پارتی دڤێت ب هەموارا بودجەی مووچەیێن فەرمانبەرێن هەرێما كوردستانێ ل بەغدا گەرەنتی بكەت
باسنيوز:
فراكسیۆنا پارتی دیموكراتی كوردستان، د ڤێ قۆناغێدا دێ كاری بۆ وێ ئێکێ کەت کۆ ب هەموارا یاسایا بودجەی لسەر بنەمایێ رێككەفتنا حكوومەتا هەرێما كوردستانێ و بەغدا، كار بۆ گەرەنتیكرنا مووچەیێن فەرمانبەرێن هەرێما كوردستانێ بكەت.
شێروان دووبەردانی، پەرلەمانتارێ فراکسیۆنا پارتی دیموكراتی كوردستان، بۆ (باسنیوز) ئاشكرا كر، دڤێ قۆناغێدا كارێن پێشیێ یێن فراكسیۆنا وان هەمواركرنا بودجەیە، لسەر بنەمایێ رێككەفتن و لێكتێگەهشتنا هەردوو حكوومەتێن هەرێما كوردستانێ و یا عێراقێ، گوتژی: ”شاندنێ هەرێما كوردستانێ، سەرەدانا بەغدا كریە، رێككەفتن لسەر هەمواركرنا بودجەی كریە و بریارە ژلایێ جڤاتا وەزیرێن عێراقێ ئەو رێككەفتن ب نڤیسارەکا فەرمی بگەهیتە پەرلەمانێ عێراقێ، پشتی وێ ئەم وەكۆ فراكسۆنا پارتی، کارێ مە یێ پێشیێ هەمواركرنا بودجەیە ب شێوەكێ، کۆ مووچەیێن فەرمانبەران لسەر نەفەقاتێن فعلی بچیتە سەر بودجا حاكیمە، كو ئەڤە دێ گەرەنتیا وێ ئێکێ چێکەت هەیڤانە مووچەیێ فەرمانبەرێن هەرێما كوردستانێ وەكوو فەرمانبەرێن عێراقێ بهێتە دان.“
دەربارێ ھەموارا یاسایا بودجەی ژێ، دووبەردانی تەکەز لسەر وێ كر، ئێکەم پێنگاڤا فراکسیۆنا پارتی و پرۆژێ وان دێ ھەموارا یاسایا بودجەی بیت، بۆ هندێ مووچەیێن فەرمانبەرێن ھەرێما کوردستانێ بهێتە مسۆگەر کرن، چاڤەرێ هاتیە کرن کۆد ڤان نزیكان پرۆژێ هەمواركرنێ لسەر بنەمایێ رێککەفتنا ناڤبەرا ھەرێما كوردستان و بەغدا بۆ پەرلەمانێ عێراقێ بهێتە رەوانە کرن.
تُتاح هذه الصورة أيضا في: کوردی
