ڕاگه‌هاندنا بنگه‌هێ لالش – سه‌ما

سه‌ربارى هۆشداريێ ژ ئاليێن په‌يوه‌نديدار ڤه‌، هێشتا دياردا قوتكرنا داران ژلايێ كه‌سێن نه‌نياس ڤه‌ ل چيايێ شنگالێ به‌رده‌وامه‌ و رێژه‌يا داران به‌ره‌ف كێميێ ڤه‌ چوويه‌.

سه‌عه‌د حه‌مۆ، ئێك ژ چالاكڤانێن شنگالێ بۆ سه‌ما راگه‌هاند: داران گرنگيه‌كا مه‌زن بۆ ژيان و ژينگه‌ها مه‌ هه‌يه‌، كو ژێده‌رێ سه‌ره‌كى يێ ئۆكسجينێ يه‌ و دار ل زڤستانێ ئاڤێ هه‌لدگرن و ب ڤێ چه‌ندێ رێژه‌يا ئاڤێ ژى ل چيايێ شنگالێ زێده‌ دبت، پرۆسه‌يا قوتكرن وسۆتنا داران بۆ دروستكرنا ره‌ژوويێ يانكو ژينگه‌هێ ژناڤ دبه‌ت.

چالاكڤانى ئاشكراكر: چيايێ شنگالێ ب دار و بار و سروشتێ خۆ يێ جوانه‌، دماوێ 10 سالێن بۆرى دا ب شێوێ قۆناغ و تا نۆكه‌ نێزيكى مليۆن داران ب تايبه‌ت ژلايێ كه‌سێن نه‌نياس ڤه‌ هاتينه‌ قوتكرن ب مه‌ره‌مێن دروستكرنا ره‌ژوويێ، لايه‌نێن په‌يوه‌ندار و عه‌شائيرى ژى پاراستنێ ل سه‌ر ڤان داران ناكه‌ن.

ئاماژه‌ ب وێ چه‌ندێ دا دارێن ل چيايێ شنگالێ ژ جۆرێن به‌رو، كه‌زو سفوك پێك دئێن، ئه‌گه‌ر قوتكرن به‌رده‌وام بت ل سالێن بێت دێ رێژه‌يا داران ل چيايى گه‌له‌ك كێم بت.

دياردا قوتكرنا داران ل چيايێ شنگالێ به‌ره‌ف زێده‌بوونێ چوويه‌، چالاكڤانێن وێ ده‌ڤه‌رێ ژى دخوازن ده‌زگه‌هێن ئێمناهيێ ب رۆلێ خۆ رابن بۆ پاراستنا داران و دياردێ بنبر بكه‌ن و سه‌رپێچكاران سزابده‌ن.