شوبات 27, 2024

Lalish Media Network

صحيفة إلكترونية يومية تصدر باشراف الهيئة العليا لمركز لالش الثقافي والاجتماعي في دهوك - كوردستان العراق

ناڤەرۆکا گۆتار و کۆمبوونێن سەرۆک نێچیرڤان بارزانی ل بەغدا

ناڤەرۆکا گۆتار و کۆمبوونێن سەرۆک نێچیرڤان بارزانی ل بەغدا
گاڤ

سەرۆک نێچیرڤان بارزانی ئەڤرۆ پشکداری مەراسیمێ سالڤەگەرا تیرۆرکرنا محەمەد باقر حەکیمی بوو و د گۆتارەکێ دا بەحسا رەوشا هەرێما کوردستانێ و ئیراقێ و چەوانیا چارەکرنا کێشەیێن د ناڤبەرا هەردو حکومەتا دان دا کر.

نێچیرڤان بارزانی، سەرۆکێ هەرێما کوردستانێ ئەڤرۆ ل دویڤ داخوازا عەمار حەکیم، سەرۆکێ رەوتا حیکمە، چوو بەغدایێ و د مەراسیمێن سالڤەگەرا تیرۆرکرنا محەمەد باقر حەکیمی دا پشکدار بوو.

د چارچووڤەیێ پشکداریێ دا، سەرۆک نێچیرڤان بارزانی د گۆتارەکێ دا ئاماژە دا گرنگیا ژبیرنەکرنا شەهیدان و گۆت: ئاڤەدانکرنا وەلاتی رێزگرتنە ل خوینا شەهیدان و بۆ ئاڤەدانیێ، پێدڤیە ئالیێن سیاسی یێن ئیراقی رێزێ ل دەستوورێ ئیراقێ بگرن و دەستووری بجهـ بینن.

سەرۆکێ هەرێما کوردستانێ هەروەسا گۆت: مەلا مستەفا بارزانی، ئدریس بارزانی، و سەرۆک مەسعوود بارزانی پەیوەندیێن بەردەوام ل گەل ئایەتوللایێن ئیراقێ و ئۆپۆزسیۆنا ئیراقی یا ل سەر دەمێ رژێما بەعس دا هەبوون و گەلێ کورد فەتوایێن ئایەتوللایێن شیعی ل سالێ شێستان و حەفتێیان ژ چەرخێ بۆری یێن حەرامکرنا کوشتنا پێشمەرگەی و کوردان ژبیر ناکەت.

د ڤێ مەراسیمێ دا، محەمەد شیاع سوودانی، سەرۆکوەزیرێ ئیراقێ، د. عەبدوللـەتیف رەشید، سەرۆککۆمارێ ئیراقێ و پتریا سەرکردە و سیاسی یێن ئیراقێ مینا نووری مالکی، حەیدەر عەبادی، هادی عامری، قەیس خەزعەلی، محەمەد حەلبۆسی، خەمیس خەنجەر و فائق زێدان و ب دەهان کەسێن دی، دپشکداربوون، لەورا سەرۆک نێچیرڤان بارزانی ب دەلیڤە زانی داخواز ژ وان بکەت تاکە پارێزەرێ ئیراقێ کو دەستوورێ وێ یە، بجهـ بینن.

نێچیرڤان بارزانی، سەرۆکێ هەرێما کوردستانێ د گۆتارا خۆ دا تیشک خستە سەر کێشەیێن نوکە د ناڤبەرا حکومەتا هەرێما کوردستانێ و حکومەتا فیدرال دا هەین و گۆت: نەبوونا بودجێ و مووچەی، رەوشا وەلاتیێن هەرێما کوردستانێ گەلەک خراب کریە و کارتێکرن ل پێشڤەچوونا هەرێما کوردستانێ ژی کریە.

سەرۆک نێچیرڤان بارزانی، پەسنا رۆلێ محەمەد شیاع سوودانی د پێشڤەبرنا پێگەهێ ئیراقێ دا دا، لێ د هەمان دەم دا، رەخنە ژی لێ گرتن و گۆت: سوودانی سەرۆکێ هێزێن چەکدار یێن ئیراقێ یە، لێ هندەک گرۆپێن چەکدار بەردەوام هێرش دکەنە سەر هەرێما کوردستانێ و ئەڤە بوویە ئەگەر کارتێکرن ل ئاساییش و سەقامگیریا هەرێما کوردستانێ و ئیراقێ ببیت.

سەرۆکێ هەرێما کوردستانێ دەربارەی هەبوونا هێزێن ئەمریکی و هەڤپەیمانان ل ئیراقێ خۆیا کر: هێزێن هەڤپەیمانان ل دویڤ داخوازیا ئیراقێ بۆ شەڕێ ل دژی داعشێ هاتبوونە ئیراقێ و نوکە ژی پێدڤیە سوودانی ب رێککەفتن ل گەل وان چارچووڤەیێ یاسایی یێ مان یان دەرکەفتنا وان هێزان دیار بکەت.

نێچیرڤان بارزانی، سەرۆکێ هەرێما کوردستانێ د دویماهیا گۆتارا خۆ دا گۆت: ئاساییش و سەقامگیریا هەرێما کوردستانێ و ئیراقێ ژ هەموو تشتان گرنگترە و ئەو یەک ب دانوستاندن و رێککەفتن دهێتە پاراستن.

ده‌قێ گۆتارا سه‌رۆكێ هه‌رێما كوردستانێ:

ب ناڤێ خودێ به‌خشنده‌ و دلۆڤان

ئاماده‌بوویێن رێزدار

رۆژباش

ئه‌ڤرۆ پێكڤه‌ د بیره‌وه‌ریه‌كا گرنگ دا پشكدارین كو رۆژا شه‌هیدێ ئیراقێ و یادا (21) سالیا شه‌هیدكرنا ئایه‌توللا محەمەد باقر حەکیمه‌ (قدس سره‌). گه‌لێ ئیراقێ بۆ رزگاربوونێ ژ بنده‌ستیێ و ژ ناڤبرنا تیرۆرێ گه‌له‌ك شه‌هید داینه‌، باشترین وه‌فادارى بۆ یاد و گیانێ شه‌هیدان، گه‌شه‌پێدانا ئاڤه‌دانیێ و خۆشكرنا ژین و ژایارا خه‌لكێ ئیراقێ و دابینكرنا پاشه‌رۆژه‌كا گه‌شه‌ بۆ نڤشێ نها و پاشه‌رۆژێ.

شەهیدێ میحرابێ، شەهیدێ دەستێ تیرۆرێ، ئایەتوللا محەمەد باقر حەکیم، ل دویرى وه‌لاتى، رێبه‌ر و هانده‌ره‌كێ سه‌ره‌كیێ ئێكبوونا خه‌بات و كارێ پێكڤه‌ یێ ئالیێن ئوپۆزسیۆنا ئیراقێ بوو، ئێكبوونا وى ده‌مى بۆ رزگاركرنا ملله‌تى بوو ژ ته‌په‌سه‌رى و دكتاتۆریێ.

نها كو ئه‌م ل ئیراقا ئازادكرى ژ دكتاتۆریێ، بیره‌وه‌ریا شەهید ئایەتوللا محەمەد باقر حەکیم دكه‌ین، دڤێت ب دو ره‌نگان، ب كریار وه‌فاداریا خۆ بۆ نه‌هێلانا شه‌هیدێ میحرابێ و هه‌مى شه‌هیدان نیشان بده‌ین. ئه‌و ژى ب نه‌هێلانا هه‌مى ره‌نگێن ته‌په‌سه‌ریێ و بێدادیێ، دگه‌ل دویركه‌فتنا هه‌مى حزب و ئالیێن سیاسى ژ ڤه‌گوهاستنا هه‌ڤڕكى و ناكۆكیێن سیاسى یێن دناڤبه‌را وان دا بۆ ناڤا جڤاكى و نه‌ته‌وه‌ و پێكهاته‌یێن دى یێن ئیراقێ.

پێكڤه‌كاركرن و ئێكه‌تیا د ناڤبه‌را شەهیدێ میحرابێ و بابێ من خودێ ژێرازى ئیدریس بارزانى دا هه‌روه‌سا دگه‌ل جه‌نابێ سه‌رۆك مه‌سعوود بارزانى و سه‌رۆكێ وه‌غه‌ركرى خودێ ژێ رازى مام جه‌لال و ئالی و سه‌ركرده‌یێن دى یێن ئوپۆزسیۆنا ئیراقێ دا، ل وى ده‌مى ڤیانا د ناڤبه‌را گه‌لێ ته‌په‌سه‌ر یێ ئیراقێ دا بهێز دكر.

ئه‌م نڤشێن پشتى وان ژى دڤێت وێ ڤیانێ بهێزتر لێبكه‌ین، نه‌ك تێكبده‌ین، بهێزكرنا وه‌كهه‌ڤى و ڤیانێ د ناڤبه‌را نه‌ته‌وه‌ و پێكهاته‌یێن ئیراقێ دا رێكا رابه‌ر و سه‌ركرده‌یێن مه‌یه‌، به‌ره‌ڤاژیا وێ رێكا وان نینه‌ و دژى رێبازا وانه‌.

ئه‌وا رێبه‌رێن خه‌بات و بزاڤا مه‌یا سیاسى دكر، ژ پاشخان و كویراتیه‌كا مه‌زن دهات، زانا و رێبه‌رێن مه‌ یێن ئاینى، ب زانست و زانینا خۆ، نێرینگه‌هه‌كا به‌ر‌فره‌هـ ومرۆڤایه‌تى هه‌بوو، ژ به‌ر ڤێ ئێكی ژى مه‌رجه‌عیه‌تا مه‌زن یا نه‌جه‌فێ په‌یوه‌ندیه‌كا باش دگه‌ل بارزان و زانایێن كوردستانێ ب گشتى هه‌بوو.

رێبه‌رێ شۆڕشا كوردستانێ خودێ ژێ رازى مه‌لا مسته‌فایێ بارزانى، په‌یوه‌ندیه‌كا به‌رده‌وام دگه‌ل مه‌رجه‌عیه‌تا بلند ل ئیراقێ هه‌بوو، فه‌توایێن ئایه‌توللا عوزما محسن حه‌كیمى، دگه‌ل ئایه‌توللا عوزما محه‌مه‌د باقر سه‌در ل سالێن 1965ێ و 1974ێ ل ژێر حوكمێ دكتاتۆریێ، بێى گوهێ بده‌نه‌ گه‌فێن لسه‌ر ژیانا خۆ، فه‌توایێن گه‌له‌ك هه‌قپه‌رست بوون. وان دو لێڤه‌گه‌ر‌ێن مه‌زن فه‌توایا حه‌رامكرنا شه‌ڕێ كوردان و پێشمه‌رگه‌یێ كوردستانێ دا، گه‌لێ كوردستانێ چ جاران وان فه‌توایێن دیرۆكى و هه‌لوه‌ستێن وان ژبیر ناكه‌ت.

ئه‌ڤ بیرهاتنه‌ د گرنگن، داكو ئه‌م هه‌مى نها ژى ب كریار، وى رابۆریێ خۆ یێ جوان بپارێزین، ئه‌و رابۆرى كو ب نێرینگه‌هه‌كا به‌رفره‌هـ و ب هه‌بوونا په‌یوه‌ندی و ڤیانێ دورستبوویه‌، نابیت ب به‌لاڤكرنا كه‌رب و كین و دوبه‌ره‌كیێ نها و پاشه‌رۆژا مه‌ تێك بچیت، به‌لكو دڤێت ب ڤیانێ و پێشڤه‌برنا هه‌ڤپشكیێن خۆ بهێزتر لێبكه‌ین.

ئاماده‌بوویێن رێزدار..

ژ بلى وى رابۆرى، ئه‌ڤرۆ مه‌ ژێده‌ره‌كێ گرنگ و مه‌زن یێ یاسایی هه‌یه‌ بۆ پێشكه‌فتن و بهێزكرنا پێكڤه‌ژیانا هه‌ڤپشك یا پێكهاته‌یێن ئیراقێ، ژ سالا 2005ێ مه‌ ده‌ستوور هه‌یه‌، روحا ده‌ستوورى: دیمۆكراسى، دادپه‌روه‌رى لێكڤه‌كرنا ده‌ستهه‌لاتان و سیسته‌مێ فیدرالى یه‌، بجهئینانا ده‌ستوورى وه‌كى خۆ، رابۆریێ جوانێ جڤاكا مه‌ دپارێزیت، نها و پاشه‌رۆژا مه‌ژى باشتر لێ دكه‌ت.

ژبه‌ر ڤێ ئێكی ل ڤێرێ كو گه‌له‌ك ژ رێزداران سه‌ركرده‌ و به‌رپرسێن مه‌زنێن ئیراقێ د رووینشتینه‌، داخوازێ دكه‌م ئه‌م هه‌مى پێكڤه‌، پێگیرى وى ده‌ستوورى بین. ده‌ستوور، وه‌كهه‌‌ڤیا هه‌مى پێكهاته‌ و هه‌رێم و پارێزگه‌هێن ئیراقێ و سه‌قامگیریا وه‌لاتى دپارێزیت.

رێزداران..

نها ژبه‌ر نه‌بوونا بودجه‌ و موچه‌ی ل هه‌رێما كوردستانێ، فه‌رمانبه‌ر و خه‌لك د ره‌وشه‌كا گه‌له‌ك خراب دا دژین، ڤێ ئێكێ كاریگه‌ریه‌كا گه‌له‌ك خراب لسه‌ر هه‌مى كه‌رتان ل هه‌رێما كوردستانێ كرى یه‌. گه‌له‌ك پێدڤى یه‌ ئه‌ڤ كێشه‌یا مه‌زن بله‌ز بهێته‌ چاره‌كرن، ئه‌ڤه‌ژى به‌رپرساتیا مه‌ هه‌میانه‌، چونكى هه‌رێما كوردستانێ و فه‌رمانبه‌رێن وێ، پشكه‌كن ژ ئیراقێ.

ژبه‌ر ڤێ ئێكێ داخوازێ ژ هه‌مى سه‌ركرده‌یێن ئالیێن سیاسى، فراكسیۆنان و هه‌مى ئه‌ندامێن جڤاتا نوینه‌رێن ئیراقێ دكه‌م، پشته‌ڤان بن بۆ چاره‌سه‌ركرنا كێشه‌یا بودجه‌ و موچه‌یێ فه‌رمانبه‌رێن هه‌رێما كوردستانێ.

رێزداران..

حكومه‌تا ئیراقا فیدرال ب سه‌رۆكاتیا برایێ مه‌ یێ رێزدار، محه‌مه‌د شیاع سودانى، ب باشى كارێ خۆ كریه‌، ڤێ ئێكێ ژى پێگه‌هێ ئیراقێ بهێز لێكرى یه‌، ئه‌و ئاوایێ كاركرنێ دشێت پێگه‌هێ ئیراقێ بهێزتر ژى لێبكه‌ت، لێ بنپێكرنا ده‌ستهه‌لاتێن فه‌رمانده‌یێ گشتى یێ هێزێن چه‌كدارێن ئیراقێ ب هێرشان بۆ سه‌ر هنارتیێن دپلۆماسى و هێزێن هه‌ڤپه‌یمانان و پێشمه‌رگه‌ى، دێ كارێ حكومه‌تێ تێكده‌ن و ئالۆزیه‌كا مه‌زن و ته‌ڤئالى ل ئیراقێ دورستكه‌ن.

وان هێرشان زیانه‌كا مه‌زن گه‌هاندیه‌ ئاسایش و ژیانا خه‌لكێ كوردستانێ، بووینه‌ ئه‌گه‌ر نه‌ ئارامى ل هه‌مى بازاڕێ ئیراقێ به‌لاڤ ببیت، هه‌روه‌سا ده‌رفه‌ت دایه‌ تیرۆرستێن داعشێ هێرشێن خۆ پتر لێبكه‌ن.

هێزێن هه‌ڤپه‌یمانان لسه‌ر داخوازا ئیراقێ بۆ به‌رهنگاربوونا داعشێ هاتینه‌، پێدڤى یه‌ ده‌رفه‌ت ب حكومه‌تا فیدرال و رێزدار سه‌رۆكێ وه‌زیران سودانى بهێته‌ دان، ل گۆره‌ى پلانه‌كا هه‌ڤپشك د زه‌مینه‌یه‌كا ئارام و بێ كێشه‌ دا دانوستاندنێ دگه‌ل بكه‌ت بۆ رێككه‌فتن لسه‌ر پاشه‌رۆژا هاریكاریێن نێڤبه‌را هێزێن هه‌ڤپه‌یمانان و ئیراقێ.

ئیراق ده‌وله‌ته‌كا خودان سازیێن نیشتیمانى یه‌، دڤێت ئه‌و سازى كارێ خۆ بكه‌ن، به‌ره‌ڤاژى خه‌لكێ ئیراقێ دێ كه‌ڤیته‌ د كێشه‌ و ئالۆزیێن نوى دا، د ده‌مه‌كى دا ئیراقێ نها پتر ژ هه‌ر تشته‌كی دى پێدڤى ب وێ ئێكێ هه‌یه‌ سه‌قامگیریا وێ نه‌هێته‌ تێكدان.

ل دویماهیێ، سپاسیا برایێ خۆ یێ رێزدار سەید عەممار حەکیم دكه‌م، بۆ رێكخستنا ڤێ رێوره‌سمێ، سلاڤان دهنێرم بۆ روحا پاقژ یا شه‌هێدێ میحرابێ ئایەتوللا محەمەد باقر حەکیم و روحا خودێ ژێ رازى سەید عەبدولعەزیز حەکیم و هەمى شەهیدێن ئیراقێ.

هیڤیا سه‌ركه‌فتنێ بۆ هه‌وه‌ هه‌مى ئالیه‌كى دخوازم.

گه‌له‌ك سپاس ..

سەرۆک نێچیرڤان بارزانی و سوودانی چەندین تەوەرێن گرنگ گۆتوبێژ کرن

سەرۆکێ هەرێما کوردستانێ و سەرۆکوەزیرێن ئیراقێ ئەڤرۆ کۆم بوون و دانوساندنێن رژد دەربارەی کێشەیێن د ناڤبەرا هەولێرێ و بەغدایێ دا کرن.

سەرۆکاتیا هەرێما کوردستانێ راگەهاند: نێچیرڤان بارزانی، سەرۆکێ هەرێما کوردستانێ و محەمەد شیاع سوودانی، سەرۆکوەزیرێن ئیراقێ ئەڤرۆ ل بەغدایێ کۆم بوون و د کۆمبوونێ دا دانوستاندنێن رژد دەربارەی گاڤێن حکومەتا هەرێما کوردستانێ و حکومەتا فیدرال بۆ چارەکرنا کێشەیێن گرێدای بودجێ و مووچەی و هناردەکرنا پەترۆلا هەرێما کوردستانێ و ژمارەکا بابەتێن کارگێری و دارایی و ئابۆری کرن و هەردو ئالی دهەڤڕابوون کو پێدڤیە ئەو کێشە د چارچووڤەیێ دەستووری دا چارە ببن و چارەیەکا ب ئێکجاری بۆ پرسا مووچەیێ مووچەخۆرێن هەرێما کوردستانێ بهێتە دیتن.

هەر د کۆمبوونا ئەڤرۆ دا، سەرۆک نێچیرڤان بارزانی و سوودانی دوپاتی ل پاراستنا ئارامی و سەقامگیری و سەروەریا ئیراقێ و دویرکرنا وێ ژ کێشە و ئالۆزیێن دەڤەرێ کر.

سەرۆک نێچیرڤان بارزانی ل گەل محەمەد حەلبووسی کۆمبوو

ئەڤرۆ رۆژا شەمبی سەرۆکێ هەرێما کوردستانێ د چارچووڤێ سەرەدانا خۆ دا ل بەغدا ل گەل سەرۆکێ حزبا تەقەدوم کۆمبوو.

ل گۆرەی بەیانەکا سەرۆکاتیا هەرێما کوردستانێ، سەرۆک نێچیرڤان بارزانی و محەمەد حەلبووسی، رەوشا سیاسی و ئەمنی یا ئیراقێ، هەروەسا پەیوەندیێن هەولێر و بەغدا، دانوستاندنێن چارەکرنا کێشەیێن هەلاویستی بەحسکرن و گرنگی دا بابەتێ گەف و مەترسیێن تیرۆر و دەڤەرێ ب گشتی ژی.

هەروەسا هاتیە، هەردو ئالی هەڤبوچوونبوون ل سەر گرنگیا هاریکاریا ئالیێن سیاسی بۆ بەرهنگاربوونا ئاستەنگیێن نوکە و پاراستنا سەقامگیریا سیاسی و دویربوونێ ک تێکچوونا رەوشا ئالۆزا دەڤەرێ.

ئەنجامێن هەلبژارتنێن جڤاتێن پاریزگەهێن ئیراقێ و دەڤەرێن مادەیێ 140 یێ دەستووری ژی تەوەرەکێ دی یێ کۆمبوونا وان بوو.

سەرۆک نێچیرڤان بارزانی ل گەل سەرۆکێ جڤاتا بلندا دادوەری یا ئیراقێ کۆمبوو

سەرۆکێ هەرێما کوردستانێ ئەڤرۆ ل بەغدا ل گەل فایەق زێدان، سەرۆکێ جڤاتا بلندا دادوەری یا ئیراقێ کۆمبوو و هاریکاریا د ناڤبەرا دەستهەلاتا دادوەری یا ئیراق و هەرێما کوردستانێ دا و پێدڤیا پاراستنا ئارامی و سەقامگیریا وەلاتی بەحس کر.

ل گۆرەی بەیانەکا سەرۆکاتیا هەرێما کوردستانێ، هەردو ئالیان دوپاتی ل رۆل و پێگەهێ دەستهەلاتا دادوەری و هاریکاریا وێ بۆ چارەکرنا کێشەیێن وەلاتی کر، هەروەسا ئاماژە دا هێرشێن سەر هنارتیێن دپلۆماسی و هێزێن هەڤپەیمانان و ئارمانجکرنا هێزێن پێشمەرگەیی.

دەربارەی ڤێ یەکێ هەردو ئالی هەڤبوچوونبوون کو پێدڤیە ئارامی و ئاسایشا وەلاتی یا پاراستی بیت و ئیراق نەکەڤیتە د ناڤ کێشە و ئالۆزیێن دەڤەرێ، هەروەسا ئارمانجکرنا هێزێن پێشمەرگەیی ب زیان بۆ ئارامی و سەقامگیریا ئیراقێ ل قەلەم دا.

سه‌رۆك نێچیرڤان بارزانى و مالكى دوپاتیێ ل سه‌ر چاره‌كرنا كێشه‌یان ل گۆره‌ى لێكتێگه‌هشتنان و ده‌ستوورى دكه‌ن

گاڤ

سه‌رۆكێ هه‌رێما كوردستانێ و سه‌رۆكێ هه‌ڤپه‌یمانیا ده‌وله‌تا یاسایێ دوپاتى ل سه‌ر چاره‌كرنا كێشه‌یێن هه‌ولێر و به‌غدا ل گۆره‌ى لێكتێگه‌هشتنان و ده‌ستوورى كرن.

سه‌رۆك نێچیرڤان بارزانى ئه‌ڤرۆ چارشه‌مبیێ د درێژیا دیدار و كۆمبوونێن خۆ دا ل به‌غدا ل گه‌ل نورى مالكى سه‌رۆكێ هه‌ڤپه‌یمانیا ده‌وله‌تا یاسایێ كۆمبوو و هه‌ردو لایان دویماهیك پێشهاتێن ره‌وشا سیاسى و ئه‌منى ل ئیراقێ و كێشه‌یێن هه‌ولێر و به‌غدا به‌حسكرن.

سه‌رۆكاتیا هه‌رێمێ به‌لاڤكریه‌ “هه‌ردو لایه‌ن د هه‌ڤرا بوون كو پێدڤیه‌ لایه‌نێن سیاسى و پێكهاته‌یێن ئیراقێ ب هاریكاری و ئێكگرتنێ رویبروى ئالنگاریێن ڤێ قووناغێ و ره‌وشا ئالۆزا ده‌ڤه‌رێ و گه‌ف و مه‌ترسیێن تیرۆرێ ببن، بۆ ڤێ مه‌به‌ستێ ژى پێدڤیه‌ ئیراق نه‌كه‌ڤیته‌ دناڤ ئالۆزیێن ده‌ڤه‌رێ دا و هه‌مى لایه‌ن به‌رژه‌وه‌ندیا بلند یا وه‌لاتى بپارێزن”.

سه‌رۆكاتیێ دیار ژى كریه‌ “ل دۆر به‌رده‌وامیا دانوستاندنێن حكومه‌تا فیدرالى و حكومه‌تا هه‌رێمێ بۆ چاره‌سه‌ركرنا كێشه‌یێن هه‌ولێر – به‌غدا، هه‌ردو لایان دوپاتى ل سه‌ر چاره‌كرنا كێشه‌یان ب لێكتێگه‌هشتنێ و ل سه‌ر بنیاتێ ده‌ستوورى كرن ب شێوه‌یه‌كێ ماف و شایسته‌یێن هه‌مى پێكهاته‌یان د پاراستى بن”.

به‌یانا سه‌رۆكاتیا هه‌رێمێ زێده‌ ژى كریه‌ “هێرشێن درۆنى ل سه‌ر هه‌رێما كوردستانێ، په‌یوه‌ندیێن ئیراقێ و وه‌لاتێن جیران، گه‌فێن داعش و ده‌رئه‌نجامێن شه‌ڕى ل غه‌زه‌ ل سه‌ر ده‌ڤه‌رێ ب گشتى، ژ ته‌وه‌رێن دى یێن كۆمبوونێ بوون”.

سه‌رۆكێ هه‌رێما كوردستانێ هه‌ر ئه‌ڤرۆ ل به‌غدا ل گه‌ل محه‌مه‌د شیاع سوودانى سه‌رۆكوه‌زیرێ ئیراقێ، محه‌مه‌د حه‌لبووسى سه‌رۆكێ پارتا ته‌قه‌ده‌م، فائیق زێدان سه‌رۆكێ جڤاتا دادوه‌رى یا بلند و قه‌یس خه‌زعه‌لى سه‌رۆكێ عه‌سائیب ئه‌هل ئه‌لحه‌ق ژى كۆمببوو.

تُتاح هذه الصورة أيضا في: کوردی

مقالات ذات صله

الرد

پۆستی ئەلکترۆنیکەت بڵاو ناکرێتەوە . خانە پێویستەکان دەستنیشانکراون بە *

Copyright © 2021 by Lalish Media Network .   Developed by Ayman qaidi