بابه‌كر زێبارى: هه‌ڤپه‌یمانان سوزدایه سیسته‌مێ به‌رگریێ بۆ پێشمه‌رگه‌یی دابین بكه‌ن
گاڤ
فه‌ریقێ ئێكێ بابه‌كر زێبارى، شیره‌تكارێ سه‌ربازیێ سه‌رۆكێ هه‌رێما كوردستانێ، راگه‌هاند؛ ئێكخستنا هێزێن پێشمه‌رگه‌یی ل گۆره‌ى خشته‌یێ دیاركرى برێڤه دچیت، گۆت ژى: هه‌ڤپه‌یمانیا نێڤده‌وله‌تیا دژى داعشێ ب سه‌رۆكاتیا ئه‌مریكا سوزدایه سیسته‌مێ به‌رگریێ بۆ هێزێن پێشمه‌رگه‌یى دابین بكه‌ت.
فه‌ریقێ ئێكێ بابه‌كر زێبارى بۆ مالپەرێ فه‌رمیێ پارتى راگه‌هاند؛ ئێكخستنا هێزێن پێشمه‌رگه‌یى ل گۆره‌ى خشته‌یه‌كى و ب هاریكاریا هه‌ڤپه‌یمانان برێڤه دچیت.
بابه‌كر زێبارى دا زانین ژى، د خشته‌ى دا ئاماژه ب پێكێنانا لیوا و فرقه‌یان هاتیه‌كرن و هه‌یڤانه كار گه‌له‌ك ب رێكوپێكى برێڤه دچیت و گاڤێن باش هاتینه هاڤێتن، نها گه‌له‌ك لیوا هاتینه پێكئینان و نوکە كار لسه‌ر پێكئینانا 2 لیوایێن دى دهێته‌كرن.
زێبارى هه‌روه‌سا دا زانین، نها كار لسه‌ر پێكئینانا 4 فرقه‌یان دهێته‌كرن و پێشنیاز هاتیه‌كرن بۆ فه‌رمانده‌یێن فرقه‌یان و جێگرێن وان و فه‌رمانده‌یێن لیوایان و هه‌ر پۆسته‌كى 2 تا 3 ناڤ بهێنه بلندكرن، ڤێ ئێكێ ژى پێدڤى ب هنده‌ك رێكاران هه‌یه، گه‌له‌ك باش كار لسه‌ر فرقه‌یان دهێته‌كرن و بریاره تا 2026 هه‌مى هێز یه‌كبگرن.
بابه‌كر زێبارى گۆت ژى: “دانانا سیسته‌مێ به‌رگریێ ژ لایێ هه‌ڤپه‌یمانان ڤه گه‌له‌ك گرنگه و نه بتنێ ل ئاسمانى و بگره ژ هه‌مى روویه‌كیڤه مه پێدڤى ب به‌رگریێ هه‌یه، چونكى مه پێدڤى ب هێرشكرنێ نینه و مه پێدڤى ب به‌رگریێ ژ خۆ هه‌یه. هه‌ڤپه‌یمانان ژى سوزدایه سیسته‌مێ به‌رگریێ بۆ پێشمه‌رگه‌ى دابین بكه‌ن، لێ وان ژى پێدڤى ب رازیبوونا یێن دسه‌ر خۆدا هه‌یه”.
تُتاح هذه الصورة أيضا في: کوردی
