پارتى ژ حكومه‌تا ئیراقێ خواست قه‌ره‌بۆیا گه‌لێ كوردستانێ بكه‌ت
گاڤ
فراكسیۆنا پارتى دیمۆكراتى كوردستان ل په‌ڕله‌مانێ ئیراقێ ژ سه‌رۆكوه‌زیرێ ئیراقێ خواست، ل گۆره‌ى قانوونێن به‌ركار قه‌ره‌بۆیا زیانڤێكه‌تیێن سه‌رده‌مێ رژێما به‌عس یا رۆخاندى بكه‌ت.
مەریوان قەرەنی، سه‌رۆكێ فراكسیۆنا پارتى دیمۆكراتى كوردستان ل په‌رله‌مانێ ئیراقێ بۆ وێبسایتێ پارتى راگه‌هاند، ل دویڤ راسپارده‌یا سه‌رۆك بارزانى وان نڤیسیاره‌كا فه‌رمى ل رۆژا 19ى ڤێ هه‌یڤێ دایه سه‌رۆكوه‌زیرێ ئیراقێ محه‌مه‌د شیاع سودانى بۆ قه‌ره‌بۆكرنا خه‌لكێ زیاندیتى یێ كوردستانێ لسه‌ر ده‌ستێ رژێما به‌عس یا رۆخاندى.
قه‌ره‌نى دا زانین، پێدڤى یه كار ب ده‌ستوورى و یاسایێن قه‌ره‌بۆیا ئۆپه‌راسیۆنێن جه‌نگى و شاشیێن سه‌ربازى یا ژماره 20ی سالا 2009 بهێته‌كرن كو ل گۆره‌ى وێ یاسایێ (شەهید، بێسه‌روشوین، یێن تووشى په‌ككه‌فتنا ب تمامى یا به‌شه‌كى بووین، ئه‌و زیانێن ب ملك ومالان كه‌ڤتین، دگه‌ل وان زیانێن په‌یوه‌ندى وه‌زیفه و خواندنێ ڤه هه‌ین). بهێنه قه‌ره‌بۆكرن.
گۆت ژى، ل گۆره‌ى یاسایا قه‌ره‌بۆكرنا ملك و مالێن زیانڤێكه‌تیێن سه‌رده‌ستێ رژێما بۆرى یا ژماره 16 یا سالا 2010ێ كو قه‌ره‌بۆكرنا سه‌رجه‌م زیانڤێكه‌تیێن سه‌ر ده‌ستێ رژێما بۆرى ڤه‌دگریت هه‌ر ژ سالا 1968ێ تا سالا 2003ێ، كو ئه‌نفالكرنا كوردێن فه‌یلى، بارزانى ،ئه‌نفالێن 1988ێ، كاره‌ستا حه‌له‌بچه، وێرانكرنا 4 هزار و 550 گوندێن كوردستانێ و زیانێن چاندنا ب ملیۆنان مینان ل كوردستانێ ب خۆڤه دگریت.
گۆت ژى ب مراندنا ڤى ڤێ پرسێ و بۆرینا زه‌مه‌نى به‌رپرساتیا حكومه‌تا ئیراقێ ژناڤ ناچیت، چونكى ئه‌و تاوانێن هاتینه كرن تاوانێن دژى مرۆڤاتیێ بووینه.
تُتاح هذه الصورة أيضا في: کوردی
