئەڤا هاتیە سەرێ ئێزدیان ل(3/8/2014)ێ لسەر دەستێ تیرۆرستێن دەولەتا ئیسلامی بناڤێ داعش ب پلانەكا دارێژتی، و خەلكێ شنگالا خۆراگر ب رەنگەكێ هۆڤانە كوشتین و كوشتار دناڤا خەلكێ سڤیلێ شنگالێ دا ئەنجامداین ب هاریكاری و پشتەڤانیا عەرەبێن بێ ئەسل و فەسل بەختێ برایەتیێ و كریڤانیا خوونێ و بیروباوەرێن هندە سالا پێكڤە د بن لنگێن خۆ كرن و كەتن بن راسپاردێن رادیكالێن ئیسلامی یێن ئەفغانیان، ئەو ژی سامانێ ئێزدیان تالانكرن و چەكدارێن دەولەتا ئیسلامی و داعشێن پێخواس ژ بیابانا عەرەبی و جزیرێ و ئەفغانستان هاتین كچ و ژنێن ئێزدیان ب دیاری دانە دەستێ وان و ب هەزاران كچ و ژنێن ئێزدیا ل سوك و قەیسەریان د فرۆتن و سفكاتی ب ئۆلا ئێزدیاتیێ كرن، و ئەڤ خەلكێ بێگونەهێ شنگالێ ژبلی هەژاری و بەلنگازیێ تشتەكێ دن د ژیانێ نەبوویە و ئەڤە چەندین سالن هیڤی و ئۆمێدێن وان بتنی ژیانەكا نۆرمال بوویە و چاڤێن وان ل مال و ملكێن كەسی نەبوویە لێ قەدەرێ جارەكا دن ب دەشت و چیا كەتن پێخواس و برسی بێ نان و ئاڤ ل بەر گەرما هاڤینێ گیانێ خۆ ژ دەستدان و ئەو ژ ئێش و دەردان خلاس دبوون یێ ساخ ماین ژی كەفتنە بن دەرد و ئێش و ژانا.
و ب راستی سێی تەباخێ رۆژەكا رەشە د ژیانا ئێزدیان دا و هەر دێ پێ نالین هەتا د ساخین، مە گوهـ لێ ببوو ژ باب و باپیرێن خۆ بەس مە نەدیت بوو و مە باوەر نەدكر مرۆڤێن وەسا خراب و درندە هەنە، كەسانەك هەیا بناڤێ اللە و ئەكبەر سەرێ كەسانێن خودێناس جارەكا دی ب شیری ژێڤەكەت، و ئەڤ مللەتێ بەری هەزارەها سالا خودێ ناسكری ب كافر ب دەنە ناسین و خۆ ب كورێن پێغەمبەران دیاركەن، بەلێ سوپاس بۆ خودێ مەزن ئەڤێ جارێ هەر زوو دەولەتا وان ب سەرێ واندا هاتە هەرفاندن و شكەستن و د چاڤێ هەر كەسەكی دا شەرمەزار بوون ل جیهانێ هەموویێ و یا هاتیا سەرێ رادیكالێن ئیسلامی یێن عەرەب و تیرۆرستێن داعشێ بۆ مە دلخۆشیەكا مەزن بوو، ئەڤ دەولەتا ئیسلامیا بناڤێ داعش بڤی رەنگی ژ شكەستن و ریسوا و شەرمەزار بوون، هەر ب ڤێ هەلكەفتا هەفت سالیا فرمانا ئێزدیێن شنگالێ و جینۆسایدا ب سەرێ ئێزدیان هاتی ژ خودایێ مەزن دخوازین هەموو جانگۆرین شەرێ داعش و تایبەت یێن بەرەڤانی ژ شنگالێ كرین خودێ وان ب رەحمینت و جیێ وان بەهشت بت و خودێ شیفایەتێ بدەتە هەر بریندارەكی، و چاڤێ هەر زارۆكەكی بێ دایك و باب ماچ دكەین و دەستێ هەر دایك و بابەكێن دلشەوتی ماچ دكەین، خودێ دگەل هەر خێزانەكا قوربانی دای دابت، هیڤیدارین ژ خودایێ مەزن هەر كچ و ژنەكا د دەستێ كافران دا رزگارببن ژبەركو هەتا كچ و ژنێن ئێزدیا رزگار نەبن برینێن مە ئێزدیان سڤك نابن، جیێ ڤان داعش و كافرا دۆزەخ بت، و جارەكا دی كەسەك هزر نەكەت ئێزدی دێ ئێنە ژناڤبرن رۆژا فرمان و كۆمكوژیا مرۆڤان و ژناڤبرنا مللەتان نەمایە، و ئێزدیاتی و ئێزدیخان و ناڤێ تاوسی مەلەك هەر دێ هەبت دەولەت سەرێ كەسانێن دلسۆزێن ئێزدیاتیێ و گەلێ كوردستانێ و بنەمالا بارزان.
هیڤی و مرازێن مە شنگالا عەگید و مێرخاسا و خۆراگران ڤەگەرتە سەردەمێ دەم و بەدیلا و ئێدی شنگالی ب ئازاد و سەرفەرازی بژین، ب راستی ژیانا مرۆڤێ ئێزدی ژیانەكا پر ئێش و ئازار و نەخۆشیە، هندی مرۆڤ ل دیرۆكا ئێزدیان بنێرت بتر ژ نەخۆشیێ تێدا نینە، ل ڤان هەر هەفت سالێن بۆرین ل سەر ڤێ جینۆسایدێ و پشتی هەرفاندنا دەولەتا ئیسلامی و نەمانا داعشێ خەلكێ مە چاڤەرێ ژیانەكا خۆش و تەنایە داكو ل شنگالێ دەرباز بكن،ئێدی دەربەدەری و ژیانا ناڤا كەمپان و كاڤلان و مقەدەر و بەلایێن دنیایێ بەسبن، ژبەركو هەر رۆژ د كەڤن بن پێلەكا بارانێ و لەهیەكێ و سڕ و سەقەما زڤستانێ و گەرما هاڤینێ و سۆتنا چادرا و قیری و گازیێن وان ل سەر كەنالێن راگەهاندنێ ب داوی بێن،لەورا داخواز دكەم هیڤی و داخوازیێن مە بجهـ بێن،لێ جیێ داخێ یە هندەك گرۆپ و پارتێن دەست چێكەرێن داگیركەران بووینە رێگر و نەهێلان خەلكێ شنگالێ ڤەگەرنە سەر عەرد و مال و ملكێن خۆ و شنگالی بێ ئۆمێدكرن ژ هیڤی و مرازێن خۆ، ئەڤە ژی ڤەدگەرت بۆ وێ ڤالاتیا هەی و دەستێن دەرەكی رۆلەكێ خراب د گێرن ل شنگالێ كو هەتا نها ژی ئیدارا شەرعی ڤەنەگەریایە شنگالێ و هێزێن بیانی دەستهەلاتدارن.
خەلكێ مە یێ شنگالێ سال بۆ سالێ بێ ئۆمێد دبن كو ئەڤە هەفت سالان ژین و ژیارا بن كەمپا خۆشتر ژ وارگەهێ خۆ د ڤێنە، ئەڤە ژی كارەساتە مللەتەك ژیانا دەربەدەریێ و كاڤل و كەمپا خۆشتر ناڤ مال و حالێ خۆ بڤێت.
تُتاح هذه الصورة أيضا في: کوردی
