“رێككه‌فتن بۆ هنارتنا په‌ترۆلا كوردستانێ هاتیه كرن و ب تنێ به‌ربه‌سته‌ك مایه”
گاڤ
رێككه‌فتن دناڤبه‌را حكومه‌تا هه‌رێما كوردستانێ و حكومه‌تا فیدرالى و كۆمپانیێن په‌ترۆلێ ل هه‌رێمێ بۆ هنارتنا په‌ترۆلا كوردستانێ هاتیه كرن و ب تنێ به‌ربه‌سته‌ك مایه.
ئه‌ندامه‌كێ لژنه‌یا په‌ترۆل و غازێ یا په‌رله‌مانێ ئیراقێ راگه‌هاند كو حكومه‌تا هه‌رێمێ و حكومه‌تا ئیراقێ و كۆمپانیێن په‌ترۆلێ ل هه‌رێمێ پێكڤه روینشتن و رێككه‌فتن بۆ ده‌ستپێكرنا هنارتنا په‌ترۆلا كوردستانێ هاتیه كرن و ب تنێ به‌ربه‌سته‌ك مایه ئه‌و ژى یاسایا بودجه‌یێ بهێته هه‌مواركرن دا كو هنارتنا په‌ترۆلێ ده‌ستپێبكه‌ت.
د. سه‌باح سوبحى بۆ مالپه‌رێ فه‌رمى یێ پارتى دبێژیت “ئاسۆیه‌كێ روهن بۆ ده‌ستپێكرنا هنارده‌كرنا په‌ترۆلا هه‌رێما كوردستانێ بۆ ده‌رڤه هه‌یه و به‌ربه‌ستا ئێكانه ئه‌وه بابه‌تێ تێچوویێن په‌ترۆلێ بهێته لادان و چاره‌سه‌ركرن، ئیراقێ بۆ ده‌رئێخستنا هه‌ر به‌رمیله‌كێ په‌ترۆلێ 6 دۆلار و 80 سه‌نت داناینه و ئه‌ڤه بۆ كۆمپانیێن په‌ترۆلێ ل هه‌رێما كوردستانێ نه‌دادپه‌روه‌ریه‌كا مه‌زنه چونكى ژینگه‌ها كاركرنا كۆمپانیان ل هه‌رێمێ جودایه ژ ناڤه‌راست و باشوورێ ئیراقێ چونكى گرێبه‌ستێن كۆمپانیان ل گه‌ل هه‌رێما كوردستانێ جودایه ژ روویێ تێچوویێن ده‌رئێخستنا په‌ترۆلێ و شێوازێ گرێبه‌ستان ژ یێن ئیراقێ، گرێبه‌ستێن وان چ جۆرێ خزمه‌تگۆزارینه و یێن مه ب جۆرێ هه‌ڤپشكى نه، له‌وا ل گه‌ل هه‌مواركرنا یاسایا بودجه‌یێ پێدڤیه ده‌ستكارى د تێچوویێن په‌ترۆلێ دا بهێته كرن و ژ 6 دۆلار و 80 سه‌نتان بۆ نزیكى 20 دۆلاران بهێته گوهۆڕین، بۆ ڤێ مه‌به‌ستێ ژى، كۆمپانیان كۆمبوون ل گه‌ل وه‌زاره‌تا په‌ترۆلێ یا ئیراقێ كرینه و ئه‌و پێشنیاره داینه ئیراقێ، له‌وا پێدڤیه به‌رى هه‌مواركرنا یاسایا بودجه‌یێ رێككه‌فتن بهێته كرن، ژ لایه‌كێ ڤه په‌یڤا ئینفاقا فعلى بهێته لادان و مووچه بكه‌ڤنه سه‌ر بودجه‌یا حاكیمه و ژ لایه‌كێ دى ڤه، رێژه‌یا تێچوویێن به‌رهه‌مئینانا په‌ترۆلێ بهێته زێده‌كرن، پێدڤیه ئه‌و دو مادده‌یه بهێنه هه‌مواركرن”.
ناڤهاتى زێده ژى كریه “د مادده‌یا 12 یا یاسایا بودجه‌یا ئیراقێ دا هاتیه كو هه‌رێما كوردستانێ رۆژانه 400 هزار به‌رمیلێن په‌ترۆلێ راده‌ستى به‌غدا بكه‌ت لێ پێدڤیه ئه‌و ژى تێچوویێن ده‌رئێخستنا په‌ترۆلێ زێده بكه‌ن، ژ بۆ ڤێ مه‌به‌ستێ ژى حكومه‌تا هه‌رێمێ و حكومه‌تا ئیراقێ و كۆمپانیێن په‌ترۆلێ پێكڤه روینشتینه و رێككه‌فتن هاتیه كرن و پێشنیار بۆ وه‌زاره‌تا په‌ترۆلێ یا ئیراقێ هاتیه كرن، ئه‌و ژى دێ بۆ حكومه‌تا ئیراقێ وێ پێشنیارێ بلند كه‌ت دا كو رازیبوون ل سه‌ر هه‌مواركرنا یاسایا بودجه‌یێ بهێته جێگیركرن و یاسایا بودجه‌یێ بهێته هه‌مواركرن، د نوكه دا چاره‌سه‌ریا وێ پرسێ كه‌فتیه سه‌ر ملێن حكومه‌تا ئیراقێ”.
وى ئه‌ندامێ په‌رله‌مانێ ئیراقێ ئاماژه ب وێ چه‌ندێ ژى كریه كو “حكومه‌تا هه‌رێمێ بۆ ده‌ستپێكرنا هنارتنا په‌ترۆلێ به‌رهه‌ڤى نیشاندایه، توركیا ژى به‌حس ل وێ چه‌ندێ كریه كو بۆرى د به‌رهه‌ڤن و ژ روویێ ته‌كنیكى ڤه كێشه نینن، له‌وا ئه‌و چه‌ندا ماى ئه‌وه یاسایا بودجه‌یێ بهێته هه‌مواركرن و ده‌ست ب هنارتنا په‌ترۆلێ بهێته كرن، بڕیاره د هه‌یڤا بهێت دا یاسایا بودجه‌یێ بهێته هه‌مواركرن”.
هه‌ر ژ 25ى ئادارا سالا بۆرى 2023، پشتى بڕیارا ده‌سته‌یا ناڤبژیڤانیێ یا گرێداى ژوورا بازرگانى یا نێڤده‌وله‌تى ل پاریس ب پێگیركرنا توركیا ب دانا 1.5 ملیار دۆلاران وه‌ك قه‌ره‌بۆ بۆ ئیراقێ ژ به‌ر هنارتنا په‌ترۆلا كوردستانێ ب رێكا توركیا دناڤبه‌را سالێن 2014 و 2018 دا، هنارتنا په‌ترۆلا كوردستانێ راوه‌ستیایه.
سه‌ره‌راى رێككه‌فتنا حكومه‌تێن هه‌رێما كوردستانێ و ئیراقێ ل ده‌ستپێكا هه‌یڤا نیسانێ یا سالا بۆرى ل سه‌ر فرۆشتنا په‌ترۆلا كوردستانێ ب رێكا كۆمپانیا سومۆ یا فیدرالى، هێشتا هنارتن ده‌ستپێنه‌كریه.
تُتاح هذه الصورة أيضا في: کوردی
