سه‌رۆك نێچیرڤان بارزانى: مه ل به‌غدا به‌حسێ قویتێ خه‌لكێ كوردستانێ كر
گاڤ
سه‌رۆكێ هه‌رێما كوردستانێ راگه‌هاند كو د سه‌ره‌دانا خۆ دا بۆ به‌غدا وى بابه‌تێ مووچه‌یێن مووچه‌خۆرێن هه‌رێمێ و قویتێ خه‌لكێ كوردستانێ ل گه‌ل سه‌ركرده و به‌رپرسێن ئیراقێ به‌حسكرن.
سه‌رۆك نێچیرڤان بارزانى به‌رى ده‌مه‌كێ كێم د پرێس كۆنفرانسه‌كێ دا ل به‌غدا راگه‌هاند “بزاڤان دكه‌ین كێشه‌یێن ل گه‌ل به‌غدا چاره بكه‌ین و مه ل به‌غدا به‌حسێ قویتێ خه‌لكێ كوردستانێ كر”.
دیار ژى كر؛ مه دڤێت بابه‌تێ مووچه‌ى ب ریشه‌یى بهێته چاره‌كرن و ئێدى هاتنا مووچه‌یان نه‌بیته نووچه‌یه‌كێ میدیایى، بڕیارا ئه‌ڤرۆ یا ڤرێكرنا پاره‌ى بۆ هه‌رێمێ ده‌ستپێكه‌كا باشه بۆ چاره‌سه‌ریا كێشه‌یان.
گۆت ژى “سوپاسیا محه‌مه‌د شیاع سوودانى سه‌رۆكوه‌زیرێ ئیراقێ ل سه‌ر بڕیارا ئه‌ڤرۆ یا هنارتنا پاره‌ى بۆ هه‌رێما كوردستانێ دكه‌ین”.
سه‌رۆك نێچیرڤان بارزانى زێده‌تر ژى گۆت “ب بۆچوونا مه، حكومه‌تا هه‌رێمێ هه‌مى پێگیریێن خۆ به‌رانبه‌ر به‌غدا بجهئیناینه و پێدڤیه مووچه‌یێن مووچه‌خۆرێن هه‌رێمێ بهێنه دان و نابیت بابه‌تێ مووچه‌ى ببیته بابه‌ته‌كێ سیاسى”.
خۆیا ژى كر “ب تنێ ژ بۆ مووچه‌ى هه‌یڤانه حكومه‌تا هه‌رێمێ پێدڤی ب 875 ملیار دیناران هه‌یه و ئه‌وا ل سه‌ر حكومه‌تا هه‌رێمێ وێ ئه‌نجامدایه”.
راگه‌هاند ژى “مه به‌حس ل بابه‌تێن ئه‌منى كر، درۆن ئاسایشا هه‌رێما كوردستانێ و ئیراقێ تێكدده‌ن، هیڤدارین چاره‌سه‌ریه‌ك بۆ ڤێ كێشه‌یێ بهێته دیتن، پێدڤیه هێرشێن ب درۆنان براوه‌ستن چونكى ئه‌و سه‌قامگیریا هه‌مى ئیراقێ تێككده‌ن”.
گۆت ژى “سوپاسیا فه‌رمانبه‌ر و مووچه‌خۆرێن كوردستانێ دكه‌ین كو گه‌له‌ك د خۆراگر بوون و هیڤدارین وه‌كى هه‌مى مووچه‌خۆرێن ئیراقێ مووچه‌یێن مووچه‌خۆرێن هه‌رێمێ ژى بهێنه دان”.
سه‌رۆكێ هه‌رێمێ ل دۆر هه‌لبژارتنێن هه‌رێما كوردستانێ گۆت “ئه‌نجامنه‌دانا هه‌لبژارتنان شه‌رعیه‌تا سازیێن هه‌رێمێ دئێخیته به‌ر پرسیاران، شانده‌كێ كۆمیسیۆنا بلند یا سه‌ربخۆ یا هه‌لبژارتنان یا ئیراقێ دێ سه‌ره‌دانا هه‌رێما كوردستانێ كه‌ت و ل گه‌ل وان دێ ژڤانه‌كێ نوى بۆ هه‌لبژارتنێن په‌رله‌مانێ كوردستانێ ده‌ستنیشان كه‌ین”.
سه‌رۆكێ هه‌رێما كوردستانێ د سه‌ره‌دانا خۆ دا بۆ به‌غدا دوهى و ئه‌ڤرۆ ل گه‌ل ژماره‌یه‌كا سه‌ركرده و به‌رپرس و سه‌رۆكێن هه‌ڤپه‌یمانیێن سیاسى یێن ئیراقێ كۆمبوو.
تُتاح هذه الصورة أيضا في: کوردی
