نیسان 21, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

وه‌زاره‌تا ناڤخۆ لێخۆشبوونا 50% بۆ سزایێن ڤیزه‌یێ راگه‌هاند

وه‌زاره‌تا ناڤخۆ لێخۆشبوونا 50% بۆ سزایێن ڤیزه‌یێ راگه‌هاند

گاڤ

وه‌زاره‌تا ناڤخۆ یا هه‌رێمێ لێخۆشبوونا ب رێژه‌یا 50% بۆ سزایێن دارایى یێن ل سه‌ر پارێزه‌ران و كۆمپانیێن دویڤچوونا كاروبارێن ئاكنجیبوونێ و ڤیزه‌یێ بۆ بیانیان و كۆمپانیێن دى یێن كۆدێن ڤیزه‌یێن وان به‌رى رۆژا 31/12/2023 هاتینه‌ راگرتن راگه‌هاند.

وه‌زاره‌تا ناڤخۆ یا هه‌رێما كوردستانێ به‌یانا ژماره‌ 2 یا سالا 2024 كو ئیمزایا رێبه‌ر ئه‌حمه‌د وه‌زیرێ ناڤخۆ ل سه‌ره‌ و ل ئه‌ڤرۆ رێكه‌فتى 19/2/2024 ده‌ركریه‌ به‌لاڤكر و ئه‌ڤا ل خوارێ ده‌قێ وێ یه‌:

“ل گۆره‌ى وێ ده‌ستهه‌لاتا د یاسایا وه‌زاره‌تا ناڤخۆ ژماره‌ 6 یا سالا 2009 دا ب مه‌ هاتیه‌ دان و ئاماژه‌پێدان ب رێنماییا ژماره‌ 1 یا سالا 2021 مه‌ بڕیارا ده‌ركرنا ڤێ به‌یانێ دا:

مادده‌یا ئێكێ: لێخۆشبوون بۆ هه‌مى پارێزه‌ر و كۆمپانیێن دویڤچوونا كاروبارێن ئاكنجیبوونێ و ڤیزه‌یێ و كۆمپانیێن دى یێن كۆدێ ڤیزه‌یا وان ژ به‌ر ئێكلانه‌كرنا چاره‌نڤیسێ وان كه‌سێن بیانى یێن ل سه‌ر ناڤێن وان هاتینه‌ هه‌رێما كوردستانێ هاتیه‌ راگرتن، لێخۆشبوون ب رێژه‌یا 50% یه‌ ل سه‌ر هه‌مى بڕه‌ پاره‌یێن ل سه‌ر كۆدێن وان كه‌فتینه‌ سه‌رئێك.

مادده‌یا دوێ: پێدڤیه‌ ل سه‌ر هه‌مى خۆدان كۆدان د ده‌مێ 90 رۆژان دا ل ده‌ركرنا ڤێ به‌یانێ سه‌ره‌دانا رێڤه‌به‌ریا ڤیزه‌یێ ل دیوانا وه‌زاره‌تا ناڤخۆ ب مه‌به‌ستا پێدانا وان بڕه‌ پاره‌یێن د مادده‌یا ئێك یا ل سه‌رى دا ئاماژه‌ پێ هاتیه‌ دان بكه‌ن.

مادده‌یا سیێ: ئه‌گه‌ر خۆدانێن وان كۆدان پشتى بۆرینا 90 رۆژان وان بڕه‌ پاره‌یێن د مادده‌یا ئێك دا هاتیه‌ به‌حسكرن نه‌ده‌ت، كۆدێن وان ب شێوه‌یه‌كێ ئێكجارى دێ هێنه‌ داخستن و بڕێ وان بارمته‌یێن به‌رانبه‌ر وه‌رگرتنا كۆدى هاتینه‌ دانان دێ بنه‌ داهاته‌كێ دویماهیێ بۆ گه‌نجینه‌یا هه‌رێمێ.

مادده‌یا چارێ: خۆدانێن وان كۆدێن مادده‌یا سیێ یێن خۆ ئێكلانه‌كرین دێ هێنه‌ هنارتن بۆ فه‌رمانگه‌ها بجهئینانێ د وه‌زاره‌تا داد دا ب مه‌به‌ستا دانا جیاوازیا دناڤبه‌را وان بڕه‌ پاره‌یێن ب داهاتێ دویماهیێ دا هاتینه‌ هژمارتن یێن د مادده‌یێ سیێ دا ئاماژه‌ پێ هاتیه‌ دان و وان بڕه‌ پاره‌یێن كو د گرێبه‌ستا پێدانا كۆدێ ڤیزه‌یێ دا د ستۆیێ وان دا دمینیت كو بۆ هه‌ر كه‌سه‌كێ بیانى كو چاره‌نڤیسێ وى نه‌دیاره‌ پێدڤیه‌ بڕێ دو ملیۆن دیناران بده‌ت.

مادده‌یا پێنجێ: خۆدانێن وان كۆدان یێن ل گۆره‌ى ڤێ به‌یانێ خۆ ئێكلا دكه‌ن، كۆدێن وان دێ هێنه‌ ئاساییكرن و دشێن كارێ خۆ ده‌ستپێبكه‌ن و ب تنێ بۆ ئێك جار ژ ڤێ لێخۆشبوونێ مفادار بن، ل ئه‌گه‌رێ نه‌دیاربوونا چاره‌نڤیسێ كه‌سێن بیانى كۆدێن وان ل گۆره‌ى ڤێ رێنماییێ دێ هێنه‌ راگرتن.

مادده‌یا شه‌شێ: ئه‌و بڕه‌ پاره‌یێن كو د ڤێ به‌یانێ دا ئاماژه‌ پێ هاتیه‌ دان دێ چنه‌ سه‌ر ئه‌ژمێرا تایبه‌ت ب ڤیزه‌یێ ڤه‌.

مادده‌یا حه‌فتێ: ئه‌ڤ به‌یانه‌ ل رۆژا ده‌رچوونا وێ دێ هێته‌ بجهئینان و دێ وان هه‌میان ب خۆڤه‌ گریت یێن كۆدێن وان هه‌تا رۆژا 31/12/2024 هاتینه‌ راگرتن و د رۆژنامه‌یا وه‌قائیعى كوردستان دا دێ هێته‌ به‌لاڤكرن.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi