ناڤه‌ڕۆكا كۆمبوونا سه‌رۆك نێچیرڤان بارزانى و سه‌رۆككۆمارێ ئیراقێ
گاڤ
سه‌رۆكایه‌تییا هه‌رێما كوردستانێ راگه‌هاند، سه‌رۆك نێچیرڤان بارزانى و سه‌رۆككۆمارێ ئیراقێ كۆمبووینه و به‌حس ل رێككه‌فتنا حكومه‌تا هه‌رێمێ و حكومه‌تا فیدرالى و مووچه‌یى و بزاڤێن چاره‌كرنا كێشه‌یان كرینه.
سه‌رۆكایه‌تییا هه‌رێما كوردستانێ دیاردكه‌ت، ئه‌ڤرۆ ئێكه‌مبێ 7-4-2024ێ سه‌رۆكێ هه‌رێما كوردستانێ ل گه‌ل د. له‌تیف ره‌شید، سه‌رۆككۆمارێ ئیراقێ كۆمبوویه، د كۆمبوونێ دا ره‌وشا گشتى یا وه‌لاتى، په‌یوه‌ندیێن هه‌ولێر و به‌غدایێ، دوماهى رێككه‌فتنێن حكومه‌تا هه‌رێما كوردستانێ و حكومه‌تا فیدرال ده‌رباره‌یى مووچه‌یێ مووخۆڕێن هه‌رێمێ و بزاڤ بۆ چاره‌كرنا ته‌ماما كێشه‌یێن هه‌ولێر و به‌غدایێ ل سه‌ر بنه‌مایێ ده‌ستوورى و هه‌لبژارتنێن په‌ڕله‌مانێ كوردستانێ كرن.
هه‌ر دو ئالییان دوپاتى ل سه‌ر گرنگییا به‌رده‌وامییا دانوستاندنان و چاره‌كرنا كێشه‌یان و بجهئینانا رێككه‌فتنا هه‌ڤپه‌یمانییا برێڤه‌برنا ده‌وله‌تێ بۆ دامه‌زراندنا حكومه‌تا فیدرال و مسۆگه‌ركرنا مافێن دارایى یێن هه‌رێما كوردستانێ و مووچه‌خۆڕان، دوور ژ كێشه‌یێن سیاسى و هه‌روه‌سا هاریكارى و هه‌ماهه‌نگییا ئالیێن سیاسى بۆ پاراستنا ئارامى و سه‌قامگێرییا وه‌لاتى ژى ب پێدڤى زانى.
سه‌رۆكێ هه‌رێما كوردستانێ دوپاتكر، لێكتێگه‌هشتنا هه‌ولێر و به‌غدایێ و رێككه‌فتنا ل سه‌ر پرسا مووچه‌یى كارڤه‌دانێن ئه‌رێنى ب سه‌ر به‌ره‌ف پێشترنا په‌یوه‌ندیێن هه‌ر دو ئالیان دا دئینیت، هه‌ر د ڤى وارى ژى دا سوپاسییا رۆل و بزاڤێن سه‌رۆككۆمارى بۆ چاره‌كرنا كێشه‌یان كر.
ژ ئالیێ خۆڤه سه‌رۆككۆمارێ ئیراقێ دوپاتى ل گرنگییا پشته‌ڤانییا بجهئینانا كارنامه‌یا حكومه‌تا فیدرال كر و رۆلێ سه‌رۆكێ هه‌رێما كوردستانێ ژى بۆ چاره‌كرنا پرسا مووچه‌یى و بزاڤێن به‌رده‌وام بۆ لێكنێزیككرنا ئالییان و چاره‌كرنا كێشه‌یان ژى بلند نرخاند.
تُتاح هذه الصورة أيضا في: کوردی
